02.05.2025
2 майи соли 2025 дар Вазорати маориф ва илми Ҷумҳурии Тоҷикистон вохӯрии муовини вазири маориф ва илм Бадриддин Музаффарзода бо директори Барномаи озуқавории ҷаҳонии СММ (БОҶ) дар Тоҷикистон Адҳам Мусаллам баргузор гардид.
Муовини вазири маориф ва илм зимни вохӯрӣ зикр намуд, ки соҳаи ғизои мактабӣ аз самтҳои муҳимми иҷтимоии кишвар ба ҳисоб рафта, барои беҳбудии саломатии кӯдакон ва рушди неруи зеҳнии онҳо мусоидат мекунад.
Таъкид шуд, ки Барномаи давлатии рушди ғизои мактабӣ барои солҳои 2022–2027 бо мақсади баланд бардоштани сифати ғизои муассисаҳои таҳсилоти умумӣ амалӣ шуда, бо дастгирии Ҳукумати Ҷумҳурии Тоҷикистон ва ҳамкории муассир бо БОҶ натиҷаҳои назаррас ба даст овардааст.
Директори БОҶ дар Тоҷикистон дар навбати худ аз ҳамкории судманди Барномаи ҷаҳонии озуқаи СММ бо Вазорати маориф ва илм изҳори сипос намуда, таъкид кард, ки дар доираи марҳилаи нав (2025–2028) барнома боз ҳам тавсеа меёбад. Ба гуфтаи ӯ, соли 2025 наздики 50 мактаб бо таҷҳизоти зарурии ошхона таъмин мегарданд ва 40 мактаб бо фаъолияти тавлиди даромад, аз ҷумла гармхона ва занбӯрпарварӣ дастгирӣ хоҳанд ёфт.
Ҷонибҳо омодагии худро барои густариши бештари барнома дар саросари кишвар ва таҳкими иқтидори маҳаллӣ дар самти ғизои мактабӣ изҳор намуданд. Ҳамзамон, зарурати саҳми фаъолонаи мақомоти маҳаллӣ ва волидайн дар татбиқи муваффақонаи лоиҳа махсус таъкид гардид.
Ҳадаф аз мулоқот тақвияти ҳамкориҳои дуҷониба ва таъмини шароити беҳтари ғизои солим барои хонандагони мактабҳои кишвар арзёбӣ шуд.
Маркази матбуоти
Вазорати маориф ва илми
Ҷумҳурии Тоҷикистон
Хабарҳои дигар
-
ИШТИРОК ДАР СЕМИНАРИ МИНТАҚАВӢ ОИД БА МАСЪАЛАҲОИ ИҶТИМОӢ ДАР ШАҲРИ БАНГКОКИ ТАЙЛАНД Рӯзҳои 15-17 октябри соли 2025 дар шаҳри Бангкоки Тайланд аз ҷониби Бонки Осиёии Рушд семинари минтақавӣ оид ба масъалаҳои иҷтимоӣ баргузор гардид, ки дар он намояндагони кишварҳои минтақа, созмонҳои байналмилалӣ, коршиносони соҳаи маориф ва роҳбарони лоиҳаҳои марбут иштирок намуданд. Ҷумҳурии Тоҷикистонро дар ин чорабинӣ дар баробари се нафари дигар, Абдулмаҷид Бобохон - роҳбари лоиҳаи “Такмили таҳсилоти миёна дар соҳаҳои илмҳои табиӣ, технологӣ, муҳандисӣ ва математика (STEM)” намояндагӣ намуд. Ҳадафи асосии ширкат дар семинар мубодилаи таҷриба, муаррифии дастовардҳо ва баррасии роҳҳои беҳтар намудани татбиқи самтҳои иҷтимоӣ дар кишварҳои минтақа буд. Дар рафти баромади худ, роҳбари лоиҳаи “Такмили таҳсилоти миёна дар соҳаҳои илмҳои табиӣ, технологӣ, муҳандисӣ ва математика” ҷанбаҳои муҳим ва таҷрибаи Тоҷикистонро дар татбиқи лоиҳаи мазкур муаррифӣ намуд. Ӯ махсусан ба зарурати интегратсияи унсурҳои иҷтимоӣ дар амалисозии лоиҳа таъкид кард. Ба гуфтаи роҳбари лоиҳа, барои ноил шудан ба натиҷаҳои устувор дар соҳаи таҳсилоти миёна, хусусан омӯзиши фанҳои дақиқ, зарур аст, ки дар баробари таҳкими заминаи моддӣ-техникӣ ва баланд бардоштани савияи касбии омӯзгорон, ба масъалаҳои иҷтимоӣ низ таваҷҷуҳи ҷиддӣ зоҳир намудан зарур аст. Ҳамзамон, зикр гардид, ки татбиқи лоиҳа бояд бо дарназардошти фарогирии гурӯҳҳои осебпазир, бахусус духтарон дар таҳсилоти фанҳои STEM, баланд бардоштани сатҳи ҳавасмандии хонандагон, таъмини баробарии гендерӣ ва ҷалби ҷомеаву падару модарон ба равандҳои таълимӣ амалӣ гардад.
