27.10.2025
27 октябри соли 2025 дар меҳмонхонаи «Серена» семинари омӯзишии серӯзагӣ барои кормандони Агентии назорат дар соҳаи маориф ва илми назди Президенти Ҷумҳурии Тоҷикистон дар мавзуи «Тартиби такмилёфтаи мониторинг ва арзёбии сифати таълим, иҷозатдиҳӣ, аттестатсия ва аккредитатсияи давлатӣ дар муассисаҳои таҳсилоти умумӣ» оғоз гардид. Семинар дар доираи амалигардонии лоиҳаи «Муҳити таълим – асоси таҳсилоти босифат» доир шуд.
Дар кори семинар муовини вазири маориф ва илми Ҷумҳурии Тоҷикистон Музаффарзода Бадриддин, директори Агентии назорат дар соҳаи маориф ва илм Саидзода Муҳаммадтоир Саид, сардори шуъбаи сифати таҳсилоти Вазорати маориф ва илм Холиқзода Айниддин, менеҷери лоиҳа Азатуллозода Нарзия ва мушовири байналмилалӣ Какабаева Райгул ширкат доштанд.
Зимни ифтитоҳи семинар таъкид гардид, ки Пешвои миллат муҳтарам Эмомалӣ Раҳмон ҳанӯз соли 2019 зимни ироаи суханронӣ ба ифтихори Рӯзи дониш зикр намуда буданд: «Сифати таҳсилот дар оянда низ ҳамчун масъалаи муҳими соҳаи маориф боқӣ мемонад».
Дар робита ба ин нукта, иштирокчиён таъкид карданд, ки барои таъмини сифати таҳсилот аз ҷониби Ҳукумати мамлакат, вазорату идораҳои дахлдор ва худи муассисаҳои таълимӣ корҳои зиёде анҷом дода шудаанд. Бо вуҷуди ин, зарурати андешидани тадбирҳои ҷиддӣ барои такмили низоми идоракунии сифати таҳсилот ҳанӯз ҳам боқӣ мемонад.
Гуфта шуд, ки аз соли 2007 дар муассисаҳои таълимии кишвар низоми назорати сифати таҳсилот ва аз соли 2010 низоми идоракунии таълим амал мекунад. Бо вуҷуди ин, нокифоя будани таҷриба ва фаъолиятҳои маҳдуди масъулон боиси иҷро нагардидани пурраи баъзе принсипҳои идоракунии соҳа шудааст.
Иштирокчиён зикр намуданд, ки сиёсати давлатии Ҷумҳурии Тоҷикистон дар соҳаи маориф ба самти наздикшавӣ ба меъёрҳои байналмилалӣ ва ҳамгироӣ ба фазои ҷаҳонии таҳсилот равона гардидааст. Аз ин рӯ, мутобиқ гардондани низоми арзёбии сифати таҳсилот ба ин меъёрҳо яке аз вазифаҳои асосии давра ба шумор меравад.
Дар семинар ёдоварӣ шуд, ки 28 феврали соли 2025 таҳти раёсати Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ҷаласаи Ҳукумати мамлакат баргузор гардид, ки дар он Стратегияи миллии арзёбии сифати таҳсилот барои давраи то соли 2044 мавриди баррасӣ қарор гирифт. Ин санад бо қарори Ҳукумати Ҷумҳурии Тоҷикистон аз 28 феврали соли 2025, №140 тасдиқ гардида, ба такмили раванди таълим ва баланд бардоштани сифати таҳсилот нигаронида шудааст.
Дар доираи татбиқи банди 1, 2 ва 4-и Нақшаи амал барои солҳои 2025-2027 семинари мазкур ба омӯзиши тартиби нав, нишондиҳандаҳо ва воситаҳои арзёбии дохилисинфӣ дар зинаи таҳсилоти умумӣ бахшида шудааст. Барномаи семинар мавзӯъҳои зеринро дар бар мегирад:
• равандҳои глобалии арзёбии берунаи сифати таҳсилот;
• тартиби нави мониторинг ва арзёбии сифати таълим;
• иҷозатдиҳӣ, аттестатсия ва аккредитатсияи давлатӣ;
• ташкили мушоҳидаи дарс ва пурсишҳои таҳлилӣ тавассути анкета;
• ҷамъбаст ва пешниҳоди натиҷаҳои арзёбии беруна.
Дар раванди семинар мушовирони байналмилалӣ ва мутахассисони миллӣ аз таҷрибаи пешқадами байналмилалӣ дар самти арзёбии сифати таълим иттилоъ доданд ва роҳҳои татбиқи амалии онро дар муассисаҳои таълимии кишвар баррасӣ намуданд.
Ёдовар мешавем, ки баргузории чунин семинарҳо ҷиҳати иҷрои дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар самти баланд бардоштани сатҳи сифати таҳсилот, инчунин татбиқи Нақшаи амал барои солҳои 2025-2027 “Стратегияи миллии арзёбии сифати таҳсилот” аҳаммияти бузург дошта, ба таҳкими заминаҳои ҳуқуқӣ ва институти таҳсилоти босифат мусоидат хоҳад кард.
Хабарҳои дигар
-
Гурӯҳи ТИМК ва Барномаи Дастгирии Буҷет давраи омӯзишҳои тақвияти иқтидорро дар саросари Тоҷикистон идома медиҳанд Гурӯҳи ТИМК ва Барномаи дастгирии буҷет силсилаи омӯзишҳои тақвияти иқтидорро бо мақсади рушди таҳсилоти касбии фарогир ва бар асоси салоҳият дар саросари Тоҷикистон оғоз намудааст. Нахустин даври омӯзиш дар шаҳри Хуҷанд баргузор гардида, дар он омӯзгорон, методистон ва тренерон аз шаҳр ва минтақаҳои ҳамсоя ширкат варзиданд. Давраи омӯзишҳо ҳамин ҳафта дар шаҳри Бохтар идома ёфта, имкониятҳои навро барои такмили малакаҳои касбӣ ва татбиқи усулҳои муосири таълимии мутобиқ ба ниёзҳои бозори меҳнат фароҳам меорад.
