07.08.2025

 img

Бо дастгириҳои пайвастаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон соҳаи маориф тадриҷан ба марҳалаи нав ворид гардида, шароити таҳсилу омӯзиш барои фаро гирифтани донишҳои замонавӣ фароҳам оварда шуд.

 

Имрӯз имконот ва шароит барои таҳсил дар ҳамаи зинаҳои таҳсил таъмин гардидааст ва барои ворид гардидан ба таҳсилоти ҷаҳонӣ аз ҷониби давлат ва Ҳукумат мунтазам тадбирҳои судманд андешида мешавад. Аз ин ҷост, ки сол то сол сатҳу сифати таҳсил дар муассисаҳои таълимӣ баланд гардидаву дастоварди хонандагони тоҷик дар озмуну олимпиадаҳои бонуфузи байналмилалӣ назаррас мебошад.

 

Бо рушди технологияи муосир ва ҷорӣ гардидани навгониҳои таълим дар ҷаҳони муосир, соҳаи маорифи кишвар низ ислоҳоти бомаром пайдо мекунад. Ҳадафи ислоҳот аз он иборат аст, ки хонандагон, аз як тараф, ҳамқадами замон бошанд, аз ҷониби дигар, донишҳои муосирро зуд азхуд намоянд. Ба ин мазмун, чандест, ки Вазорати маориф ва илм таҷдиди назар намудани мазмуни таҳсилот ва баҳодиҳӣ ба натиҷаҳои таълим ва омӯзишро дар шароити татбиқи муносибати босалоҳият ва гузаштан ба низоми баҳогузории 10-хола устуворона идома дода истодааст. Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон зим­ни суханронияшон дар Рӯзи дониш ва Дарси сулҳ дар Донишгоҳи давлатии тиббии Хатлон (01.09.2022) дар бораи зарурати гузариш ба низоми баҳодиҳии бисёрхола чунин пешниҳод карданд: «Бо мақсади ворид шудан ба фазои ягонаи таҳсилоти ҷаҳонӣ, муайян намудани сатҳи воқеии дониши хонандагон, ҳавасмандгардонӣ ва омода намудани онҳо дар зинаҳои минбаъдаи таҳсилот вақти он расидааст, ки дар муассисаҳои таҳсилоти умумӣ низоми бисёрхолаи баҳогузорӣ ҷорӣ карда шавад».

 

Мусаллам аст, ки ҷараёни ислоҳоти низоми таҳсилот дар Ҷумҳурии Тоҷикистон, ҷорӣ намудани баҳогузории бисёрхола бо мақсади мутобиқ сохтани низоми арзёбии дониши хонандагон ба меъёрҳои таҳсилоти байналмилалӣ ба шумор меравад. Дар ин замина, Вазорати маориф ва илми ҷумҳурӣ, зерсохторҳои он, олимон, коршиносон ва омӯзгорон афзалиятҳои гузариш ба низоми бисёрхолаи баҳогузориро дар қиёс бо низоми муқаррарии баҳогузории 5-хола чунин арзёбӣ кардаанд:

– дар раванди арзёбӣ аз рӯйи низоми баҳогузории 5-хола омӯзгор танҳо аз чор баҳо – «2» (ғайриқаноатбахш), «3» (миёна), «4» (хуб), «5» (аъло) истифода бурда, ба баҳои «1» эътибор намедиҳад, ки ин омил боиси воқеӣ набудани баҳо ба дониши хонанда гардидааст;

– дар бисёр ҳолатҳо ба ҳаҷми муайяни дониши хонанда як омӯзгор баҳои «3», омӯзгори дигар баҳои «4» мегузорад ё баръакс. Баҳогузорӣ дар чунин вазъият на ба риояи низом ва меъёрҳои арзёбӣ, балки бештар ба ҳолати равонӣ вобастагӣ пайдо мекунад;

– супоришҳое, ки аз тарафи хонанда иҷро карда мешаванд, аз ҳамдигар фарқ доранд, вале ин фарқро дар низоми 5-хола инъикос намудан ғайриимкон аст. Масалан, агар 8 хонанда аз 30 нафар баҳои «5» гиранд, муайян кардани ҷавоби беҳтарин имкон надорад;

– ба арзёбиҳои ташхисӣ, ташаккулдиҳанда ва ҷамъбастӣ дар сатҳи синф таваҷҷуҳи за­рурӣ зоҳир карда намешавад.

