04.05.2026
4 майи соли 2026 мудири шуъбаи маорифи ноҳияи Исмоили Сомонӣ Ҷ. Маҷидзода бо мақсади назорати раванди таълиму тарбия ва шиносоӣ бо шароити таҳсил ба як қатор муассисаҳои таълимии ғайридавлатӣ ва муассисаҳои таълимии назди идораву ташкилотҳо ташрифи корӣ анҷом доданд.
Зимни боздид аз Муассисаи таълимии ғайридавлатии Мактаби байналмилалии «Қалам» ба фаъолияти он баҳои баланд дода шуд. Қайд гардид, ки муассисаи мазкур ба талаботи байналмилалӣ ҷавобгӯ буда, аз ҷалби мутахассисони хориҷӣ васеъ истифода менамояд. Шароити таълим дар муассиса дар сатҳи баланд ба роҳ монда шуда, барои рушди ҳамаҷонибаи хонандагон имкониятҳои муосир фароҳам оварда шудаанд. Дар назди муассиса гурӯҳҳои барвақтии кӯдакон фаъолият дошта, дар онҳо кӯдакони синни аз 3 то 7 сола ба таълиму тарбия фаро гирифта шудаанд. Дарсҳо ва машғулиятҳо тибқи барномаҳои таълимии ватанӣ ва хориҷӣ ташкил гардида, забони таълим асосан бо забони англисӣ сурат мегирад. Инчунин муассиса бо толорҳои варзишӣ ва мусиқӣ таъмин буда, барои рушди ҷисмонӣ ва зеҳнии кӯдакон шароити мусоид муҳайё шудааст.
Ҳамзамон, мудири шуъбаи маориф ба Муассисаи таълимии давлатии «Литсейи №1 барои хонандагони болаёқати шаҳри Душанбе» ба номи Ниёз Сафар ва Муассисаи таълимии давлатии «Литсейи назди Донишгоҳи давлатии омӯзгории Тоҷикистон ба номи Садриддин Айнӣ» ташриф оварда, аз раванди таълиму тарбия дар синфҳои ибтидоӣ ва хатмкунандагон шиносоӣ пайдо намуданд.
Дар рафти мулоқот бо хонандагони синфҳои хатмкунанда, масъалаҳои муҳими соҳа, аз ҷумла натиҷаи бақайдгирӣ дар нуқтаҳои Маркази миллии тестии назди Президенти Ҷумҳурии Тоҷикистон, интихоби дурусти касб, омодагӣ ба аттестатсияи хатм, риояи одоби хонандагон, сару либоси мактабӣ, инчунин эҳтиром ба омӯзгорон, падару модарон ва калонсолон мавриди баррасӣ қарор гирифтанд.
Таъкид гардид, ки баланд бардоштани сифати таълиму тарбия ва таъмини муҳити мусоиди таҳсил аз самтҳои афзалиятноки фаъолияти шуъбаи маориф ба ҳисоб рафта, дар ин раванд ба фаъолияти муассисаҳои таълимии ғайридавлатӣ ва назди идораву ташкилотҳо низ таваҷҷуҳи махсус зоҳир карда мешавад.
