08.05.2026
Дар толори Донишгоҳи давлатии Хуҷанд ба номи академик Бобоҷон Ғафуров маҷлиси навбатии Шурои ректорони муассисаҳои таҳсилоти олии касбии Ҷумҳурии Тоҷикистон баргузор гардид. Дар кори ҷаласа вазири маориф ва илми Ҷумҳурии Тоҷикистон Раҳим Саидзода, роҳбарони муассисаҳои таҳсилоти олӣ ва дигар масъулини соҳа иштирок намуданд.
Ҷаласаро вазири маориф ва илм ифтитоҳ намуда, дар суханронии худ ба самтҳои афзалиятноки сиёсати давлатии соҳаи маориф таваҷҷуҳи махсус зоҳир намуд. Таъкид шуд, ки дар доираи дастуру ҳидоятҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон имрӯз дар назди муассисаҳои таҳсилоти олӣ вазифаҳои муҳим гузошта шудаанд. Аз ҷумла, татбиқи босамари барномаҳои давлатии рушди маориф, махсусан омӯзиши забонҳои русӣ ва англисӣ, тақвияти омӯзиши фанҳои дақиқ, риёзӣ ва табиатшиносӣ ҳамчун заминаи рушди иқтисоди инноватсионӣ, баланд бардоштани сифати омодасозии омӯзгорон ва кадрҳои баландихтисос, густариши равандҳои рақамисозии таҳсилот ва ҷорӣ намудани усулҳои муосири таълим, гузаронидани аккредитатсияи байналмилалии ихтисосҳо бо мақсади мутобиқсозӣ ба стандартҳои ҷаҳонӣ ва таҳкими ҳамкориҳои илмӣ ва таълимӣ бо муассисаҳои хориҷӣ аз самтҳои афзалиятноки сиёсати давлатӣ дар соҳаи маориф ба ҳисоб рафта, иҷрои онҳо барои рушди устувори низоми таҳсилоти олӣ аҳамияти калидӣ дорад.
Вазир ҳамчунин зикр намуд, ки сифати таълим бояд ба меъёрҳои байналмилалӣ ҷавобгӯ гардида, натиҷаҳои илмӣ ва инноватсионии донишгоҳҳо дар рушди иқтисоди миллӣ нақши бештар дошта бошанд.
Раиси Шурои ректорон, ректори Донишгоҳи давлатии тиҷорати Тоҷикистон Х. Назарзода аҳаммияти масъалаҳои баррасишавандаро дар рушди низоми таҳсилоти олӣ таъкид кард.
Дар идомаи ҷаласа рафти иҷрои Барномаи давлатии такмили таълим ва омӯзиши забонҳои русӣ ва англисӣ дар Ҷумҳурии Тоҷикистон барои давраи то соли 2030 мавриди таҳлил қарор гирифт. Сардори раёсати таҳсилоти миёнаи умумии Вазорати маориф ва илм Ш. Асомиддинзода доир ба натиҷаҳои амалишавии барнома ҳисобот пешниҳод намуда, дастовардҳо ва мушкилоти ҷойдоштаро шарҳ дод.
Ҳамзамон, масъалаи иҷрои Фармони Президенти Ҷумҳурии Тоҷикистон аз 31 январи соли 2020, №1445 «Дар бораи бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф барои солҳои 2020–2040» ва натиҷагирӣ аз марҳилаи миёнамуҳлати солҳои 2021–2025 баррасӣ гардид. Доир ба ин масъала ректори Донишгоҳи давлатии Кӯлоб ба номи Абуабдуллоҳи Рӯдакӣ М. Сафарзода таҳлили муфассал пешниҳод намуда, зарурати тақвияти корҳои илмӣ ва ҷалби ҷавонон ба фанҳои дақиқро таъкид кард.
Дар қисмати дигари ҷаласа ректори Донишгоҳи давлатии Хуҷанд ба номи академик Бобоҷон Ғафуров М. Набизода дар мавзуи «Мониторинг ва арзёбии сифати таълим дар асоси татбиқи барномаҳои давлатӣ дар соҳаи маориф» баромад намуда, зарурати ҷорӣ намудани низоми ягонаи арзёбии сифати таҳсилотро таъкид кард.