 

Дастовардҳои таълимии хонандагон аз рӯйи ҷадвали ифодаи рақамии низоми баҳогузории 10-хола ва меъёрҳои (чаҳор­дараҷаӣ)-и арзёбии сатҳи дониш, малака ва маҳорати хонандагон баҳогузорӣ карда мешаванд. Дараҷаи паст холи (баҳо)-и 1-ро дар бар мегирад, ки ба хонанда аз рӯйи азхудкунии маводи назариявӣ ва татбиқи амалии он дар ҳаҷми пасттарин ҳам таъмин карда нашудааст, гузошта мешавад. Дараҷаи ғайриқаноатбахш – баҳои 2 ба хонандае гузошта мешавад, ки азхудкунии маводи назариявӣ ва татбиқи амалии онро дар сатҳи паст нишон дода, ба хатоҳои ҷиддӣ ва ҷузъии зиёд роҳ медиҳад. Дараҷаи нокифоя – баҳо (хол)-и 3 мебошад, ки дар он хонанда маводи назариявӣ ва амалии таълимиро бо кумаки омӯзгор дар ҳаҷми нокифоя аз худ мекунад, вале дар амал онҳоро татбиқ карда наметавонад. Дараҷаи миёна – баҳо (хол)-и 4 ба хонандае гузошта мешавад, ки мазмуни қисмҳои матн, қоидаҳо, таърифҳо, формулаҳо, қонунҳо ва ғайраро камтар аз ҳадди ақали талаботи барномаи таълим аз худ мекунад;

– хусусиятҳои маводи омӯхташударо пай дар пай баён мекунад…

Ҳамин тавр, баҳои (хол)-и 10 ба он хонандае гузошта мешавад, ки азхудкунии маводи назариявӣ ва татбиқи амалии онро бештар аз талаботи барномаи таълим намоиш медиҳад:

– дар раванди омӯзиш фикру идеяҳои дурустро пешниҳод мекунад ва тавассути муқоиса, таҳлил, хулоса ва қабули қарорҳои дуруст мушкилоти иҷрои супоришро дар вазъияти маъмул ва ғайри­маъмул пурра бартараф месозад.

– малакаҳои эҷодӣ, таҳлилӣ, таҳқиқотӣ ва иртиботии худро рушд медиҳад, ба ягон хато роҳ намедиҳад, аз адабиёти иловагӣ васеъ истифода мебарад.

 

Аз ин рӯ, Вазорати маориф ва илми Ҷумҳурии Тоҷикистон раванди гузаштан ба низоми 10-холаи баҳогузориро тавассути гурӯҳҳои корӣ дар 140 муассисаи таълимӣ роҳандозӣ намуда, аз ҷониби мутахассисони соҳа ба таври амиқ мавриди таҳқиқ ва таҳлилу омӯзиш қарор додааст.

 

Дар «Дастурамал оид ба озмоиши низоми баҳогузории 10-хола ва меъёрҳои арзёбии дониш, малака ва маҳорати хонандагони муассисаҳои таҳсилоти умумии Ҷумҳурии Тоҷикистон (с. 2023)» оварда шудааст, ки натиҷаи арзёбии ҷамъбастии ниҳоӣ дар журнали синфӣ тибқи тартиби муқарраргардида ҳамчун баҳои ҷамъбастии нимсола, солона ва аттестатсия қайд карда мешавад. Баҳогузорӣ ба дониш, малака, маҳорат ва рафтори хонандагони дар шакли рақамии (1,2,3,4,5,6,7,8,9,10) гузошта мешавад. Дар рӯзномаю дафтари кории хонанда баҳогузорӣ дар шакли рақамӣ ва дар қавс ба таври хаттӣ гузошта мешавад: 10 (аъло), 9 (олӣ), 8 (хубтар), 7 (хуб), 6 (кофӣ), 5 (қаноатбахш), 4 (кам), 3 (нокифоя), 2 (паст), 1 (пасттар).

 

Маълум аст, ки соҳаи маориф ҳамвора рушду такомул ёфта, навгониҳои зиёд дар ин самт ба вуҷуд меояд. Аз ин рӯ, низоми баҳогузории 10-хола имкон медиҳад, ки низоми маорифи мо ба меъёрҳои байналмилалии таҳсилот мутобиқ гардад ва ҳангоми баҳогузорӣ шаффофият риоя шавад. Дар илми педагогика ва психология муайян шудааст, ки арзёбии дурусту холисонаи дониши хонанда ба ӯ таъсири руҳию равонӣ мегузорад. Низоми баҳогузории 10-хола имкон медиҳад, ки ба ҳар як хонанда баҳо ба таври воқеӣ гузошта шавад, ки ин омил шавқу рағбати онҳоро ба омӯзиш ва азхуд намудани муҳтавою ғояи китобу дастур ва барномаи таълимӣ зиёд мегардонад.