30
20.10.2025 -
БАРГУЗОРИИ КУРСИ ТАКМИЛИ ИХТИСОСИ ОМӮЗГОРОНИ ФАННИ ТАЪРИХ ВА ГЕОГРАФИЯ ДАР ДОИРАИ ЛОИҲАИ “МУҲИТИ ТАЪЛИМ - АСОСИ ТАҲСИЛОТИ БОСИФАТ” Бо ташаббуси Вазорати маориф ва илми Ҷумҳурии Тоҷикистон дар доираи амалигардонии лоиҳаи “Муҳити таълим - асоси таҳсилоти босифат” дар ҳамкорӣ бо Донишкадаи ҷумҳуриявии такмили ихтисос ва бозомӯзии кормандони соҳаи маориф курси омодасозии тренерони аз рӯйи барномаҳои нави курси такмили ихтисос (дар шакли модулҳо) барои омӯзгорони фанни таърих ва география баргузор гардид. Зимни маросими ифтитоҳӣ муовини вазири маориф ва илм Музаффарзода Бадриддин ва ректори Донишкада Н.Мирзозода иштирок ва суханронӣ намуданд. Зимни сухани ифтитоҳӣ муовини вазир аз таваҷҷуҳи бевоситаи Асосгузори сулҳу ваҳдати миллӣ - Пешвои миллат муҳтарам Эмомалӣ Раҳмон ва Ҳукумати Ҷумҳурии Тоҷикистон нисбат ба соҳаи маориф ва илм ёдовар шуда, таъкид намуд, ки яке аз омилҳои муҳимми рушди соҳа таҳияи барномаҳои муосири таълимиест, ки навгониҳо ва ниёзҳои омӯзгоронро ба назар мегиранд. Сипас, ректори Донишкада изҳор дошт, ки ҳадафи асосии таҳияи барномаҳои нави таълимӣ ва ташкили чунин курсҳо - ин рушди салоҳиятҳои калидии омӯзгорони фанҳои таърих ва география дар заминаи методикаи муосири таълим мебошад. Курс ба такмили салоҳиятҳои касбии омӯзгорон тавассути истифодаи усулҳои муосири таълимӣ, технологияҳои инноватсионӣ ва муносибати босалоҳият нигаронида шуда, дар охир иштирокчиён соҳиби шаҳодатномаи хатми курс гардиданд. Мақсади асосӣ - баланд бардоштани сифати таҳсилот ва фароҳам овардани муҳити муосири таълимӣ мебошад, ки рушди тафаккури интиқодӣ, эҷодкорӣ, ҳамкорӣ, муошират ва дигар салоҳиятҳои 4К+ (тафаккури интиқодӣ, ҳамкорӣ, муошират, эҷодкорӣ ва маҳорати омӯзишро) таъмин мекунад. Мундариҷаи курс Барномаи омӯзишӣ аз 4 модул иборат аст: 1. Муносибати салоҳиятнок ва муҳити таълимӣ дар таълими фан 2. Муҳити физикии таълим ва таҷрибаи омӯзгорон 3. Таҳияи вазъиятҳои таълимӣ барои рушди салоҳиятҳо 4. Арзёбии дастовардҳои таълимӣ дар шароити нави таълим Барномаи курс дар маҷмӯъ 48 соати омӯзишӣ-ро дар бар мегирад. Методҳо ва мазмуни омӯзиш Омӯзиш бо истифодаи усулҳои фаъоли таълим, аз қабили кортҳои омӯзишӣ, кейс-стади, варақаҳои худбаҳодиҳӣ, презентатсияҳо ва маводи тақсимшаванда баргузор гардид. Иштирокчиён имконият доранд порчаҳои дарсӣ таҳия намуда, онҳоро дар муҳити таҳлилӣ ва дастгиркунанда пешниҳод ва муҳокима кунанд. Дар доираи курс масъалаҳои зерин низ баррасӣ мешаванд: • таълими фарогир; • усули STEAM дар таълим; • арзёбии ташаккулдиҳанда; • фароҳам овардани муҳити мусоиди таълимӣ; • мутобиқсозии муҳити физикӣ ба талаботи муосир. Натиҷаҳои интизоршаванда • Такмили салоҳиятҳои касбии омӯзгорон дар шароити муосир; • Татбиқи усулҳои интерактивӣ ва муосири таълим; • Баланд бардоштани сифати таълим ва ангезаи хонандагон; • Мутобиқсозии муҳити таълимӣ ба талаботи омӯзиши салоҳиятнок; • Татбиқи принсипҳои таълими фарогир ва STEAM.
