02.09.2026
Имрӯз, 1 сентябри соли 2026 дар Донишгоҳи давлатии Кӯлоб ба номи Абуабдуллоҳи Рӯдакӣ Рӯзи дониш дар фазои идона ва дар пайравӣ аз сиёсати маорифпарваронаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон таҷлил гардид. Дар доираи чорабинии мазкур вохӯрии пурмӯҳтаво бо иштироки раиси шаҳри Кӯлоб Пирзода Диловар бо устодону кормандон ва донишҷӯёни донишгоҳ дар ҳошияи Мулоқоти Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон бо аҳли маорифи кишвар бахшида ба Рӯзи дониш баргузор гардид.
Дар чорабинӣ ҳамчунин ректори донишгоҳ Мунир Сафарзода Ватан, ҳайати роҳбарикунандаи донишгоҳ, устодон ва донишҷӯён иштирок намуданд.
Нахуст раиси шаҳри Кӯлоб Пирзода Диловар суханронӣ намуда, омӯзгорону донишҷӯёнро бо оғози соли нави таҳсил табрик гуфт ва ба онҳо дар роҳи омӯзишу худшиносӣ муваффақият орзу кард. Ҳамзамон аз дастгириҳои пайвастаи роҳбарияти олии мамлакат нисбат ба соҳаи маориф ёдовар шуда, аҳамияти афзояндаи илм ва нақши созандаи ҷавононро дар бунёди ҷомеаи мутамаддин таъкид намуд. Ӯ донишҷӯёнро ба омӯзиши амиқи донишҳои муосир, истифодаи босамари имкониятҳои фароҳамшуда ва саҳмгузорӣ дар пешрафти давлату миллат даъват кард.
Сипас, ректори донишгоҳ, дотсент Сафарзода Мунир Ватан баромад намуда, зикр дошт, ки таҷлили Дарси сулҳ ва оғоз гардидани соли нави таҳсил бо иштироки Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон гувоҳи равшани эҳтироми давлат ва Ҳукумати кишвар ба сулҳу оромӣ, суботи сиёсии ҷомеа, мақому мартабаи илму маориф, заҳмати омӯзгорон ва саъю талоши донишҷӯёну хонандагон, яъне насли ояндасози миллат мебошад.
Ӯ афзуд, ки Донишгоҳи давлатии Кӯлоб ба номи Абуабдуллоҳи Рӯдакӣ дар партави сиёсати илмпарваронаи Пешвои миллат масъулияти тарбияи мутахассисони соҳибкасб, ватандӯст ва дорои ҷаҳонбинии муосирро бар дӯш дошта, барои фароҳам овардани муҳити босифати таълиму таҳсил пайваста тадбирҳои муассир меандешад.
Дар идома Холиқзода Сафар, номзади илмҳои кимиё, дотсент, дар ҳошияи нуктаҳои асосии Мулоқоти Президенти Ҷумҳурии Тоҷикистон бо аҳли маориф суханронӣ намуда, таъкид кард, ки рушди илмҳои дақиқ, тарбияи кадрҳои рақобатпазир, баланд бардоштани сифати таҳсилот ва истифодаи технологияҳои муосир аз вазифаҳои муҳими муассисаҳои таҳсилоти олӣ маҳсуб меёбанд.
Ҳамчунин донишҷӯи курси аввали факултети филологияи хориҷӣ Валиева Миҷгона аз номи донишҷӯёни нав ба роҳбарияти олии кишвар ва ҳайати устодони донишгоҳ барои муҳайё намудани шароити мусоиди таълиму таҳсил изҳори сипосу миннатдорӣ баён дошт. Ӯ таъкид намуд, ки донишҷӯёни соли аввал бо ҳисси баланди масъулият аз имкониятҳои фароҳамшуда самаранок истифода бурда, барои аз худ намудани донишҳои муосир ва хизмат ба Ватани азиз тамоми нерӯву кӯшиши худро равона хоҳанд кард.
Чорабинӣ бо рӯҳияи баланди ватандӯстӣ, эҳтиром ба арзишҳои миллӣ ва умед ба дастовардҳои нави илмию таълимӣ оғозбахши соли таҳсили 2026-2027 гардид.
