26.12.2025
25 декабри соли 2025 дар Вазорати маориф ва илми Ҷумҳурии Тоҷикистон бо мақсади шарҳу тавзеҳи муҳтавои Паёми Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон ҳамоиши илмӣ баргузор гардид.
Ҳамоиш бо садо додани Суруди миллӣ ифтитоҳ ёфта, иштирокчиён Паёми Пешвои миллатро ҳамчун санади муҳимми сиёсӣ, иҷтимоӣ ва стратегии давлатдорӣ мавриди баррасӣ қарор доданд.
Дар оғоз муовини вазири маориф ва илми Ҷумҳурии Тоҷикистон Равшан Каримзода суханронӣ намуда, ба аҳаммияти Паёми Президенти Ҷумҳурии Тоҷикистон ҳамчун ҳуҷҷати муҳими сиёсӣ, иҷтимоӣ ва стратегӣ таъкид кард. Номбурда нақши калидии соҳаи маориф ва илмро дар татбиқи ҳадафҳои стратегии Ҳукумати Ҷумҳурии Тоҷикистон муҳим арзёбӣ намуда, зарурати шарҳу тавзеҳи илмии нуктаҳои Паёмро махсус зикр намуд.
Дар идома, маърузаи муовини раиси Кумита оид ба масъалаҳои иҷтимоӣ, оила ва ҳифзи саломатӣ, вакили Маҷлиси намояндагони Маҷлиси Олии Ҷумҳурии Тоҷикистон аз ҳавзаи ягонаи умумиҷумҳуриявӣ Сарвиноз Маҷидзода дар мавзуи «Шарҳи самти иҷтимоии Паёми Президенти Ҷумҳурии Тоҷикистон ба Маҷлиси Олии Ҷумҳурии Тоҷикистон» шунида шуд. Дар маъруза масъалаҳои муҳимми сиёсати иҷтимоии давлат, аз ҷумла тақвияти ҳифзи иҷтимоии аҳолӣ, дастгирии оила, баланд бардоштани сатҳ ва сифати хизматрасониҳои соҳаи тандурустӣ ва беҳтар намудани шароити зиндагии шаҳрвандон мавриди баррасӣ қарор гирифтанд.
Сипас, узви Кумита оид ба қонунгузорӣ ва ҳуқуқи инсон, вакили Маҷлиси намояндагони Маҷлиси Олии Ҷумҳурии Тоҷикистон аз ҳавзаи ягонаи умумиҷумҳуриявӣ Наима Солизода дар мавзуи «Таҳлили ҳуқуқии Паёми Президенти Ҷумҳурии Тоҷикистон ҳамчун санади сиёсӣ-ҳуқуқӣ» маъруза ироа намуд. Таъкид шуд, ки Паёми Президенти Ҷумҳурии Тоҷикистон заминаи муҳимми ташаккул ва такмили қонунгузории миллӣ ба шумор рафта, ҳамчун роҳнамои фаъолияти мақомоти ҳокимияти давлатӣ ва ниҳодҳои ҷомеаи шаҳрвандӣ хизмат менамояд.
Дар ҷараёни ҳамоиш иштирокчиён вобаста ба масъалаҳои баррасишуда ибрози андеша намуда, аҳаммияти омӯзиш ва татбиқи ҳамаҷонибаи нуктаҳои Паёми Президенти Ҷумҳурии Тоҷикистонро барои рушди соҳаи маориф, таҳкими давлатдории миллӣ ва баланд бардоштани сатҳи маърифати сиёсӣ-ҳуқуқии ҷомеа муҳим арзёбӣ карданд.
Зикр гардид, ки хусусияти фарқкунандаи Паёми Пешвои миллат дар он аст, ки он бар пояи таҳлили амиқи илмӣ, омӯзиши таҷрибаи пешрафтаи ҷаҳонӣ ва арзёбии ниёзҳои воқеии ҷомеа таҳия гардида, инсон ва рушди сармояи инсониро ҳамчун меҳвари сиёсати давлатӣ дар бар мегирад.
Дар фарҷом зикр гардид, ки баргузории чунин ҳамоишҳои илмӣ дар самти тавсеаи донишҳои сиёсӣ-ҳуқуқӣ, таҳкими тафаккури стратегӣ ва баланд бардоштани сатҳи саводнокии ҷомеа аҳаммияти хоса дорад.
