05.12.2025
Санаи 4 декабри соли ҷорӣ дар доираи дастуру ҳидоятҳои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва эълон гардидани «Солҳои 2025-2030 солҳои рушди иқтисоди рақамӣ ва инноватсия» бо ибтикори Маркази ҷумҳуриявии муассисаҳои таҳсилоти иловагии Вазорати маориф ва илми Ҷумҳурии Тоҷикистон маросими ҷамъбастии Озмуни ҷумҳуриявии «Ихтироъкори наврас» миёни хонандагони муассисаҳои таҳсилоти миёнаи умумӣ ва аъзоёни маҳфилҳои муассисаҳои таҳсилоти иловагӣ баргузор гардид.
Чорабинӣ бо иштироки директори Маркази ҷумҳуриявии муассисаҳои таҳсилоти иловагӣ, масъулини сохторҳои марбута, омӯзгорон ва иштирокчиён аз Вилояти Мухтори Кӯҳистони Бадахшон, вилоятҳои Суғду Хатлон, шаҳри Душанбе ва шаҳру ноҳияҳои тобеи ҷумҳурӣ доир гардид.
Озмуни мазкур бо мақсади ҷалби хонандагон ба фаъолияти эҷодию ихтироъкорӣ, таҳкими тафаккури техникиву инноватсионӣ ва мусоидат ба рушди малакаҳои муҳандисиву навоварӣ ҳамасола аз тарафи Маркази ҷумҳуриявии муассисаҳои таҳсилоти иловагии Вазорати маориф ва илми Ҷумҳурии Тоҷикистон баргузор мегардад. Дар марҳилаҳои имсолаи озмун шумораи иштирокчиён назаррас буда, хонандагон аз ҳамаи шаҳру ноҳияҳои ҷумҳурӣ дар давраҳои муассисавӣ, ноҳиявӣ, шаҳрӣ ва вилоятӣ фаъолона ширкат варзиданд.
Беҳтарин лоиҳаҳо ба даври ҷумҳуриявӣ роҳ ёфтанд.
Дар марҳалаи ҷамъбастӣ иштирокчиён лоиҳаҳои эҷодӣ ва корҳои техникии худро, аз ҷумла дар самтҳои робототехника, технологияҳои иттилоотӣ, энергетикаи барқароршаванда, муҳандисӣ, кишоварзӣ, ҳифзи муҳити зист, лоиҳаҳои хусусияти иҷтимоӣ дошта ва дигар бахшҳои соҳавӣ пешниҳод намуданд.
Тибқи баҳогузории ҳайати ҳакамон, аксари лоиҳаҳои пешниҳодшуда дорои аҳамияти амалӣ буда, имкони татбиқи минбаъдаро дар муассисаҳо ва сохторҳои истеҳсолӣ доро мебошанд.
Директори Маркази ҷумхуриявии муассисаҳои таҳсилоти иловагӣ дар суханронии худ зикр намуданд, ки рушди тафаккури илмӣ ва эҷодӣ дар миёни хонандагон аз ҳадафҳои муҳимми соҳаи маориф ба шумор рафта, озмуни «Ихтироъкори наврас» минбаре барои ошкор ва ҳавасмандсозии наврасону ҷавонони боистеъдод мебошад.
Таъкид карда шуд, ки дар заминаи дастуру ҳидоятҳои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон оид ба афзалияти рушди илм ва техника, Вазорати маориф ва илми Ҷумҳурии Тоҷикистон минбаъд низ барои дастгирии иқтидори зеҳнии наврасон тадбирҳои заруриро амалӣ хоҳад кард.
Дар анҷоми чорабинӣ ғолибон ва иштирокчиёни фаъол аз тарафи Маркази ҷумҳуриявии муассисаҳои таҳсилоти иловагии Вазорати маориф ва илми Ҷумҳурии Тоҷикистон бо ифтихорномаҳо, сипосномаҳо ва туҳфаҳои хотиравӣ қадрдонӣ шуданд.