Хабарҳои дигар
-
ОҒОЗИ БОШУКӮҲИ СОЛИ НАВИ ТАҲСИЛ ДАР МУАССИСАҲОИ ТАЪЛИМИИ НОҲИЯИ ИСМОИЛИ СОМОНИ 1 сентябри соли 2026 дар муассисаҳои таълимии ҳудуди ноҳияи Исмоили Сомонии шаҳри Душанбе ба муносибати Рӯзи дониш, Дарси сулҳ ва оғози соли таҳсили 2026–2027 ҷамъомадҳои тантанавӣ баргузор гардиданд. Дар ҷамъомади тантанавии Муассисаи давлатии таълимии «Литсейи №5» раиси ноҳияи Исмоили Сомонӣ Қодирзода Руслан Раҷаб, мудири шуъбаи маорифи ноҳия Маҷидзода Ҷамшед, роҳбарияти муассиса, омӯзгорон, хонандагон, падару модарон ва дигар меҳмонон иштирок намуданд. Раиси ноҳияи Исмоили Сомонӣ аҳли маориф, омӯзгорону хонандагон ва падару модаронро аз номи Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ ва мақомоти иҷроияи ҳокимияти давлатии ноҳияи Исмоили Сомонӣ ба муносибати Рӯзи дониш, оғози соли нави таҳсил ва 35-солагии Истиқлоли давлатии Ҷумҳурии Тоҷикистон самимона табрик намуд. Зимни суханронӣ таъкид гардид, ки соҳаи маориф дар сиёсати иҷтимоии давлат мавқеи афзалиятнок дошта, фароҳам овардани шароити мусоиди таълиму тарбия, баланд бардоштани сифати дониш, дастгирии омӯзгорон ва тарбияи насли донишманду ватандӯст аз ҳадафҳои асосии Ҳукумати Ҷумҳурии Тоҷикистон ба ҳисоб меравад. Ҳамзамон, дар дигар муассисаҳои таълимии ҳудуди ноҳия низ бо иштироки намояндагони мақомоти иҷроияи ҳокимияти давлатии шаҳри Душанбе ва мақомоти иҷроияи ҳокимияти давлатии ноҳияи Исмоили Сомонӣ ҷамъомадҳои тантанавӣ баргузор гардиданд. Тибқи рӯйхати тасдиқгардида, намояндагони масъули мақомоти шаҳр ва ноҳия дар муассисаҳои таълимӣ иштирок намуда, табрикоти Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ ва роҳбарияти ноҳияи Исмоили Сомониро ба омӯзгорону хонандагон расониданд. Намояндагон зимни суханрониҳои худ доир ба сиёсати маорифпарваронаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон, дастгирии пайвастаи Раиси шаҳри Душанбе муҳтарам Рустами Эмомалӣ аз соҳаи маориф, масъулияти омӯзгорон дар таълиму тарбияи насли наврас ва зарурати баланд бардоштани сифати таҳсил андешаронӣ намуданд. Ҳамчунин, ҷиҳати оғози муташаккилонаи соли нави таҳсил, риояи талаботи санитарию беҳдоштӣ ва зиддисӯхторӣ, омодагии синфхонаҳо, таъминот бо китобҳои дарсӣ, тозагию ободонии гирду атроф ва омодагӣ ба давраи тирамоҳу зимистони солҳои 2026–2027 ба масъулони муассисаҳои таълимӣ тавсияҳои мушаххас дода шуданд. Ҷамъомадҳои Рӯзи дониш дар ҳамаи муассисаҳои таълимии ноҳия дар фазои тантанавӣ, рӯҳияи баланди ватандӯстӣ ва ифтихор аз дастовардҳои даврони соҳибистиқлолӣ баргузор гардиданд. Оғози соли нави таҳсил барои аҳли маорифи ноҳияи Исмоили Сомонӣ марҳалаи нави масъулият, созандагӣ ва талош ҷиҳати баланд бардоштани сифати таълиму тарбия буда, роҳбарону омӯзгорон омодагии худро барои иҷрои содиқонаи вазифаҳои касбӣ ва татбиқи сиёсати давлатии Ҷумҳурии Тоҷикистон дар соҳаи маориф изҳор намуданд.
15
02.09.2026 -
Мулоқот бо Президенти Федератсияи Русия Владимир Путин 1 сентябр дар шаҳри Бишкек дар ҳошияи ҷаласаи Шурои Сарони давлатҳои аъзои Созмони ҳамкории Шанхай, ҳамчунин, мулоқоти Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон бо Президенти Федератсияи Русия муҳтарам Владимир Путин баргузор гардид. Дар вохӯрӣ вазъи кунунии ҳамкории гуногунҷанбаи Тоҷикистону Русия ва дурнамои он баррасӣ шуд. Таваҷҷуҳи зиёд ба масоили вобаста ба амну субот, тиҷорату иқтисод ва робитаҳои фарҳангию башарӣ зоҳир гардид. Пеш аз ҳама, аз суръати сохтмони Маркази рушди кӯдакони болаёқат ва бинои нави театри драмавии ба номи Маяковский дар шаҳри Душанбе изҳори қаноат карда шуд. Масоили вобаста ба рушди тиҷорат, соҳибкорӣ, сармоягузорӣ ва ҳамкори энергетикӣ низ дар маркази таваҷҷуҳ қарор дошт. Таҳкими ҳамкорӣ барои таъмини амну суботи минтақавӣ, аз ҷумла дар мубориза бо таҳдиду хатарҳои ҷаҳони муосир, аз мавзӯъҳои муҳими суҳбат буд. Табодули андеша, ҳамчунин атрофи масоили алоҳидаи вазъият дар минтақа ва ҷаҳон сурат гирифт.