Пас аз муҳокимаи масъалаҳои рӯзнома қарорҳои дахлдор қабул гардида, барои беҳтар намудани сифати таълим, таҳкими пойгоҳи илмӣ ва рушди ҳамкориҳои байналмилалӣ ба муассисаҳои таҳсилоти олӣ супоришҳои мушаххас дода шуданд.
Ҷаласа дар фазои ҳамкории созанда ва масъулияти баланди касбӣ баргузор гардида, ҳамчун қадами муҳим дар самти рушди низоми таҳсилоти олии касбии Ҷумҳурии Тоҷикистон арзёбӣ гардид.
Маркази матбуоти
Вазорати маориф ва илми
Ҷумҳурии Тоҷикистон
Хабарҳои дигар
-
ҒОЛИБОНИ ОЛИМПИАДАИ ҶУМҲУРИЯВӢ МИЁНИ ДОНИШҶӮЁН МУАЙЯН ГАРДИДАНД 8 майи соли 2026 дар Донишгоҳи давлатии ҳуқуқ, бизнес ва сиёсати Тоҷикистон маросими ҷамъбастии Олимпиадаи ҷумҳуриявӣ миёни донишҷӯёни муассисаҳои таҳсилоти олии касбӣ таҳти унвони «Тавоно бувад, ҳар кӣ доно бувад» бахшида ба 35-солагии Истиқлолияти давлатии Ҷумҳурии Тоҷикистон баргузор гардид. Дар маросими ҷамъбастӣ вазири маориф ва илм Раҳим Саидзода суханронӣ намуда, иброз дошт, ки баргузориии олимпиадаи ҷумҳуриявӣ миёни донишҷӯёни муассисаҳои таҳсилоти олии касбӣ ба як падидаи муҳимми илмӣ табдил ёфтааст, ки на танҳо сатҳи дониш ва маҳорати тахассусии ҷавононро муайян месозад, балки муҳити солими рақобатро барои рушди шахсӣ ва афзоиши ҷаҳонбинии илмии онҳо фароҳам овардааст. Сипас, ғолибони олимпиада ба тариқи зайл эълон гардиданд: ҷойи 1-ум - 18 нафар; ҷойи 2-юм - 37 нафар; ҷрйи 3-юм - 60 нафар. Ҳамчунин, 30 нафар бо "Ифтихорнома"-и Вазорати маориф ва илм қадрдонӣ гардиданд. Ғолибони даставӣ: ҷойи аввал – Донишгоҳи миллии Тоҷикистон; ҷойи дуюм – Донишгоҳи давлатии Кӯлоб ба номи А. Рӯдакӣ; ҷойи сеюм – Академияи идоракунии давлатии назди Президенти Ҷумҳурии Тоҷикистон; ҷойи ифтихорӣ – Донишгоҳи давлатии омӯзгории Тоҷикистон ба номи С. Айнӣ. Ёдовар мешавем, ки олимпиадаи мазкур бо иштироки 490 нафар донишҷӯ аз 46 муассисаи таҳсилоти олии касбӣ дар 15 фанни таълимӣ дар ду бахш - илмҳои гуманитарӣ ва илмҳои табиӣ, дақиқу риёзӣ баргузор шуд. Маркази матбуотии Вазорати маориф ва илми Ҷумҳурии Тоҷикистон
16
08.05.2026 -
СЕМИНАРИ ОМӮЗИШӢ ОИД БА ПАРДОХТИ ҒАЙРИНАҚДИИ ИҶОРАИ КИТОБҲОИ ДАРСӢ ДАР НОҲИЯИ РӮШОН БАРГУЗОР ГАРДИД Дар толори маҷлисгоҳи Муассисаи таҳсилоти миёнаи умумии №9-и ноҳияи Рӯшон семинари омӯзишӣ оид ба татбиқи барномаи биллингии пардохти ғайринақдии маблағи иҷораи китобҳои дарсӣ баргузор гардид. Дар семинар мудири шуъбаи маорифи ноҳия З. Ширинбекзода, намояндаи раёсати маорифи Вилояти Мухтори Кӯҳистони Бадахшон Н. Сабзалиева, мушовири бахши китоб, директорон ва китобдорони муассисаҳои таълимӣ иштирок намуданд. Зимни семинар ба иштирокчиён тартиби истифодаи низоми электронӣ, роҳҳои дурусти бақайдгирӣ ва пардохти ғайринақдӣ шарҳ дода шуда, масъалаҳои марбут ба беҳтар намудани хизматрасонӣ дар самти таъмини китобҳои дарсӣ мавриди баррасӣ қарор гирифтанд.