Хабарҳои дигар
-
ҶАЛАСАИ СИТОДИ ОНЛАЙНӢ БАРГУЗОР ГАРДИД 25 декабри соли ҷорӣ дар Вазорати маориф ва илми Ҷумҳурии Тоҷикистон ҷаласаи ситоди онлайнӣ оид ба таъмини муассисаҳои таҳсилоти миёнаи умумӣ ба омӯзгорон баргузор гардид. Ҷаласа таҳти раёсати муовини вазири маориф ва илм Равшан Каримзода баргузор гардида, дар кори он роҳбарон ва намояндагони раёсату шуъбаҳо ва муассисаҳои тобеъ, сардорони раёсату шуъбаҳои маорифи вилоят ва шаҳру ноҳияҳои ҷумҳурӣ тариқӣ ҳузурӣ ва маҷозӣ ширкат варзиданд. Ҷаласаро муовини вазири маориф ва илм ифтитоҳ намуда, ҳозиринро бо рӯзномаи ҷаласа шинос намуд. Зимни баромад таъкид гардид, ки сиёсати хирадмандона ва маорифпарваронаи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба рушди устувори соҳаи маориф, баланд бардоштани сатҳу сифати таълим ва фароҳам овардани шароити мусоиди таҳсил дар тамоми зинаҳои низоми маориф равона гардида, имрӯз ҳамчун заминаи асосии пешрафти ҷомеа хизмат мекунад. Татбиқи пайгиронаи ин сиёсат бояд вазифаи ҷонӣ ва пурмасъули ҳар як корманди соҳаи маориф ҳисоб равад. Дар ҷараёни ҷаласа ҳисоботҳои солонаи иҷрокунандаи вазифаи сардори раёсати маорифи шаҳри Исфара Ф. Умарзода ва мудири маорифи ноҳияи Бобоҷон Ғафуров М. Абдуллозода шунида шуд. Дар ҳисоботҳо вазъи умумии соҳаи маориф, дастовардҳо дар соли ҷорӣ, татбиқи барномаҳои давлатӣ, ҷараёни иҷрои нақшаҳои таълимӣ, масъалаҳои таъминоти кадрӣ, инчунин мушкилоти мавҷуда ва роҳҳои ҳалли онҳо мавриди таҳлилу баррасӣ қарор гирифтанд. Ҳамзамон, оид ба масъалаҳои вобаста ба ҳифзи ҳуқуқу манфиатҳои кӯдак баромади муовини сардори раёсати ҳифзи ҳуқуқи кӯдак М. Давлатзода шунида шуда, зимни он масъалаҳои таъмини ҳуқуқҳои кӯдакон ба таҳсил, пешгирии ҳуқуқвайронкунӣ миёни ноболиғон, таҳкими ҳамкории муассисаҳои таълимӣ бо сохторҳои дахлдор ва баланд бардоштани сатҳи маърифати ҳуқуқии хонандагон мавриди таваҷҷуҳ қарор дода шуд. Дар қисмати муҳокимаҳо муовини вазири маориф ва илм ба маърӯзачиён вобаста ба масъалаҳои баррасишуда саволу пешниҳодҳо ироа намуда, ҷиҳати ислоҳи камбудиҳои ҷойдошта, таҳкими назорат аз раванди таълим ва таъмини иҷрои босифати вазифаҳои хизматӣ дастуру супоришҳои мушаххас дод. Дар фарҷоми ҷаласа таъкид гардид, ки иҷрои қатъии дастуру супоришҳои роҳбарияти соҳа, истифодаи самараноки имкониятҳои мавҷуда, таҳкими ҳамоҳангӣ миёни сохторҳои соҳаи маориф дар иҷрои вазифаҳо бояд дар меҳвари фаъолияти минбаъдаи ҳамаи масъулин қарор гирад.