Хабарҳои дигар
-
БАРГУЗОРИИ ҶАЛАСАИ ОНЛАЙНИИ СИТОДИ КОРИИ ВАЗОРАТИ МАОРИФ ВА ИЛМ 6 майи соли ҷорӣ ҷаласаи онлайнии ситод оид ба масъалаҳои мубрами соҳаи маориф таҳти роҳбарии муовини вазири маориф ва илми Ҷумҳурии Тоҷикистон Равшан Каримзода баргузор гардид. Дар ҷаласа сардорону мудирони раёсату шуъбаҳои маорифи вилоятҳо, шаҳру ноҳияҳои ҷумҳурӣ, роҳбарону мутахассисони сохторҳои марбутаи Вазорати маориф ва илм, инчунин масъулини муассисаҳои таълимӣ ба таври ҳузурӣ ва маҷозӣ иштирок намуданд. Ҷаласаро муовини вазири маориф ва илм оғоз намуда, ҳозиринро бо рӯзномаи ҷаласа шинос намуд. Зимни баромад таъкид гардид, ки сиёсати хирадмандона ва маорифпарваронаи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба рушди устувори соҳаи маориф, баланд бардоштани сатҳу сифати таълим ва фароҳам овардани шароити мусоиди таҳсил дар тамоми зинаҳои низоми маориф равона гардида, имрӯз ҳамчун заминаи асосии пешрафти ҷомеа хизмат мекунад. Татбиқи пайгиронаи сиёсати мазкур бояд вазифаи ҷонӣ ва пурмасъули ҳар як корманди соҳаи маориф ба ҳисоб равад. Сипас, дар ҷараёни ҷаласа сармутахассиси раёсати иқтисод, банақшагирӣ дар соҳаи маориф ва илми Вазорати маориф ва илм Ш. Дӯстмуродов оид ба тартиби пардохти музди меҳнат, риояи талаботи муқарраргардидаи соҳа ва таъмини иҷрои саривақтии уҳдадориҳои молиявӣ баромад намуд. Ҳамчунин, директори Маркази таълмию методии назди Вазорати маориф ва илми Ҷумҳурии Тоҷикистон Ш. Каримзода оид ба раванди аттестатсияи хонандагон, омодагӣ ба ҷамъбасти соли таҳсил ва таъмини шаффофияти баргузории аттестатсия баромад намуда, ҷиҳати дар сатҳи зарурӣ ба роҳ мондани корҳои ташкиливу методӣ ба масъулин тавсияҳои мушаххас пешниҳод кард. Дар идома, директори Маркази таҳсилоти иловагии назди Вазорати маориф ва илм М. Давлатзода вобаста ба омодагӣ ба фаъолияти истироҳатгоҳҳои тобистона, фарогирии хонандагон ба истироҳату солимгардонӣ ва баргузории озмуни ҷумҳуриявии «Шоҳномахонӣ» суханронӣ намуда, оид ба дар сатҳи баланд баргузор намудани чорабиниҳои мазкур ва ҷалби бештари наврасону ҷавонон ба чорабиниҳои маърифативу фарҳангӣ ибрози назар намуд. Дар ҷараёни муҳокима муовини вазири маориф ва илм ба маърузачиён вобаста ба масъалаҳои баррасишуда саволу пешниҳодҳо ироа намуда, ҷиҳати ислоҳи камбудиҳои ҷойдошта, таҳкими назорат аз раванди таълим, баланд бардоштани масъулиятшиносии роҳбарон ва таъмини иҷрои босифати вазифаҳои хизматӣ дастуру супоришҳои мушаххас дод. Дар фарҷоми ҷаласа таъкид гардид, ки иҷрои қатъии дастуру супоришҳои роҳбарияти соҳа, истифодаи самараноки имкониятҳои мавҷуда, таҳкими ҳамоҳангӣ миёни сохторҳои соҳаи маориф дар иҷрои вазифаҳо бояд дар меҳвари фаъолияти минбаъдаи ҳамаи масъулин қарор дошта бошад. Маркази матбуоти Вазорати маориф ва илми Ҷумҳурии Тоҷикистон
12
06.05.2026 -