Хабарҳои дигар
-
ТАМАННИЁТИ ВАЗИРИ МАОРИФ ВА ИЛМИ ҶУМҲУРИИ ТОҶИКИСТОН БА ҒОЛИБОНИ ОЗМУНИ ҶУМҲУРИЯВИИ «ФУРӮҒИ СУБҲИ ДОНОӢ КИТОБ АСТ» Муҳтарам ғолибон, иштирокчиёни даври ҷумҳуриявӣ, устодон ва падару модарони азиз! Озмуни ҷумҳуриявии «Фурӯғи субҳи доноӣ китоб аст», ки бо ташаббус ва ибтикори хирадмандонаи Асосгузори сулҳу ваҳдати миллӣ – Пешвои миллат, Президенти кишвар муҳтарам Эмомалӣ Раҳмон эълон гардидааст, инак соли ҳафтум бо ҳамон муҳаббату самимияте, ки дӯстдорони китобро аз тамоми гӯшаву канори ҷумҳурӣ ҷамъ оварда буд, ба даври ниҳоии худ расид. Бо камоли сарфарозӣ ва эҳтироми баланд ҳамаи шумоёнро, ки дар дар “Фурӯғи субҳи доноӣ китоб аст” қадамҳои устувор гузоштед ва ғолибияти бузургро ба даст овардед, самимона табрик менамоям. Ин озмун нишони бедории фикрӣ ва ойинаи равшани сатҳи маърифати насли соҳибистеъдоди кишвар мебошад. Дастовардҳои шумо, хоҳ ғолиб бошед ё иштирокчии даври ҷумҳуриявӣ, шаҳодати равшан аз ҷустуҷӯ, заҳмат, покизагии ният, китобдӯстӣ ва ҷаҳонбинии васеъест, ки имрӯз барои рушди давлату миллат арзиши бебаҳо дорад. Ба ҳар яки шумо, ҳамчун чеҳраҳои умедофар ва поягузорони фардои илму маорифи кишвар, бо дилгармӣ ва самимияти хос табрик гуфта, барои кӯшиши ғайрат, меҳнату заҳмати шабонарӯзӣ ва ҳаракати ҳамешагӣ дар роҳи донишандӯзӣ изҳори сипос менамоям. Имрӯз, ки ҷаҳони муосир ба дониш, технология ва эҷодкорӣ такя мекунад, баргузории чунин озмунҳо барои рушди неруи зеҳнии насли наврас, болоравии сатҳи маърифат ва таҳкими пояҳои маориф аҳаммияти азим доранд. Шумо, ғолибон, бо маҳорати худ нишон додед, ки дар роҳи илму маърифат босалоҳият ҳастед ва ин дастовард ифтихори тамоми ҷомеа мебошад. Ба ин муносибат, мехоҳам аз ҳамаи иштирокчиёни дигаре, ки ба даври ҷумҳуриявӣ роҳ ёфтанд, вале соҳиби ҷойҳои ифтихорӣ нагардиданд, махсус изҳори қадрдонӣ ва миннатдорӣ намоям. Роҳ ёфтан ба ин марҳалаи баланди озмун худ шаҳодати истеъдод, заҳмат, китобдӯстӣ ва ҷаҳонбинии васеи шумост. Бовар дорам, ки иштироки шумо дар ин озмун ҷараёни рушд, такмили малакаҳои суханварӣ, хондан, таҳлил ва фикрронии мустақилиятатонро боз ҳам пурқувваттар мегардонад. Ҳар яки аз шумо неруи муҳим барои ояндаи илму маориф ҳастед ва натиҷаҳои имрӯза оғози дастовардҳои бузургтар дар роҳи зиндагӣ хоҳад буд. Боиси зикр аст, ки ташаббусу ғамхории Пешвои муаззами миллат муҳтарам Эмомалӣ Раҳмон, ба ин озмун барои ҳар як иштирокчӣ ва устодону аҳли оилааҳояшон ва дар маҷмуъ барои тамоми намояндагони соҳаи илму маорифи кишвар руҳ ва неруи тоза мебахшад. Дастгирӣ ва таваҷҷуҳи ҳамешагии Роҳбари давлат нисбат ба китобу китобхонӣ, илмомӯзӣ ва донишандӯзӣ барои тамоми ҷомеа, хусусан ҷавонон, илҳомбахш мебошад. Маҳз ҳамин сиёсати фарҳангсолор ва маърифатпарваронаи Пешвои миллат муҳтарам Эмомалӣ Раҳмон имкон дод, ки «Фурӯғи субҳи доноӣ китоб аст» дар саросари кишвар ба як нуқтаи