26.08.2025
Дар муассисаи таҳсилоти миёнаи умумии №15-и шаҳри Душанбе семинари миллӣ оид ба ташкил ва идораи ғизои мактабӣ баргузор гардид.
Дар семинар Музаффарзода Бадриддин, муовини вазири маориф ва илми Ҷумҳурии Тоҷикистон, Мария Светкова, намояндаи Барномаи озуқавории ҷаҳонии СММ (БОҶ), масъулини шуъбаҳои маориф ва директорони муассисаҳои пилотии таълимӣ аз шаҳри Душанбе ва дигар шаҳру ноҳияҳои тобеи ҷумҳурӣ иштирок намуданд.
Дар рафти семинар гуфта шуд, ки аз соли 2023 бо дастгирии БОҶ дар назди Вазорати маориф ва илми Ҷумҳурии Тоҷикистон бахши ғизои мактабӣ фаъолият мекунад, ки татбиқи барномаҳои марбут ба ғизои мактабиро назорат ва ҳамоҳанг месозад. Бахш дар самти рушди захираҳои инсонӣ саҳмгузор буда, барои муассисаҳои пилотӣ ва шуъбаҳои маориф омӯзишҳо ва мониторингҳои мунтазам ташкил менамояд.
Ғизои мактабӣ яке аз омилҳои муҳимми ҳифзи саломатии кӯдакон ва баланд бардоштани самаранокии таълим ба ҳисоб меравад. Ҳукумати Ҷумҳурии Тоҷикистон дар ин самт як қатор санадҳои стратегӣ, аз ҷумла, Консепсияи беҳтар намудани ғизои мактабӣ дар муассисаҳои таҳсилоти умумӣ, Стратегияи рушди устувори ғизои мактабӣ то соли 2027 ва Барномаи давлатии рушди ғизои мактабӣ барои солҳои 2022-2027-ро қабул намудааст.
Аз соли 2022 маблағгузории буҷетӣ барои ғизои мактабӣ пайваста афзоиш меёбад. Соли 2024 зиёда аз 11,6 миллион сомонӣ барои таъмини 25 ҳазор хонанда дар 55 муассисаи таълимӣ ҷудо гардид, ки зиёда аз 80% он амалӣ шуд.
Барои соли 2025, тибқи Қарори Ҳукумати Ҷумҳурии Тоҷикистон маблағгузорӣ ба 18,8 миллион сомонӣ расид, ки нисбат ба соли гузашта 60% зиёд аст. Соли ҷорӣ зиёда аз 36 ҳазор хонандагони синфҳои ибтидоӣ дар 94 муассисаи таълимӣ, аз ҷумла, 40 муассиса дар вилояти Хатлон, 24 муассиса дар вилояти Суғд, 8 муассиса дар ВМКБ, 15 муассиса дар шаҳру ноҳияҳои тобеи ҷумҳурӣ ва 7 муассиса дар шаҳри Душанбе, ҳамарӯза бо хӯроки гарм таъмин мегарданд.
Иштирокичёни семинар аҳамияти ҳамкории байнисоҳавиро дар рушди устувори ғизои мактабӣ ва таъмини саломатии кӯдакон таъкид намуданд.
Бояд гуфт, силсилаи семинарҳои омӯзишӣ оид ба ташкил ва татбиқи барномаи ғизои мактабӣ дар Вилояти Мухтори Кӯҳистони Бадахшон, вилоятҳои Суғд ва Хатлон низ баргузор гардиданд.
Хабарҳои дигар
-
Иштирок дар чорабинии тантанавӣ дар шаҳри Пекин 3 сентябр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар шаҳри Пекин ҳамроҳ бо Раиси Ҷумҳурии Мардумии Чин муҳтарам Си Ҷинпин ва дигар роҳбарони давлатҳо дар майдони Тянанмэн дар чорабинии тантанавӣ бахшида ба 80-солагии пирӯзии мардуми Чин бар милитаризми Ҷопон ва анҷоми ҷанги дуюми ҷаҳонии зиддифашистӣ иштирок намуданд. Сарвари давлати мо муҳтарам Эмомалӣ Раҳмон ва сарони дигар давлатҳоро дар маҳалли баргузории чорабинӣ Раиси Ҷумҳурии Мардумии Чин муҳтарам Си Ҷинпин самимона истиқбол гирифтанд. Қабл аз иштирок дар гузашти бошукуҳи низомӣ маросими аксбардории хотиравии сарони давлатҳо баргузор гардид. Дар ҷамъомади тантанавӣ сарони кишварҳо ва ҳукуматҳои 26 давлат ширкат варзиданд. Дар тамошогоҳи маҳалли баргузории чорабинӣ як гурӯҳ қаҳрамонону собиқадорони ҷанг низ дар мақоми ифтихорӣ қарор доштанд. Дар расми пуршукуҳи низомӣ, ки ба таври камназир ва бесобиқа омода шуда буд, ҷузъу томҳои қувваҳои стратегии заминӣ, баҳрӣ ва ҳавоии Чин, инчунин шумораи зиёди техникаи муосири ҳарбӣ аз воҳидҳои мухталифи артиши ин кишвар иштирок намуданд.