16
26.12.2025 -
БАРРАСИИ ГУСТАРИШИ ҲАМКОРИҲО ДАР ВОХӮРӢ БО САФИРИ ҶУМҲУРИИ КОРЕЯ Дар Вазорати маориф ва илми Ҷумҳурии Тоҷикистон вохӯрии роҳбарияти Маркази таҳия, нашр ва муомилоти китобҳои дарсӣ, илмию методии Вазорати маориф ва илм бо Сафири Ҷумҳурии Корея дар Ҷумҳурии Тоҷикистон ҷаноби Ҷон Сонг Шик баргузор гардид. Зимни мулоқот директори Марказ Умед Ҳасанзода барои таваҷҷуҳ ва дастгирии пайвастаи ҷониби Корея дар самти рушди ҳамкориҳо дар соҳаҳои маориф ва илм изҳори сипос намуда, таъкид намуд, ки ҳамкориҳои Тоҷикистону Корея дар заминаи созишномаҳои байниҳукуматӣ ва фаъолияти Комиссияи муштараки байниҳукуматӣ ба роҳ монда шуда, сол ба сол густариш меёбанд. Дар идома зикр гардид, ки солҳои охир таваҷҷуҳ ба омӯзиши забон ва фарҳанги Корея дар Ҷумҳурии Тоҷикистон афзоиш ёфта, айни ҳол дар назди 8 муассисаи таҳсилоти олии касбӣ марказҳо ва ихтисосҳои забони кореягӣ фаъолият менамоянд. Ҳамчунин, миёни муассисаҳои таҳсилоти олии ду кишвар санадҳои ҳамкорӣ ба имзо расида, дар доираи онҳо табодули устодону донишҷӯён, татбиқи лоиҳаҳои муштарак ва баргузории чорабиниҳои илмию фарҳангӣ амалӣ гардида истодаанд. Директори Марказ ҳамчунин аз ҳамкориҳои самарабахш дар самти таҳияи китобҳои дарсӣ ёдовар шуда, иброз дошт, ки бо ташаббуси ҷониби Корея дар солҳои гузашта як қатор мутахассисон ва муаллифони китобҳои дарсӣ ба Ҷумҳурии Корея сафар намуда, барои такмили муҳтавои китобҳои таълимӣ, бахусус мавзуъҳои марбут ба таърих ва фарҳанги он кишвар, маводи арзишманд ҷамъоварӣ намудаанд. Дар навбати худ, Сафири Ҷумҳурии Корея сатҳи кунунии ҳамкориҳо дар соҳаи маорифи ду кишварро баланд арзёбӣ намуда, омодагии ҷониби Кореяро ҷиҳати идомаи ҳамкорӣ дар самти такмили муҳтавои китобҳои дарсӣ, табодули таҷриба, инчунин рушди равандҳои рақамикунонӣ ва электроникунонии маводи таълимӣ изҳор дошта, таъкид намуд, ки Ҷумҳурии Корея омода аст, таҷрибаи пешрафтаи худро дар самти таҳия ва нашри китобҳои дарсӣ бо ҷониби Тоҷикистон ҳамкориро боз ҳам бештар намояд. Дар фарҷоми вохӯрӣ ҷонибҳо таъкид карданд, ки чунин мулоқотҳо ба таҳкими ҳамкориҳои минбаъда дар соҳаи маориф ва илм мусоидат намуда, барои баланд бардоштани сатҳ ва сифати китобҳои дарсӣ ва маводи таълимӣ заминаи мусоид фароҳам меоранд.