 

Дарвоқеъ, гузаштан ба низоми баҳогузо­рии 10-хола дар заминаи «Стратегияи миллии рушди маорифи Ҷумҳурии Тоҷикистон то соли 2020», «Стратегияи милии рушди маорифи Ҷумҳурии Тоҷикистон то соли 2030» ва қарори мушовараи Вазорати маориф ва илми Ҷумҳурии Тоҷикистон «Оид ба тасдиқи «Дастурамали меъёрҳои 10-холаи баҳогузорӣ ба дониш, малака ва маҳорати хонандагон» роҳандозӣ мешавад. Бинобар ин, гузаштан ба низоми баҳогузории 10-хола қадами устувор дар масъалаи пешрафти бомароми соҳаи маориф ба ҳисоб рафта, омили муҳим ҷиҳати ворид гардидан ба меъёрҳои байналмилалии таҳсилот мебошад.

 

Хуршед ДАВЛАТАЛИЗОДА,

сардори Маркази матбуоти Вазорати маориф ва илм

  • Низоми баҳогузории 10-хола – заминаи асосии ворид гардидан ба меъёрҳои байналмилалии таҳсилот img

Хабарҳои дигар

  •  img
    Истиқболи Президенти Федератсияи Русия Владимир Путин 20 ноябр Президенти Федератсияи Русия муҳтарам Владимир Путин бо сафари корӣ ба Тоҷикистон ташриф оварданд.   Дар фурудгоҳи байналмилалии Душанбе Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон меҳмони олиқадр – Президенти Федератсияи Русия муҳтарам Владимир Путинро гарму самимӣ истиқбол гирифтанд.   Дар доираи сафари корӣ сарони ду давлат муҳтарам Эмомалӣ Раҳмон ва муҳтарам Владимир Путин нақша доранд, як қатор масоили ҳамкории мавриди таваҷҷуҳи муштаракро баррасӣ намоянд.

    68

    20.11.2026
  •  img
    Мулоқот бо муовини Котиби давлатии ИМА Кристофер Ландау 18 ноябр Президенти Ҷумҳурии Тоҷикистон, Пешвои миллат, муҳтарам Эмомалӣ Раҳмон муовини Котиби давлатии Иёлоти Муттаҳидаи Амрико Кристофер Ландауро ба ҳузур пазируфтанд.   Дар ҷараёни суҳбат масъалаҳои вобаста ба ҳолати кунунӣ ва дурнамои ҳамкории Тоҷикистон ва Иёлоти Муттаҳидаи Амрико баррасӣ шуд.   Таъкид гардид, ки ҳамкории ду кшвар имрӯз доираи васеи соҳаҳои муҳими мавриди таваҷҷуҳи ҳарду ҷониб, аз ҷумла дар самтҳои иқтисоду тиҷорат, сармоягузорӣ, иҷтимоиву гуманитарӣ ва амниятиро дар бар мегиранд.      Ба натиҷаҳои мулоқоти Сарвари давлати мо бо Президенти ИМА ва нишасти сарони давлатҳо дар қолаби “Осиёи Марказӣ – Иёлоти Муттаҳидаи Амрико (C5+1)”, ки соли гузашта дар Вашингтон доир гардиданд, таваҷҷуҳи алоҳида зоҳир карда шуд. Ду ҷониб, ҳамчунин, раванди татбиқи мувофиқаҳои дар зимн бадастомадаро ба баррасӣ гирифтанд.   Ҳамкории дарозмуддати ҷонибҳо дар бахши саноати кӯҳӣ яке аз мавзӯъҳои асосии суҳбат қарор дошт.   Рушди ҳамкории судманд бо ширкатҳои амрикоӣ дар соҳаҳои технологияҳои иттилоотӣ ва зеҳни сунъӣ аз ҷумлаи бахшҳои ояндадори шарикии ду кишвар арзёбӣ гардид.   Ҷонибҳо дар робита ба идомаи ҳамоҳангиҳои мақомоти соҳавии ду кишвар дар самти муқовимат ба терроризм ва экстремизм,  таҳдидҳои киберӣ, қочоқи маводи мухаддир ва аслиҳа, ҳамчунин, ҷиноятҳои муташаккили фаромарзӣ ибрози андеша намуданд.