77
16.10.2025 -
ЭЪЛОН Бахши ғизои мактабии назди Вазорати маориф ва илми Ҷумҳурии Тоҷикистон соли 2023 бо дастгирии Барномаи озуқавории ҷаҳонӣ (БОҶ) дар Ҷумҳурии Тоҷикистон таъсис ёфтааст. Ин бахш фаъолияти худро дар асоси Ҳадаф ва вазифаҳои Барномаи давлатии рушди ғизои мактабӣ барои солҳои 2022–2027 ва Стратегияи рушди устувори ғизои мактабӣ дар Ҷумҳурии Тоҷикистон то соли 2027 ба роҳ монда, ҳамоҳангсозии фаъолиятҳои марбут ба ғизои мактабиро таъмин менамояд. Аз ҷумла, он ҳамкориҳоро миёни Вазорати маориф ва илм ва Барномаи озуқавории ҷаҳонӣ дар раванди гузариш аз амалисозии барномаи ғизои мактабӣ аз ҷониби БОҶ ба Вазорат ба роҳ мемонад. Пас аз анҷоми давраи гузариш, Бахш ҳамчун маркази асосии ҳамоҳангсозӣ оид ба масъалаҳои ғизои мактабӣ фаъолиятро идома хоҳад дод. Вазорати маориф ва илми Ҷумҳурии Тоҷикистон ният дорад, ки ҳайати марказро тавассути таъсиси намояндагиҳо дар вилоятҳо, шаҳрҳо ва ноҳияҳо бо мақсади ҳамоҳангсозӣ ва назорат, мусоидат дар нақшакашӣ, мониторинг ва ҳисоботдиҳӣ, корҳои таблиғотӣ, баланд бардоштани иқтидор ва таъмини гузариши устувори барномаи ғизои мактабӣ васеъ намояд. Дар ин замина, мутахассисони бахшҳои ғизои мактабӣ дар Вилояти Мухтори Кӯҳистони Бадахшон, дар вилоятҳои Суғд, Хатлон (минтақаҳои Бохтар ва Кулоб) ва Рашт ба кор ҷалб карда мешаванд. ВАЗИФАҲО Таҳти назорати бевоситаи Ҳамоҳангсози маркази ғизои мактабӣ ва бо ҳамкории Барномаи Озуқавории Ҷаҳонӣ дар Тоҷикистон, мутахассис вазифаҳои зеринро иҷро мекунад: - Намояндагии Маркази ғизои мактабӣ дар минтақаҳои вобасташуда, пешниҳод намудани дастурҳо ва ҳамоҳангсозии фаъолиятҳои шахсони масъули шӯъбаҳои маориф. - Дастгирӣ дар татбиқ ва ҳамоҳангсозии фаъолиятҳои Барномаи давлатии рушди ғизои мактабӣ дар сатҳи вилоят. - Дастгирии шӯъбаҳои маориф дар банақшагирӣ ва тарҳрезии ғизодиҳии мактабӣ барои маблағгузорӣ аз буҷети давлат ва ё шарикони рушд, инчунин дарёфти манбаъҳои иловагии маблағгузорӣ. - Барқарорсозии ҳамоҳангӣ ва ҳамкорӣ бо шахсони масъули ғизои мактабӣ дар шаҳру ноҳияҳл, мақомоти маҳаллӣ, шарикони рушд ва дигар ҷонибҳои манфиатдор (сохторҳои тандурустӣ ва ҳифзи иҷтимоии аҳолӣ, кишоварзӣ ва ғ.). - Тақвияти фаъолияти Шӯрои вилоятӣ ва ноҳиявии ғизои мактабӣ бо иштироки мақомотҳои салоҳиятдор ва пайгирии қарорҳои Шӯрои ҳамоҳангсозии байниидоравӣ дар вилоят (минтақа) ва ноҳияҳо. - Дастгирӣ дар таъсис ва тақвияти ҳамоҳангсозии фаъолияти мақомотҳо ва ҷонибҳои манфиатдор барои татбиқи барномаҳо дар сатҳи шаҳру ноҳияҳо ва назорати фаъолияти онҳо бо ҷалби шахсони масъули шӯъбаҳои маориф. - Таъсис додани низоми ғизои мактабӣ, аз ҷумла такмили шароити ошхонаҳо, таҷҳизот, мебели мактабӣ, нигоҳдории маҳсулот, ошхонаи хонандагон, шароити шустани дастҳо, фаъолиятҳои кишоварзӣ ва фаъолияти даромадноки мактабҳо. - Дастгирии мактабҳо дар банақшагирӣ, ташкил ва идоракунии барномаи ғизоӣ, ки аз буҷети давлатӣ, грантҳои шарикони рушд, саҳми волидон ва дигар манбаъҳо маблағгузорӣ мешавад. - Мониторинги мунтазами