64
24.12.2025 -
БАРГУЗОРИИ ҶАЛАСАИ НАЗОРАТИИ НАЗДИ ВАЗИРИ МАОРИФ ВА ИЛМ ДАР МОҲИ ДЕКАБР 23 декабри соли 2025 дар Вазорати маориф ва илми Ҷумҳурии Тоҷикистон таҳти раёсати вазири маориф ва илм Раҳим Саидзода ҷаласаи назоратии навбатӣ баргузор гардид. Дар кори ҷаласа муовинони вазир, сардорони раёсату шуъбаҳои дастгоҳи марказии вазорат, роҳбарони муассисаҳои тобеъ, намояндагони Сарраёсати маорифи шаҳри Душанбе, раёсатҳои маорифи вилоятҳои Суғду Хатлон ва мудирони шуъбаҳои маорифи шаҳру ноҳияҳои кишвар ба таври ҳузурӣ ва маҷозӣ иштирок намуданд. Нахуст, вазир ҳозиринро бо рӯзномаи ҷаласа шинос карда, аз таваҷҷуҳи доимӣ ва ғамхории пайвастаи Ҳукумати Ҷумҳурии Тоҷикистон таҳти роҳбарии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон нисбат ба соҳаи маориф ёдовар шуд. Таъкид шуд, ки рушди устувори низоми таълиму тарбия аз омилҳои асосии пешрафти ҷомеа мебошад ва кормандони соҳаи маориф вазифадоранд, ки дар ин самт пайваста талош намоянд. Сипас, ҳисоботи сардори раёсати таҳсилоти миёнаи умумии Вазорати маориф ва илм Ш. Асомиддинзода оид ба вазъи таълиму тарбия, ҳуҷҷатдорӣ ва татбиқи барномаҳои давлатӣ дар муассисаҳои таҳсилоти умумии хусусии шаҳру ноҳияҳои вилояти Суғд шунида шуд. Ҳамчунин, ректори Донишкадаи ҷумҳуриявии такмили ихтисос ва бозомӯзии кормандони соҳаи маориф Н. Мирзозода дар бораи таҳия ва озмоиши барномаҳои таълимии курсҳои такмили ихтисос ҳисобот дод. Дар ҷараёни ҷаласа вазир масъалаҳои таҳкими пояи кадрӣ, омода намудани мутахассисони педагогӣ бо забонҳои русӣ ва англисӣ, ҷалби омӯзгорони ҷавон, ҷиҳати таҳсилоти дуюм фаро гирифтани омӯзгорони ғайриихтисоси фаннӣ, танзими нигоҳдории ҳуҷҷатҳои омӯзгорони хориҷӣ, беҳтар намудани ҳолати ҳуҷҷатдорӣ дар муассисаҳои таълимӣ ва мувофиқи талаботи Низомномаи намунавии муассисаҳои таҳсилоти умумӣ ба роҳ мондани ҷараёни таълиму тарбияро мавриди баррасӣ қарор дод. Инчунин, ҷиҳати ҷалби хонандагон барои иштирок дар даври ҷумҳуриявии озмунҳои «Фурӯғи субҳи доноӣ китоб аст», «Илм - фурӯғи маърифат» ва «Тоҷикистон - Ватани азизи ман», мутобиқ намудани оинномаҳои муассисаҳои таълимӣ ба тағйиру иловаҳои Қонуни Ҷумҳурии Тоҷикистон «Дар бораи маориф» ва дигар масъалаҳои марбут ба раванди таълим дастуру супоришҳои мушаххас дода шуд. Дар идомаи ҷаласа масъалаҳои марбут ба рушди касбии омӯзгорон мавриди баррасӣ қарор гирифта, таъкид гардид, ки таҳияи барномаҳои таълимии инноватсионии курсҳои такмили ихтисос, баланд бардоштани сатҳ ва сифати омӯзиш, азхудкунии самараноки барномаҳои муосир, истифодаи мақсадноки технологияҳои таълимии нав ва тақвияти ҳамкориҳо бо муассисаҳои байналмилалӣ аз самтҳои муҳимми фаъолияти соҳа мебошанд. Зимнан, ҳангоми таҳияи барномаҳои нави таълимӣ мутобиқсозии муҳтаво бо китобҳои дарсӣ, ворид намудани мавзуъҳои фарогир ва таъмини дастгирии амалӣ барои омӯзгорон зарур шуморида шуда, масъулин вазифадор гардиданд, ки ҷиҳати баланд бардоштани маҳорати касбии омӯзгорон тадбирҳои иловагии муассирро амалӣ намоянд. Дар қисмати ҷамъбастӣ раиси ҷаласа таъкид намуд, ки барои таъмин намудани рушди устувори низоми маориф, баланд бардоштани сатҳу сифати таълим, татбиқи самараноки барномаҳои таълимӣ, таҳкими фаъолияти илмӣ-тадқиқотӣ дар муассисаҳои таҳсилоти олӣ, ҷалби мутахассисони баландихтисос, истифодаи дурусти имкониятҳои мавҷуда ва густариши ҳамкориҳо бо шарикони рушд, ҳар як сохтору зерсохтори марбута бояд бо масъулияти баланд фаъолияти худро ба роҳ монад.
99
23.12.2025