ДАВРИ ЯКУМИ ОЗМУНИ ҶУМҲУРИЯВИИ “ДОНАНДАИ БЕҲТАРИНИ АСАРҲОИ ПЕШВОИ МИЛЛАТ” ҶАМЪБАСТ ГАРДИД Дар Академияи идоракунии давлатии назди Президенти Ҷумҳурии Тоҷикистон даври якуми озмуни ҷумҳуриявии “Донандаи беҳтарини асарҳои Пешвои миллат” барои соли 2026 баргузор гардид. Ҳадафи озмун, мутолиаи асарҳои Пешвои миллат мебошад. Озмуни мазкур имкон медиҳад, ки ҳар як фарди худогоҳи миллӣ тавассути мавҷудияти хеш гузаштаро бо оянда пайванд созад. Мавриди зикр аст, ки ҳар як асари Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон насли имрӯзу фардоро дар рӯҳияи меҳанпарастӣ, худшиносӣ, ҳувияти миллӣ, ташаккули худшиносиву худогоҳии миллӣ тарбият менамояд. Махсусан, асарҳои таърихии Пешвои миллат оид ба таърихи тамаддун, забон ва шахсиятҳои мондагори таърихӣ дар тарбияи насли наврасу ҷавонон нақши басо бузургу шоиста мегузоранд. Ҳамин тариқ, дар асоси хулосаи ҳайати комиссия иштирокдорон ба ҷойҳои зерин сазовор дорниста шуда, ба даври дуюми озмун роҳхат гирифтанд: Маҳмадализода Хайрандеш Диловар - донишҷӯйи курси 1-уми факултети ҳуқуқшиносӣ (ҷойи якум); Миралиён Шаҳло - магистранти “Мактаби давлатдории Эмомалӣ Раҳмон” (ҷойи дуюм); Ҷураева Зебонисо - донишҷӯйи курси 1-уми факултети ҳуқуқшиносӣ (ҷойи сеюм).
40
06.05.2026 -
ШОҲМАНСУР: БАРГУЗОРИИ ДАВРИ НОҲИЯВИИ ОЗМУНИ ҶУМҲУРИЯВИИ «ОМӮЗГОРИ СОЛИ ТОҶИКИСТОН – 2026» Имрӯз, 6 майи соли 2026 дар ноҳияи Шоҳмансури шаҳри Душанбе даври ноҳиявии озмуни ҷумҳуриявии “Омӯзгори соли Тоҷикистон – 2026” дар Муассисаи таҳсилоти миёнаи умумии №23 баргузор гардид. Дар озмун довталабон аз муассисаҳои таълимии ҳудуди ноҳия фаъолона иштирок намуда, маҳорати баланди касбӣ, сатҳи дониш, малакаи педагогӣ ва эҷодкории худро муаррифӣ намуданнд. Иштирокчиён бо дарсҳои намунавӣ, баромадҳои методӣ ва пешниҳоди таҷрибаи пешқадам сазовори баҳои баланд гардиданд. Бо мақсади таъмини шаффофият ва баҳогузории одилона, ҳайати доварони озмун аз ҳисоби омӯзгорони ботаҷриба, роҳбарони муассисаҳои таълимӣ ва дигар мутахассисони соҳаи маориф таъсис дода шуд. Ҳамзамон, барои ташкили сатҳи баланди чорабинӣ кумитаи тадорукот фаъолият бурда, ҷараёни озмунро мувофиқи талаботи муқарраргардида ба роҳ монд. Дар рафти чорабинӣ инчунин намояндагони иттифоқи касабаи кормандони соҳаи маорифи ноҳия иштирок доштанд, ки саҳми онҳо дар ташкили чорабинӣ назаррас арзёбӣ мегардад. Даври ноҳиявии Озмун бо сухани ифтитоҳии муовини раиси ноҳияи Шоҳмансур З. Зуҳурзода оғоз гардида, зимни баромади худ ӯ аҳамияти баланд бардоштани мақому манзалати омӯзгор, рушди малакаҳои касбӣ ва дарёфти истеъдодҳои навро таъкид намуд. Бояд қайд намуд, ки баргузории чунин озмунҳо дар баланд бардоштани сатҳи касбияти омӯзгорон, рушди методикаи таълим ва табодули таҷрибаи пешқадам нақши муҳим дошта, барои пешрафти соҳаи маориф мусоидат менамояд.
33
06.05.2026