    44

    18.11.2026
  •  img
    ВОХӮРИИ ВАЗИРИ МАОРИФ ВА ИЛМ БО САФИРИ ДАВЛАТИ КУВАЙТ 17 ноябри соли 2026 дар Вазорати маориф ва илми Ҷумҳурии Тоҷикистон вохӯрии вазири маориф ва илм Раҳим Саидзода бо Сафири Фавқулода ва Мухтори Давлати Кувайт дар Ҷумҳурии Тоҷикистон Муҳаммад Рошид ал-Амирӣ баргузор гардид.   Дар вохӯрӣ муовини якуми вазири маориф ва илм ва намояндагони ҳайати сафорат иштирок намуданд.   Нахуст, вазири маориф ва илм меҳмононро ба Вазорати маориф ва илм хайрамақдам гуфта, барои саҳми арзандаашон дар таҳкими муносибатҳои дӯстона ва густариши ҳамкориҳои судманд миёни Ҷумҳурии Тоҷикистон ва Давлати Кувайт изҳори сипос намуд. Зимни суҳбат вазир таъкид кард, ки муносибатҳои ду кишвар дар тӯли беш аз се даҳсола бар пояи дӯстӣ, эҳтироми мутақобил ва эътимод рушд ёфта, сафари расмии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба Давлати Кувайт моҳи ноябри соли 2024 ба густариши ҳамкориҳои дуҷониба такони тоза бахшид. Ҳамзамон, рушди соҳаи маориф ва илм яке аз самтҳои ояндадори ҳамкориҳои ду кишвар арзёбӣ гардид.   Дар идома вазир оид ба афзалиятҳои сиёсати давлатӣ дар соҳаи маориф, аз ҷумла, бунёду таҷдиди муассисаҳои таълимӣ, баланд бардоштани сифати таҳсил ва омода намудани мутахассисони ҷавобгӯ ба талаботи иқтисоди миллӣ ибрози андеша намуда, ҷиҳати тақвияти ҳамкориҳо як қатор пешниҳодҳоро манзур кард. Аз ҷумла, масъалаҳои густариши робитаҳои мустақим миёни муассисаҳои таҳсилоти олии касбии ду кишвар, табодули донишҷӯёну омӯзгорон, анҷом додани таҳқиқоти муштарак, зиёд намудани шумораи бурсияҳои таҳсилӣ аз рӯйи ихтисосҳои муҳандисӣ, тиббӣ, технологияҳои иттилоотӣ ва илмҳои дақиқ, инчунин ҷалби маблағгузории иловагӣ барои сохтмон ва азнавсозии муассисаҳои таълимӣ мавриди баррасӣ қарор гирифтанд. Вазир ҳамчунин барои дастгирии Ҳукумати Давлати Кувайт ва Фонди Кувайтии рушди иқтисодии араб дар самти сохтмон ва муҷаҳҳазгардонии муассисаҳои таълимӣ изҳори миннатдорӣ намуд.   Сипас, Сафири Фавқулода ва Мухтори Давлати Кувайт дар Ҷумҳурии Тоҷикистон Муҳаммад Рошид ал-Амирӣ суханронӣ намуда, аз сатҳи муносибатҳои дӯстона ва ҳамкориҳои судманди Тоҷикистону Кувайт изҳори қаноатмандӣ кард. Мавсуф таъкид дошт, ки робитаҳои ду кишвар дар соҳаҳои гуногун бар пояи эҳтироми мутақобил ва манфиатҳои муштарак рушд намуда, соҳаи маориф ва илм яке аз самтҳои муҳимми ҳамкориҳои дуҷониба ба ҳисоб меравад. Ҳамзамон, ӯ омодагии ҷониби Кувайтро ҷиҳати тақвияти ҳамкориҳо дар ин соҳа ва дастгирии ташаббусҳои пешниҳодшуда иброз дошта, таъкид намуд, ки ҷониби Кувайт барои рушди минбаъдаи ҳамкориҳо дар самтҳои гуногун омода мебошад.   Дар фарҷоми вохӯрӣ ҷонибҳо масъалаҳои марбут ба густариши ҳамкориҳои дуҷониба, роҳҳои амалисозии пешниҳодҳои зикршуда ва тақвияти робитаҳои минбаъда миёни муассисаҳои таълимӣ ва илмии ду кишварро баррасӣ намуда, ҷиҳати идомаи ҳамкориҳои судманд изҳори омодагӣ карданд.   Маркази матбуоти Вазорати маориф ва илми Ҷумҳурии Тоҷикистон

    50

    17.11.2026