23
03.09.2025 -
Баргузории ҷаласаи директорони муассисаҳои таҳсилоти иловагии вилояти Хатлон 3 сентябри соли 2025 дар шаҳри Бохтар ҷаласаи васеи кории директорони муассисаҳои таҳсилоти иловагии шаҳру ноҳияҳои вилояти Хатлон баргузор гардид. Дар ҷаласа Давлатзода Муяссара, директори Муассисаи давлатии "Маркази ҷумҳуриявии муассисаҳои таҳсилоти иловагӣ"-и Вазорати маориф ва илми Ҷумҳурии Тоҷикистон иштирок ва суханронӣ намуда, масъалаҳои муҳимми рушди таҳсилоти иловагӣ, татбиқи самараноки барномаҳои давлатӣ ва ҷалби бештари хонандагон ба маҳфилҳои омӯзишӣ ва эҷодиро мавриди баррасӣ қарор дод. Ҳамчунин, мубодилаи таҷриба миёни директорони муассисаҳои таҳсилоти иловагӣ, баҳогузорӣ ба натиҷаҳои фаъолияти соли гузашта ва муайянсозии самтҳои афзалиятноки кор барои соли нави таҳсил, аз мавзуъҳои меҳварии ҷаласа буданд. Мақсад аз баргузории чунин ҷаласаҳо – таҳкими ҳамкории муассисаҳо, беҳтар намудани сифати хизматрасониҳои иловагӣ ва ташаккули насли эҷодкору соҳибмаърифат мебошад.
31
03.09.2025 -
Мулоқот бо Раиси Кумитаи доимии Маҷлиси умумичинии намояндагони мардумии Ҷумҳурии Мардумии Чин Чжао Лэтсзи 3 сентябр дар шаҳри Пекин Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон бо Раиси Кумитаи доимии Маҷлиси умумичинии намояндагони мардумии Ҷумҳурии Мардумии Чин Чжао Лэтсзи мулоқот карда, маҷмуи масоили ҳамкории ду кишварро баррасӣ намуданд. Дар оғоз Сарвари давлати мо роҳбарият ва мардуми Чинро бо солгарди 80-уми пирӯзии мардуми Чин бар милитаризми Ҷопон ва анҷоми ҷанги дуюми ҷаҳонии зиддифашистӣ ва баргузорсозии бомуваффақияти чорабиниҳои пуршукуҳ ба ин муносибат табрику таҳният гуфтанд. Роҳбари Парлумони Чин зимни баҳогузорӣ ба сатҳ ва муҳтавои муносибатҳои дуҷониба бо кишвари мо, аз ҷумла изҳор дошт: “Чин ҳамеша дӯсти аз ҳама боэътимод ва шарики боварибахши Тоҷикистон хоҳад буд”. Президенти кишвар муҳтарам Эмомалӣ Раҳмон аз сатҳу мундариҷаи робитаҳои ҳамкорӣ бо Ҷумҳурии Мардумии Чин изҳори қаноатмандӣ намуда, иброз доштанд, ки Чин барои Тоҷикистон дӯсти боэътимод, ҳамсояи нек ва шарики ҳамаҷонибаи стратегӣ мебошад. Ҷонибҳо муколамаи пайвастаи сиёсӣ, инчунин ҳамкорӣ дар соҳаҳои иқтисодиву тиҷоратӣ ва фарҳангиву гуманитариро муҳокима намуданд. Таъкид гардид, ки робитаҳои байнипарлумонӣ ва ҷамъиятии ду кишвар ба таври фаъол рушд меёбанд. Ба татбиқи лоиҳаҳои муҳим дар соҳаҳои энергетика, нақлиёт ва логистика дар доираи ташаббуси “Як камарбанд-як роҳ” таваҷҷуҳи зиёд зоҳир гардид. Тақвияти бомароми шарикии Тоҷикистону Чин дар доираи Созмони ҳамкории Шанхай ва “Осиёи Марказӣ-Чин” махсус таъкид гардид. Гуфта шуд, ки ҳоло дар Тоҷикистон зиёда аз 700 ширкат бо иштироки сармояи чинӣ фаъолият дорад. Истифодаи фаровони имкониятҳо дар соҳаҳои саноат, кишоварзӣ, аз ҷумла содироти маҳсулоти аграрии Тоҷикистон ба Чин мувофиқи мақсад шумурда шуд. Густариши ҳамкорӣ дар самти технологияҳои рақамӣ ва инноватсия, раванди рақамикунонии иқтисоди миллии Тоҷикистон, рушди робитаҳо дар соҳаи таҳсилот ва омода намудани мутахассисони технологияҳои иттилоотиву коммуникатсионӣ аз мавзуъоти дигари суҳбат буд. Ҳамчунин, атрофи тавсеаи ҳамкории Тоҷикистон бо Чин дар соҳаи таъмини амният ва дастгирии доимии Чин аз пешниҳоду ташаббусҳои глобаливу минтақавии Тоҷикистон табодули андеша сурат гирифт. Дар бинои Маҷлиси умумичинии вакилони мардумӣ, ҳамчунин, хос ба ифтихори Пешвои Тоҷикистон муҳтарам Эмомалӣ Раҳмон аз номи Раиси Ҷумҳурии Мардумии Чин муҳтарам Си Ҷинпин бо ҳузури Раиси Кумитаи доимии Маҷлиси умумичинии намояндагони мардумии (Парлумони) Ҷумҳурии Мардумии Чин Чжао Лэҷи зиёфати расмӣ ороста шуд.
17
03.09.2025