34
02.09.2026 -
Ба истифода додани бинои нави муассисаи таълимии ғайридавлатии таҳсилоти миёнаи умумии Имкон дар шаҳри Душанбе 2 сентябр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ва Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ бинои нави муассисаи таълимии ғайридавлатии таҳсилоти миёнаи умумии Имконро барои 800 хонанда дар кӯчаи Аҳрории шаҳри Душанбе мавриди истифода қарор доданд. Иншооти нав бо мақсади фароҳам овардани шароити арзандаи таълиму тарбия аз ҷониби бародарони соҳибкор Валиҷон, Пиран ва Пайрав Ахмедовҳо бунёд шудааст. Зимни шиносоӣ ба Пешвои миллат муҳтарам Эмомалӣ Раҳмон иттилоъ дода шуд, ки дар тарҳрезӣ ва сохтмони бино ба сифати корҳо ва истифодаи масолеҳи ватании ҷавобгӯ ба меъёрҳои муосир таваҷҷуҳи зарурӣ зоҳир шудааст. Сохтмони ин муассисаи муосири таълимӣ бо риояи талаботи меъёрҳои муосири шаҳрсозӣ анҷом дода шудааст. Дар раванди бунёди иншоот 80 сокини маҳаллӣ бо кори муваққатӣ таъмин гардиданд. Муассиса дорои 59 синфхонаи таълимӣ ва як қатор ҳуҷраҳои ёрирасон мебошад. Дар синфхонаҳои муассиса барои омӯзиши фанҳои гуногун, аз ҷумла технологияҳои иттилоотӣ, касбу ҳунар, биология, физика, санъати тасвирӣ ва забонҳои хориҷӣ заминаи зарурии моддию техникӣ фароҳам оварда шудааст. Ҳар як кабинети фаннӣ бо назардошти хусусияти таълимӣ ва талаботи барномаи таълимӣ муҷаҳҳаз карда шудааст. Дар муассисаи таълимӣ ҳоло 34 омӯзгор, ки 90 фоизи онҳоро бонувон ташкил медиҳад, ба фаъолияти касбӣ машғул буда, раванди таълим асосан бо забонҳои тоҷикӣ, русӣ ва англисӣ ба роҳ монда шудааст. Оянда дар ин ҷо таълими забони чинӣ ҳам ба роҳ монда мешавад. Ин равиш ба хонандагон имконият медиҳад, ки дар баробари гирифтани дониши муосир, малакаи муошират бо забонҳои хориҷиро низ такмил диҳанд. Муассиса, ҳамчунин дорои ошхона бо 290 ҷойи нишаст, толори варзишӣ, ду ҳавзи шиноварӣ барои писарону духтарон, толори маҷлис бо 180 ҷойи нишаст, боғи зимистона ва толори тирпарронӣ барои гузаронидани машғулиятҳои омодагии ибтидоии ҳарбӣ мебошад. Толори варзишӣ бо таҷҳизоти зарурӣ барои баргузории машғулиятҳои гуногуни варзишӣ пешбинӣ шуда, ба хонандагон имконият медиҳад, ки дар шароити муносиб ба тарбияи ҷисмонӣ машғул шаванд ва маҳорати варзишии худро такмил диҳанд. Ҳавзҳои шиноварӣ бо назардошти талаботи муосир бунёд гардида, барои писарону духтарон алоҳида пешбинӣ шудаанд ва муҳити муносиб барои омӯзиши шиноварӣ, обутоби ҷисмонӣ ва беҳсозии саломатии хонандагон фароҳам меоранд. Толори барҳавои маҷлис бо 180 ҷойи нишаст барои баргузории чорабиниҳои фарҳангиву маърифатӣ, маҳфилҳои таълимӣ ва ҷамъомадҳои гуногун пешбинӣ шуда, толори тирпарронӣ низ бо таҷҳизоти зарурӣ барои гузаронидани машғулиятҳои ҳарбӣ имконияти хуб фароҳам месозад. Сарвари давлат муҳтарам Эмомалӣ Раҳмон таъкид доштанд, ки фароҳам овардани шароити муосири таълиму тарбия ва баланд бардоштани сифати таҳсилот аз самтҳои муҳимтарини сиёсати иҷтимоии давлат ба ҳисоб меравад. Омӯзгорон ба истифодаи самараноки имкониятҳои омодашуда, баланд бардоштани сатҳу сифати таълим ва тарбияи насли соҳибмаърифату ватандӯст ҳидоят карда шуданд.
26
02.09.2026
