12.05.2025
12 майи соли 2025 дар толори Гурӯҳи идоракунии лоиҳаи “Такмили таҳсилоти миёна дар соҳаи илмҳои STEM” семинари илмӣ таҳти унвони “Натиҷагирӣ аз таҳқиқоти иҷтимоӣ вобаста ба талабот ва тавоноии волидону хонандагон ба таҳсилоти касбӣ” баргузор гардид.
Семинар бо сухани ифтитоҳии Музаффарзода Бадриддин – муовини вазири маориф ва илми Ҷумҳурии Тоҷикистон оғоз гардид. Муовини вазир иштирокчиёнро хайрамақдам гуфта, аз дастгириҳои пайвастаи Бонки Осиёии Рушд дар амалисозии лоиҳаи “Такмили таҳсилоти миёна дар соҳаи илмҳои табиӣ, технологӣ, муҳандисӣ ва математика (STEM)” изҳори сипос намуд. Ӯ зикр кард, ки лоиҳаи мазкур яке аз ташаббусҳои муҳимми Вазорати маориф ва илм дар самти ислоҳоти таҳсилоти миёнаи умумӣ ба шумор меравад, ки татбиқи он аз моҳи майи соли 2024 оғоз гардида, то соли 2030 идома меёбад.
Муовини вазир таъкид дошт, ки Вазорати маориф ва илм бо мақсади таҳкими пояҳои таҳсилоти босифат ва мутобиқсозии он ба талаботи бозори меҳнат, татбиқи саривақтӣ ва самаранокӣ лоиҳаи мазкурро яке аз самтҳои афзалиятнок мешуморад. Ҳамкорӣ бо шарикони рушд, бахусус Бонки Осиёии Рушд, дар ин раванд нақши калидӣ дорад. Таҳқиқоти иҷтимоие, ки дар 20 муассисаи ҳадафӣ анҷом ёфтааст, ба мо имкон медиҳад, то таҳаввулоти воқеии ниёзҳо ва тавонмандиҳои хонандагону волидонро дар робита ба таҳсилоти касбӣ дарк намуда, нақшаи ояндаро асоснок таҳия намоем. Бовар дорем, ки натиҷаи ин ҳамоиш саҳми арзандае дар рушди соҳаи маориф ва илми кишвар хоҳад дошт”.
Дар кори семинар намояндагони вазорат, ташкилотҳои байналмилалӣ ва омӯзгорони донишгоҳҳои гуногуни ҷумҳурӣ иштирок намуда, натиҷаҳои таҳқиқоти иҷтимоӣ мавриди муҳокима қарор гирифтанд. Зикр гардид, ки чунин тадқиқот барои муайянсозии воқеии вазъ ва дарёфти роҳҳои татбиқи ислоҳоти муассир дар соҳаи маориф нақши муассир доранд.
Дар интиҳои ҳамоиш, пешниҳодҳо ва тавсияҳои иштирокчиён шунида шуда, барои истифода дар марҳилаҳои минбаъдаи татбиқи лоиҳа сабт гардиданд.
Маркази матбуоти
Вазорати маориф ва илми
Ҷумҳурии Тоҷикистон
Хабарҳои дигар
-
Пешгӯии Оянда: Малакаҳо, Секторҳо ва Ҳалҳои Стратегӣ Иттиҳоди Аврупо ва Ҷумҳурии Тоҷикистон бо семинари муштарак барои ташаккули нерӯи кории пурқувват ва дорои малака, боз як қадами муҳим дар роҳи ислоҳоти соҳаҳои маориф ва бозори меҳнат гузоштанд. Дар доираи ин ҳамкорӣ, семинари дурӯза таҳти унвони «Пешгӯии малакаҳо: кор ва интихоби соҳаҳо. Ҷалби бахши хусусӣ» баргузор гардид. Ин семинар рӯзҳои 20–21 майи соли 2025 дар «Greenwood House»-и шаҳри Ҳисор баргузор шуда, мутахассисони миллӣ, машваратчиёни ИА ва намояндагони калидии муассисаҳои давлатӣ ва бахши хусусиро ҷамъ овард. Ин ташаббус як ҷузъи лоиҳаи фарогири Иттиҳоди Аврупо таҳти унвони «Дастгирии соҳаҳои маориф ва меҳнати Ҷумҳурии Тоҷикистон» мебошад. Мавзӯи асосии семинар пешгӯии талаботи оянда ба малакаҳо дар се соҳаи калидии иқтисод буд. Ин раванд бо истифода аз таҳлили сифатӣ ва додаҳои бозори меҳнат сурат гирифт. Дар гурӯҳҳои кори интерактивӣ ва сессияҳои роҳнамоӣ, иштирокчиён моделҳои эҳтимолии рушди соҳаҳоро арзёбӣ намуда, ихтисосҳое, ки ниёз ба такмили ихтисос ё бозомӯзӣ доранд, муайян карданд.