сифату гуногунии ғизои мактабӣ, аз ҷумла тақвияти фаъолиятҳои рушди кишоварзӣ бо истифодаи заминҳои мактабӣ ва ҳамкорӣ бо хоҷагиҳои деҳқонӣ ва нонпазхонаҳо. - Таҳия кардани ҳисоботҳо ва фавран гузориш додани ҳолатҳои фавқулода ё фасоду фиреб ба Вазорати маориф ва илми Ҷумҳурии Тоҷикистон ва дар ҳолати зарурӣ ба шарикони рушд. - Дар ҳолати ошкор намудани мушкилот ё амалҳои ғайриқонунӣ ҳангоми татбиқи барнома, фавран ба сардори шӯъбаи маорифи минтақавӣ ва Вазорати маориф ва илми Ҷумҳурии Тоҷикистон дар шакли хаттӣ гузориш додан ва пешниҳод намудани роҳи ҳалли он. - Ҷамъоварии маълумот оид ба пешрафти ғизои мактабӣ аз шахсони масъули ноҳияҳо, таҳияи ҳисоботҳои моҳона ва солона бо таҳлили зарурӣ ба Маркази ғизои мактабӣ ва Вазорати маориф ва илми Ҷумҳурии Тоҷикистон. - Ҷамъоварӣ ва супоридани санадҳои молиявии шахсони масъул барои пардохти хароҷоти нақлиёт ва ё дигар хароҷоти марбут ба Маркази ғизои мактабӣ ва Вазорати маориф ва илми Ҷумҳурии Тоҷикистон. - Тақвияти иқтидори роҳбарияти мактабҳо ва шахсони масъули шӯъбаҳои маорифи шаҳрҳо ва ноҳияҳои минтақа тавассути ташкили омӯзишҳо ва пешниҳоди машваратҳо оид ба ташкил ва идоракунии ғизои мактабӣ. - Тарғиби ғизои солим дар мактабҳо, маҳаллаҳо ва ҷомеаҳо, аз ҷумла ташкил ва гузаронидани чорабиниҳои оммавӣ оид ба ғизои солим. - Иштирок дар таҳқиқотҳо, баррасиҳо ва арзёбиҳои марбут ба татбиқи ғизои мактабӣ ва Барномаи давлатии рушди ғизодиҳии мактабӣ. - Иҷрои ҳама гуна вазифаҳои дигар вобаста ба амалисозӣ ва рушди ғизои мактабӣ дар вилоят. ТАЛАБОТҲО Тахассусӣ Маълумоти дараҷаи бакалаврият ё дипломи пурраи маълумоти олӣ оид ба фанҳои гуманитарӣ, иқтисодиёт, молия, идоракунии давлатӣ, фанҳои марбут ба рушд ё дигар соҳаи марбут. Дониши ташрифоти давлати оид ба котиботи расмӣ, маҷлисҳо, ташрифҳо миссияҳо, чорабиниҳо ва гайра ҳатмӣ мебошад. Малакаи қавии муоширати бо шарикони давлатӣ ва шарикони рушд. Таҷрибаи корӣ Ду соли собиқаи корӣ дар корҳои тарҳрезӣ ва татбиқи лоиҳа, мониторинг ва арзёбӣ (аз ҷумла идоракунии маълумот) бо сохторҳои давлатӣ ё лоиҳаҳо,ташкилотҳои байналмилалӣ ва маҳаллӣ. Таҷрибаи корӣ дар барнома ва лоиҳаҳои ғизои мактабӣ бартарӣ дорад. Забондонӣ Дониши хуби забони тоҷикӣ ҳатмист. Донистани забонҳои англисӣ ва русӣ афзалият дорад. Малакаи кор бо компютер Маҳорати баланди кор бо барномаҳои MS Office (Word, Excel, PowerPoint, Outlook) талаб карда мешавад ва таҷрибаи қавӣ дар идоракунӣ ва таҳлили маълумот зарур аст. Таҷрибаи кор бо барномаҳои таҳлил ва визуализатсияи маълумот (SPSS, STATA, Tableau ва ғайра) бартарӣ дорад. Номзадҳои соҳибихтисос резюме ва номаи тавсиявии худро бояд ба почтаи электронии zsayora@mail.ru ва dilovarsaydaliev@gmail.com ирсол намоянд. Дар мавзӯи нома ҳатман номи вазифа, ноҳия ва вилоят нишон дода шавад. Рақами телефон барои гирифтани маълумоти иловагӣ: +992 90014009 (аз соати 8:00 то 17:00). Мӯҳлати ниҳоии пешниҳоди ҳуҷҷатҳо — 24 октябри соли 2025 то соати 17:00 (ба вақти Душанбе).
494
08.10.2025