29
31.10.2025 -
Оғози омӯзиш барои таҳкими таҳсилоти касбии фарогир Гурӯҳи ТИМК ва Барномаи Дастгирии Буҷет расман оғози даври аввалини омӯзишҳои такмили ихтисосро эълон намуда, ҳадафи он дастгирии ҷорӣ намудани усулҳои муосир ва ба соҳа мувофиқ дар муассисаҳои таҳсилоти ибтидоӣ ва миёнаи касбии Тоҷикистон мебошад. Ин омӯзишҳо бо нишондиҳандаҳои асосии Барномаи дастгирии буҷет ҳамоҳанг буда, ба таъмини таҳсилоти босифат, дастрас ва фарогир нигаронида шудаанд. Ин даври омӯзишҳо се мавзӯи муҳимро дар бар мегирад: • Методологияи истифодаи маводи рақамии модулӣ ва ба салоҳият асосёфта дар раванди таълим • Таҳсилоти касбии дастрас ва фарогир • Методологияи татбиқи барномаҳои модулӣ ва ба салоҳият асосёфта, аз ҷумла барномаҳои кӯтоҳмуддат Аввалин омӯзиш дар Литсейи касбии политехникии шаҳри Хуҷанд баргузор гардида, дар он омӯзгорон, методистон ва инчунин мутахассисони минтақаҳои ҳамсоя иштирок намуданд. Ҳадафи ташаббус — баланд бардоштани малакаҳои касбӣ, татбиқи усулҳои нави таълим ва такмили сифати умумии раванди таълими касбӣ мебошад. Бо фароҳам овардани шароит барои омӯзгорон ҷиҳати истифодаи усулҳои пешрафтаи таълимӣ ва воситаҳои методӣ, Гурӯҳи ТИМК ва Барномаи Дастгирии Буҷет ӯҳдадории худро дар самти дастгирии нерӯи корие, ки барои бозори меҳнати рӯ ба рушд омода аст, идома медиҳад ва таъмини дастрасии баробар ба таҳсилоти касбиро барои тамоми гурӯҳҳои аҳолӣ, аз ҷумла шахсони осебпазир, таъмин менамояд.
106
24.10.2025 -
МУАРРИФИИ НАТИҶАҲОИ ТАҲҚИҚОТ ДАР ЛОИҲАИ “МУҲИТИ ТАЪЛИМ – АСОСИ ТАҲСИЛОТИ БОСИФАТ” 22 октябри соли 2025 дар меҳмонхонаи “Dushanbe Serena” мизи мудаввар оид ба муаррифии натиҷаҳои “Таҳқиқоти истифодабарандагони муассисаҳои таълимӣ (SUS)” ва “Мушоҳидаи дарс тавассути воситаи TEACH” бо иштироки муовини вазири маориф ва илми Ҷумҳурии Тоҷикистон Равшан Каримзода баргузор гардид. Дар чорабинӣ роҳбарони иттиҳодияҳои методии муассисаҳои таҳсилоти умумии фарогири лоиҳаи “Муҳити таълим - асоси таҳсилоти босифат”, намояндагони лоиҳа ва васоити ахбори омма иштирок намуданд. Муовини вазир зимни суханронии ифтитоҳӣ таъкид намуд, ки дар ҷаҳони муосир таҳсилоти босифат бе муҳити солиму замонавии таълимӣ имконнопазир аст. Мавсуф иброз дошт, ки бо ташабусси Ҳукумати Ҷумҳурии Тоҷикистон таҳти роҳбарии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва дастгирии Бонки ҷаҳонӣ лоиҳаи “Муҳити таълим – асоси таҳсилоти босифат” барои солҳои 2023–2029 татбиқ шуда истодааст. Гуфта шуд, ки мақсади асосии лоиҳа беҳтар намудани муҳити таълим ва омӯзиш дар муассисаҳои таҳсилоти миёнаи умумии кишвар мебошад. Лоиҳа ба се самти калидӣ - таҳияи чаҳорчӯбаи миллии рушди таҳсилот, беҳтарсозии инфрасохтори муассисаҳо ва тақвияти арзёбию идоракунии лоиҳа нигаронда шудааст. Дар доираи амалисозии лоиҳа марҳилаи заминавии ду таҳқиқот -“SUS” ва “TEACH” дар 130 муассисаҳои ҳамаи минтақаҳои кишвар, аз ҷумла, вилоятҳои Хатлон ва Суғд, ШНТҶ ва ВМКБ, дар моҳҳои март–апрели соли 2025 ба анҷом расонида шуд. Дар ҷараёни мизи мудаввар натиҷаҳои таҳқиқот муаррифӣ гардида, иштирокчиён дар гурӯҳҳо натиҷаҳо ва тавсияҳоро мавриди баррасӣ қарор доданд. Чорабинӣ ҳамчун як фурсати муҳимми мубодилаи таҷриба ва таҳкими ҳамкориҳо байни муассисаҳо ва мутахассисони лоиҳа арзёбӣ гардид. Баргузории чунин мизҳои мудаввар қадами нав дар самти қабули қарорҳо дар асоси таҳлил ва татбиқи тағйироти воқеӣ дар соҳаи маориф ба ҳисоб меравад. Маркази матбуоти Вазорати маориф ва илми Ҷумҳурии Тоҷикистон
158
22.10.2025