36
08.05.2026 -
АЁДАТИ СОБИҚАДОРОНИ СОҲА Вазири маориф ва илми Ҷумҳурии Тоҷикистон Раҳим Саидзода зимни сафари корӣ ба вилояти Суғд дар шаҳру ноҳияҳои вилоят бо ҳадафи қадрдонӣ аз хизматҳои бисёрсолаи омӯзгорон ва шинос шудан аз ҳолу аҳволи онҳо ба аёдати як қатор омӯзгорони собиқадор рафт. Аз ҷумла, дар ноҳияи Бобоҷон Ғафуров вазири маориф ва илм омӯзгори собиқадор Ҷамолова Норинисо Аҳмадҷоновнаро аёдат намуд. Номбурда 7 майи соли 1947 дар ноҳияи Бобоҷон Ғафуров ба дунё омада, соли 1969 Донишкадаи давлатии шаҳри Хуҷандро хатм намудааст. Фаъолияти меҳнатии худро аз соли 1969 ҳамчун омӯзгори фанҳои химия ва биология дар Муассисаи таҳсилоти миёнаи умумии №29 оғоз намуда, беш аз 50 сол дар тарбияи насли наврас саҳми арзанда гузоштааст. Дар давраҳои гуногун ҳамчун муовини директор оид ба таълим ва директори муассиса фаъолият намуда, бо маҳорати баланди касбӣ ва ҳисси масъулиятшиносӣ дар рушди соҳаи маориф хизмат кардааст. Ҳамзамон, вазир аз ҳолу аҳволи омӯзгори собиқадор Саидов Мирзосаид Саидқулович дидан. Номбурда 23 июни соли 1959 дар ноҳияи Айнӣ таваллуд шуда, соли 1980 Донишкадаи омӯзгории Тоҷикистон ба номи Т.Г. Шевченкоро хатм намудааст. Фаъолияти омӯзгории худро аз соли 1980 оғоз намуда, солҳои тӯлонӣ дар муассисаҳои таҳсилоти миёнаи умумии ноҳияи Айнӣ ва шаҳри Бӯстон ба ҳайси омӯзгори фанни физика фаъолият бурдааст. Аз соли 2014 инҷониб дар Муассисаи таҳсилоти миёнаи умумии №10 фаъолият дошта, дар таълиму тарбияи насли наврас саҳми назаррас мегузорад. Инчунин, дар шаҳри Гулистон вазири маориф ва илм омӯзгори собиқадор Юнусова Нуриниссо Иномҷоновнаро аёдат кард. Юнусова Нуриниссо 23 майи соли 1955 дар ноҳияи Колхозобод (вилояти Хатлон) таваллуд шуда, Донишгоҳи педагогии ба номи Т.Г. Шевченкоро хатм намудааст. Фаъолияти омӯзгории худро аз соли 1973 оғоз намуда, зиёда аз 40 сол дар муассисаҳои таълимии ноҳияҳои Ҷиликӯл (Дӯстӣ), Колхозобод (Ҷ. Балхӣ) ва шаҳри Гулистон ҳамчун омӯзгори синфҳои ибтидоӣ фаъолият кардааст. Зимни суҳбат вазири маориф ва илм саҳми арзишманди омӯзгорони собиқадорро дар тарбияи насли наврас ва рушди соҳаи маориф баланд арзёбӣ намуда, таъкид кард, ки тӯли солҳои соҳибистиқлолӣ соҳаи маориф таҳти сиёсати хирадмандонаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳамчун самти афзалиятнок рушд ёфта, мақому манзалати омӯзгор дар ҷомеа таҳким ёфтааст. Таъкид гардид, ки таҷрибаи ғании омӯзгорони собиқадор ҳамчун сарвати бебаҳои соҳа барои насли ҷавони омӯзгорон мактаби ибрат буда, ҳифз ва интиқоли он ба наслҳои оянда аҳамияти муҳим дорад. Собиқадорон, дар навбати худ, аз таваҷҷуҳ ва ғамхории роҳбарияти давлату Ҳукумат изҳори миннатдорӣ намуда, ба сиёсати маорифпарваронаи давлат баҳои баланд доданд. Маркази матбуоти Вазорати маориф ва илми Ҷумҳурии Тоҷикистон
11
08.05.2026
