23.05.2025
ТАҶҲИЗОТИ МУОСИР БА 21 МУАССИСАИ ТАЪЛИМӢ ДАСТРАС ГАРДИД
Дар доираи татбиқи Қарори Ҳукумати Ҷумҳурии Тоҷикистон дар бораи Барномаи ҷорӣ намудани технологияҳои иттилоотӣ ва коммуникатсионӣ дар муассисаҳои таҳсилоти умумӣ барои солҳои 2024–2028, ба 21 муассисаи таҳсилоти умумии шаҳру ноҳияҳои Вилояти Мухтори Кӯҳистони Бадахшон таҷҳизоти муосири техникӣ, аз ҷумла, компютерҳо, тахтаҳои электронии интерактивӣ ва дигар воситаҳои таълимӣ дастрас гардиданд.
Ин иқдом бо дастгирии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва маблағгузории Фонди захиравии Президенти мамлакат амалӣ гардида, як ҷузъи муҳимми сиёсати давлатии рушди соҳаи маориф маҳсуб меёбад. Он ба раванди рақамикунонии муассисаҳои таълимӣ дар минтақаи дурдасти кишвар таҳким мебахшад.
Дар назар аст, ки дар панҷ соли оянда тамоми муассисаҳои таҳсилоти умумии ВМКБ ба шабакаи интернетӣ, синфхонаҳои компютерӣ, тахтаҳои электронӣ ва китобхонаҳои рақамӣ пайваст гарданд. Ҳамзамон, татбиқи системаи иттилоотии идоракунии соҳаи маориф (EMIS), платформаҳои таълимии электронӣ ва таҳияи ҳазорон китоби рақамӣ ва маводи интерактивӣ дар назар аст.
Барномаи давлатӣ ба баланд бардоштани сатҳи саводнокии рақамии омӯзгорон ва хонандагон, инчунин ташкили муҳити рақамии таълимӣ дар муассисаҳо нигаронида шудааст. Тибқи нақша, дар оянда ҳамаи муассисаҳои таълимии ВМКБ ба шабакаи ягонаи таълимии миллӣ пайваст хоҳанд шуд ва аз платформаҳои муосири рақамӣ истифода хоҳанд бурд.
Ин марҳилаи муҳим дар рушди соҳаи маориф бо дастгирии Ҳукумати Ҷумҳурии Тоҷикистон ва сиёсати дурбинонаи Пешвои миллат амалӣ гардида, заминаи устувор барои ҳамгироии ВМКБ ба ҷомеаи рақамии ҷаҳонӣ мебошад.
Омӯзгорон, роҳбарони муассисаҳо ва хонандагонро зарур аст, ки аз ин имкониятҳо самаранок истифода баранд, то сифати таҳсил боз ҳам баланд гардад.
Хабарҳои дигар
-
БОЗДИД АЗ РАФТИ СОХТМОНИ МУАССИСАИ ТАЪЛИМӢ ДАР НОҲИЯИ ДАРВОЗ 22 майи соли 2025 муовини вазири маориф ва илми Ҷумҳурии Тоҷикистон Бадриддин Музаффарзода аз раванди сохтмони Муассисаи таҳсилоти миёнаи умумии №40-и ноҳияи Дарвоз боздид намуд. Зимни боздид ба муовини вазири маориф ва илм иттилоъ дода шуд, ки муассисаи таълимӣ бо шароити муосири таълим аз 3 ошёна барои 560 хонанда дар ду баст пешбинӣ шудааст ва аз 8 синфхона иборат аст. Ҳоло сохтмони муассисаи мазкур бомаром идома дошта, дар назар аст соли ҷорӣ ба истифода дода шавад. Дар идома муовини вазир бо масъулини сохтмони иншоот доир ба масъалаҳои саривақт ба итмом расонидан ва мавриди истифода қарор додани иншоот мулоқоти судманд анҷом дод. Сипас, муовини вазир аз рафти дарси омӯзгорон, вазъи таълиму тарбия, сифати таҳсилот ва риояи сару либоси хонандагон дидан намуда, ба масъулини шуъбаи маориф ва муассисаи таълимӣ ҷиҳати беҳтар намудани вазъи таълиму тарбия, иштироки хонандагон дар озмуну олимпиадаҳои ҷумҳурӣ ва рафъи мушкилоти мавҷудбуда дастуру супоришҳои мушаххасс дод. Боиси зикр аст, ки дар доираи сиёсати маорифпарваронаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон солҳои охир бунёду сохтмон ва азнавсозии муассисаҳои таҳсилоти томактабӣ ва миёнаи умумӣ, ба истифода додани муассисаҳои таълимии типи нав вусъат ёфта, заминаҳои мазкур ба баланд гаштани сатҳу сифати таҳсилот дар кишвар мусоидат намудааст. Маркази матбуоти Вазорати маориф ва илми Ҷумҳурии Тоҷикистон
38
22.05.2025 -