муттаҳидкунандаи зеҳн, маҳорат, эҷод ва худогоҳии миллӣ табдил ёбад. Изҳори миннатдорӣ ба падару модарон, омӯзгорон ва муассисаҳои таълимие, ки дар ин роҳ шогирдони худро дастгирӣ намуданд, иброз менамоям. Имрӯз ҳарчанд бо сабаби дар сафари корӣ будан ва дар имконияти табрикоти мустақими шуморо надоштан, руҳан бо ҳамаи ғолибон якҷоя ҳастам ва ин ғолибияти бузургро, ки зиндагии якояки шуморо рангин менамояд, бори дигар табрик мегӯям. Боварӣ дорам, ки муваффақиятҳои имрӯза танҳо оғози сафари пурбори шумо дар роҳи илму маърифат хоҳад буд ва ҳар як иштирокчӣ минбаъд низ парчами китобу донишро баланд бардошта, ба пешрафти ҷомеа саҳм мегузорад. Ҳамзамон, изҳори сипосу миннатдории хос аз ҳайати меҳнатдӯсту одилонаи ҳакамон менамоям, ки бо масъулияти баланд раванди баҳогузориро дар тамоми марҳалаҳои озмун таъмин намуданд. Заҳмати шабонарӯзӣ, диққату дақиқандешӣ ва муносибати касбии онҳо барои баргузории шаффофу одилонаи озмуни «Фурӯғи субҳи доноӣ китоб аст» нақши муҳим бозида, ба ҳар як иштирокчӣ имкон дод, ки дониш, маҳорати суханварӣ ва ҷаҳонбинии худро дар сатҳи баланд муаррифӣ намояд. Бо таманниёти нек, ба ҳамаи шумо ғолибон, иштирокчиёни даври ҷумҳуриявӣ, устодон ва падару модарони азизу арҷманд илҳоми тоза, пешрафт, ҷустуҷӯи доимӣ дар ҷодаи илму дониш ва дастовардҳои навро орзу мекунам. Бо эҳтиром, вазири маориф ва илми Ҷумҳурии Тоҷикистон Раҳим Саидзода Брюссел, Белгия 4 декабри соли 2025
50
04.12.2025 -
МАРОСИМИ ҶОИЗАСУПОРИИ ОЗМУНИ ҶУМҲУРИЯВИИ «ФУРӮҒИ СУБҲИ ДОНОӢ КИТОБ АСТ» 4 декабри соли 2025 дар Театри давлатии академии опера ва балети ба номи Садриддин Айнӣ маросими тантанавии ҷамъбасти Озмуни ҷумҳуриявии «Фурӯғи субҳи доноӣ китоб аст» дар соли 2025 баргузор гардид. Соли 2025 дар даври ниҳоии озмун 434 нафар ширкат варзиданд, ки миёни онҳо 2 нафар тоҷикони бурунмарзӣ низ ҳузур дошта, ба таври маҷозӣ ба саволҳои ҳакамон посух доданд. Аз миёни иштирокчиён 94 нафар унвони ғолибро соҳиб шуданд ва 4 нафар ба Шоҳҷоиза ноил гаштанд. Мукофотпулиҳои озмун низ имсол афзоиш ёфтанд: барои ҷойи сеюм 40 ҳазор сомонӣ, ҷойи дуюм 50 ҳазор сомонӣ, ҷойи якум 70 ҳазор сомонӣ ва барои Шоҳҷоиза 140 ҳазор сомонӣ. Зимни ифтитоҳи маросими ҷоизасупорӣ муовини Сарвазири Ҷумҳурии Тоҷикистон, раиси Комиссияи Озмуни ҷумҳуриявии «Фурӯғи субҳи доноӣ китоб аст» Дилрабо Мансурӣ иброз дошт, ки дар ҳақиқат довталабон китобҳои зиёди бадеиро мутолиа намуда, ҳазорон байтҳоро аз худ кардаанд, ки аз шунидани баромади онҳо дилҳо лабрези шодӣ ва фараҳ гардиданд. Тавре Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон борҳо таъкид намудаанд, роҳи наҷот аз ҷаҳолат, хурофотпарастӣ, ифротгароӣ ва дода нашудан ба ҳама гуна идеологияҳои дурӯғину фитнаангез – китобхонӣ, бофарҳангӣ, зиракии сиёсӣ ва донистани таъриху маданияти халқи худ мебошад. «Бо таъкид изҳор медорем, ки омӯзгорон, зиёиён ва падару