5
21.05.2025 -
Қадами ҷиддии Тоҷикистон ба сӯи маорифи рақамӣ бо дастгирии Иттиҳоди Аврупо Дар чаҳорчӯбаи лоиҳаи “Дастгирии Иттиҳоди Аврупо ба соҳаҳои маориф ва меҳнати Ҷумҳурии Тоҷикистон” дар ҳамкорӣ бо Вазорати маориф ва илми Ҷумҳурии Тоҷикистон семинари дурӯзаи "Таҳкими зарфият оид ба роҳбарӣ дар ҳамгироии зеҳни сунъӣ" баргузор намуд. Дар семинар роҳбарони соҳаи маориф, аз ҷумла, муовини якуми вазири маориф ва илми Ҷумҳурии Тоҷикистон Ҳошимзода Ҳомид Ҳасан, менеҷери барнома – Диана Димова, Намояндагии Иттиҳоди Аврупо ва мутахассисони рақамӣ ширкат варзиданд. Ҳадафи он, татбиқи амалии зеҳни сунъӣ барои рушди соҳаҳои маориф ва бозори меҳнати Тоҷикистон буд. Иштирокчиён бо усулҳои муосири ЗС чун ChatGPT, Gemini ва DeepSeek таҷрибаи амалӣ андӯхтанд. Баромадҳо масъалаҳои омодагии рақамӣ, истифодаи этикии ЗС ва таҷрибаи байналмилалиро фаро гирифтанд. Семинар бо эҷоди лоиҳаҳои пилотии ЗС, барои татбиқ дар сохтори Вазорат, ба поён расид. “Ин як қадами муҳими Тоҷикистон ба сӯи ояндаи рақамӣ аст,” — гуфт намояндаи ИА Диана Димова.
15
19.05.2025 -
ГУСТАРИШИ ҲАМКОРИҲО БО БОНКИ УМУМИҶАҲОНӢ ДАР САМТИ ТАТБИҚИ ЛОИҲАИ «МУҲИТИ ТАЪЛИМ – АСОСИ ТАҲСИЛОТИ БОСИФАТ» Имрӯз, 12 майи соли 2025 дар Вазорати маориф ва илми Ҷумҳурии Тоҷикистон вохӯрии ҳайати миссияи кории Бонки Умумиҷаҳонӣ бо роҳбарияти вазорат доир гардид. Дар вохӯрӣ муовини якуми вазири маориф ва илм Ҳомид Ҳошимзода, муовинони вазир, сардорони раёсату шуъбаҳои дахлдори вазорат, кормандони лоиҳаи «Муҳити таълим – асоси таҳсилоти босифат» ва ҳайати миссияи кории Бонки Умумиҷаҳонӣ иштирок намуданд. Зимни суҳбат муовини якуми вазири маориф ва илм таъкид кард, ки Бонки Умумиҷаҳонӣ яке аз шарикони боэътимоди Вазорати маориф ва илм ба шумор меравад, ки дар самти татбиқи ислоҳоти муҳимми соҳа саҳми назаррас дорад. Аз ҷумла, лоиҳаи «Муҳити таълим – асоси таҳсилоти босифат», ки бо маблағгузории Бонки Умумиҷаҳонӣ амалӣ мешавад, ҷиҳати баланд бардоштани сифати таҳсилот ва муҳайё намудани шароити мусоид барои хонандагону омӯзгорон нақши калидӣ дорад. Зикр гардид, ки дар соли сипаришуда татбиқи лоиҳа бо натиҷаҳои назаррас анҷом ёфта, «Чаҳорчӯбаи миллии рушди таҳсилот дар Ҷумҳурии Тоҷикистон» таҳия ва дар ҷаласаи мушовараи вазорат тасдиқ шуд. Ҳамзамон, дар асоси ин санад «Роҳнамо оид ба ташаккули муҳити физикӣ дар муассисаҳои таҳсилоти миёнаи умумӣ» таҳия шуда, айни ҳол мавриди тарҷума қарор дорад. Бо мақсади татбиқи Стратегияи миллии арзёбии сифати таҳсилот барои давраи то соли 2044 ва таҳияи санадҳои зарурӣ, бо фармоиши вазир гурӯҳи кории байниидоравӣ таъсис дода шуд. Ҳамзамон, дар 42 муассисаи таҳсилоти миёнаи умумии 25 шаҳру ноҳия давраи озмоишии арзёбии байналмилалии PIRLS - 2026 амалӣ гардид. Муовини якуми вазири маориф ва илм изҳор дошт, ки вазорат умедвор аст, Бонки Умумиҷаҳонӣ барои бартараф намудани осебҳои расида ба муассисаҳои таҳсилоти умумии ноҳияҳои Рашт ва Тоҷикобод, ки бар асари заминҷунбии 13 апрели соли 2025 ба амал омад, кумак хоҳад расонид. Роҳбари гурӯҳи кории Бонки Умумиҷаҳонӣ Тигран Шмис зимни суханронии худ аз сатҳи ҳамкориҳои мутақобилан судманд бо Вазорати маориф ва илми Ҷумҳурии Тоҷикистон изҳори қаноатмандӣ намуда, таъкид дошт, мо ба ҳамкориҳои судманду созанда бо Вазорати маориф ва илми Ҷумҳурии Тоҷикистон баҳои баланд медиҳем. Натиҷаҳои то имрӯз бадастомада, аз ҷумла дар лоиҳаи “Муҳити таълим – асоси таҳсилоти босифат” нишон медиҳанд, ки ташаббусҳои пешгирифта дар самти дуруст ва даркорӣ роҳандозӣ шудаанд. Умед дорем, ки дар марҳилаҳои минбаъда низ бо такя ба таҷриба ва натиҷаҳои амалишуда метавонем иқдомоти навро роҳандозӣ намоем ва ба ин васила дар баланд бардоштани сифати таҳсилот ва беҳтарсозии муҳити таълим дар мактабҳои Тоҷикистон мусоидат намоем». Дар интиҳо аз номи Вазорати маориф ва илм ба Бонки Умумиҷаҳонӣ барои ҳамкориҳои мутақобилан судманд изҳори миннатдорӣ баён гардида, изҳори умедворӣ шуд, ки равобити самарабахш дар роҳи рушди соҳаи маориф идома хоҳанд ёфт. Маркази матбуоти Вазорати маориф ва илми Ҷумҳурии Тоҷикистон
54
12.05.2025