БАРРАСИИ МАСОИЛИ КАЛИДИИ СОҲА ДАР ҶАЛАСАИ СИТОД 22 майи соли 2025 дар Вазорати маориф ва илми Ҷумҳурии Тоҷикистон ҷаласаи ситоди таъмини муассисаҳои таҳсилоти миёнаи умумӣ бо омӯзгорон баргузор гардид, ки дар он сардорони раёсату шуъбаҳои дахлдори вазорат, сардорони раёсату мудирони шуъбаҳои маорифи шаҳру ноҳияҳои кишвар, директорони марказҳои рушди истеъдодҳо, мактабҳои Президентӣ ва литсейҳои мақоми ҷумҳуриявидошта ва дигар кормандони соҳаи маориф ба тариқи ҳузурӣ ва маҷозӣ иштирок намуданд. Ҷаласаро муовини вазири маориф ва илм Равшан Каримзода ифтитоҳ намуда, доир ба аҳаммияти идоракунии муассир, тақвияти сатҳи таълим ва тарбияи хонандагон, танзими раванди аттестатсионӣ ва омодагии муассисаҳо ба соли таҳсили нав изҳори назар кард. Дар ҷаласа масъалаҳои ҷамъбасти даври дуюми Озмуни ҷумҳуриявии “Фурӯғи субҳи доноӣ китоб аст”, омодагӣ ба аттестатсияи синф ба синф ва хатм, бо таъкиди қатъӣ ба пешгирии ҷамъоварии ғайриқонунии маблағҳо, нақшаи ташкили чорабинии “Занги камолот” тибқи фармоиши вазир аз 17.05.2017, таъмири муассисаҳои таълимӣ бо дастгирии мақомоти иҷроияи ҳокимияти давлатӣ ва кумитаҳои падару модарон, назорати равандҳои таълиму тарбия тавассути ташкил ва гузаронидани санҷишҳои ногаҳонии сатҳи таълимӣ дар муассисаҳои таҳсилоти томактабӣ ва умумӣ мавриди барасӣ қарор дода шуд. Ҷаласа дар фазои корӣ, таҳлилии муфассал ва бо пешниҳоди тавсияҳои мушаххас ҷиҳати беҳтарсозии вазъи муассисаҳои таълимӣ ҷамъбаст гардид. Маркази матбуоти Вазорати маориф ва илми Ҷумҳурии Тоҷикистон
22
22.05.2025 -
ҲАМОИШИ ИЛМӢ-НАЗАРИЯВӢ БАХШИДА БА РӮЗИ ҶАВОНОНИ ТОҶИКИСТОН Бо мақсади сазовор таҷлил намудани Рӯзи ҷавонони Тоҷикистон ва мусоидат дар татбиқи сиёсати давлатии ҷавонон, 22 майи соли 2025 дар толори маҷлисгоҳи Вазорати маориф ва илми Ҷумҳурии Тоҷикистон ҳамоиши илмӣ-назариявӣ баргузор гардид. Чорабинии мазкур бо ташаббуси Ташкилоти ҷамъиятии ҷавонон “Созандагони Ватан” дар назди ташкилоти ибтидоии ҳизбии «Ганҷ»-и Ҳизби Халқии Демократии Тоҷикистон дар вазорат ташкил ва баргузор карда шуд. Ҳамоишро муовини якуми вазири маориф ва илм Ҳошимзода Ҳомид оғоз бахшида, дар суханронии худ вобаста ба саҳми ҷавонон дар рушди кишвар, сиёсати ҷавонпарваронаи давлат ва Ҳукумати Ҷумҳурии Тоҷикистон ва дастгирии пайвастаи Пешвои миллат муҳтарам Эмомалӣ Раҳмон изҳори назар намуд. Зикр гардид, ки ҷавонон қувваи пешбарандаи ҷомеа ба шумор рафта, таҳким бахшидани ҷаҳонбинӣ, баланд бардоштани маърифати сиёсӣ ва рушди қобилияти зеҳнии онҳо вазифаи муҳимми ҳамаи сохторҳои давлатӣ ва ҷомеа мебошад. Дар идома муовини якуми вазир аз натиҷаҳои амалигардонии барномаҳои давлатӣ оид ба ҷавонон ёдовар шуда, қайд намуд, ки имрӯзҳо барои таҳсилу фаъолияти илмӣ, татбиқи ташаббусҳо ва амалисозии иқдомоти созандаи ҷавонон дар соҳаи маориф ва илм шароити мусоид фароҳам оварда шудааст. Дар ҷараёни ҳамоиш инчунин намояндагони Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва Академияи идоракунии давлатии назди Президенти Ҷумҳурии Тоҷикистон ширкат намуда, вобаста ба масъалаҳои марбут ба ҳаёти иҷтимоӣ, фаъолсозии неруи ҷавонон, худшиносӣ ва таълиму тарбияи онҳо дар руҳияи ватандӯстиву худогоҳӣ баромад намуданд. Маврид ба зикр аст, ки баргузории чунин чорабиниҳо боиси таҳкими ҳисси масъулиятшиносӣ, фаъолсозии неруи созандаи ҷавонон дар ҷомеа, афзоиши донишу малакаи сиёсиву фарҳангӣ ва саҳмгузории бештари онҳо дар раванди рушди соҳаи маориф мегардад. Дар қисмати хотимавии ҳамоиш як қатор кормандони вазорат барои саҳми арзандаи худ дар рушди фаъолияти ҷамъиятӣ ва маърифатӣ бо “Сипоснома”-и Кумитаи кор бо ҷавонон ва варзиш қадрдонӣ карда шуданд. Маркази матбуоти Вазорати маориф ва илми Ҷумҳурии Тоҷикистон
40
22.05.2025