модарон бояд бештар китобҳои бадеӣ мутолиа намоянд, тарғибгарони китобу дониш бошанд, ҷомеаро аз ҷаҳолату нодонӣ огоҳ созанд ва барои фардои дурахшони насли наврас роҳнамо гарданд», -изҳор намуд муовини Сарвазири кишвар. Имсол зиёд гардидани маблағҳои ҷоизаҳои ғолибони озмун аз ҷониби Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон барои боз ҳам вусъат ёфтани раванди китобдӯстиву китобхонӣ ва фароҳам омадани шароити мусоиди эҷодкорӣ байни насли наврас ва дигар қишрҳои ҷомеа замина гузошт. Ба таъкиди Дилрабо Мансурӣ, иҷрои Амри Президенти Ҷумҳурии Тоҷикистон аз ҷониби тамоми қишрҳои ҷомеа муҳаббат ва самимияти мардуми мамлакатро ба дастуру ҳидоятҳои Пешвои миллат ифода намуда, эҳёи рисолати аҷдодии китобдӯстиву китобхониро таъмин кард. Хусусан, хонандагони муассисаҳои таҳсилоти умумӣ бо шавқу завқ ва муҳаббат ба китоб рӯй меоранд, ки ин падидаи нек сазовори дастгирӣ аст. Озмуни ҷумҳуриявии «Фурӯғи субҳи доноӣ китоб аст» аз соли 2019 таҳти сарпарастии Пешвои миллат муҳтарам Эмомалӣ Раҳмон баргузор гардида, дар ин муддат ба як ҳаракати бузурги маърифатӣ табдил ёфтааст. Дар солҳои 2019–2024 дар озмун 1 153 616 нафар иштирок намудааст, ки аз онҳо 67 дарсад занону духтарон мебошанд. Имсол низ таваҷҷуҳи хоса ба китобхонӣ махсусан дар байни кӯдакон ва наврасон эҳсос мегардад: 57 нафар ғолиби наврас ва 3 гирандаи Шоҳҷоиза аз муассисаҳои таҳсилоти умумӣ шаҳодати равшани ин гуфтаҳост. Маросими ҷамъбасти озмун нишон дод, ки китоб ва дониш дар миёни қишрҳои мухталифи ҷомеа мавқеи хоса пайдо мекунад. Бо ҳидоятҳои Пешвои миллат ва талошҳои мақомоти давлатӣ, ин озмун минбаъд низ ҳамчун як иқдоми бузурги маърифатӣ барои рушди зеҳнӣ, худогоҳӣ ва истеъдодҳои насли ҷавон идома хоҳад ёфт. Маркази матбуоти Вазорати маориф ва илми Ҷумҳурии Тоҷикистон
76
04.12.2025 -
ҒОЛИБОНИ ШОҲҶОИЗАҲОИ ОЗМУНИ ҶУМҲУРИЯВИИ “ФУРӮҒИ СУБҲИ ДОНОӢ КИТОБ АСТ” ДАР СОЛИ 2025 Имрӯз, 4 декабри соли 2025 дар Театри давлатии академии опера ва балети ба номи Садриддин Айнӣ маросими ҷоизасупорӣ ба ғолибони Озмуни ҷумҳуриявии “Фурӯғи субҳи доноӣ китоб аст” баргузор шуд, ки дар он 4 нафар довталабон сазовори Шоҳҷоизаи озмун гардиданд. Дар натиҷа, Табассуми Ҷиёнхон, хонандаи синфи 10-и Муассисаи таҳсилоти миёнаи умумии №3-и ноҳияи Муъминобод сазовори Шоҳҷоиза аз номинатсияи адабиёти кӯдакону наврасон ва осори шифоҳӣ, Раҳимов Анушервон, донишҷӯйи курси 2-и Донишгоҳи давлатии Данғара сазовори Шоҳҷоиза аз номинатсияи адабиёти классикии тоҷик, Шарифова Умеда, хонандаи синфи 4-и Муассисаи таҳсилоти миёнаи умумии №4-и ноҳияи Мастчоҳ сазовори Шоҳҷоизаи аз номинатсияи адабиёти муосири тоҷик ва Холиқова Фариса, хонандаи синфи 10-и Муассисаи таҳсилоти миёнаи умумии №50-и ноҳияи Рӯдакӣ сазовори Шоҳҷоиза аз номинатсияи адабиёти ҷаҳон гардиданд. Маркази матбуоти Вазорати маориф ва илми Ҷумҳурии Тоҷикистон
78
04.12.2025
