Бо мақсади иҷрои дастури Вазорати маориф ва илми Ҷумҳурии Тоҷикистон ҷиҳати тақвияти корҳои тарғиботию ташвиқотӣ миёни ҷавонон, ташкил ва баргузории чорабиниҳои фарҳангию фароғатӣ ва таъмини сайру гашти донишҷӯён дар боғҳои фарҳангию фароғатии пойтахт, шоми 3 августи соли 2026 дар Боғи фарҳангӣ-фароғатии ба номи Ҷомӣ ва Навоӣ чорабинии идонаи фарҳангии Донишгоҳи миллии Тоҷикистон баргузор гардид.

Дар барномаи фарҳангӣ ҳунармандони Ансамбли халқии «Наврӯз»-и Донишгоҳи миллии Тоҷикистон, роҳбари бадеии ансамбл Ҷумахони Қурбон, Ҳусайни Шариф, Дӯстмуроди Раҷаб, Нодирҷони Исматулло, Баҳроми Тоир, Насими Абдурасул ва узви фаъоли ансамбл, донишҷӯи факултети механикаю математика Маҳмадуллоҳи Ориф бо иҷрои суруду таронаҳои ватандӯстона ва мардумӣ ҳунарнамоӣ карданд.

Чорабиниро корманди Донишгоҳи миллии Тоҷикистон, шоир ва рӯзноманигор, узви Иттифоқи нависандагони Тоҷикистон Бахтиёр Раҳмониён ҳусни оғоз бахшида, аз номи роҳбарияти Донишгоҳ сокинону меҳмонони пойтахтро хайрамақдам гуфт. Мавсуф зимни суханронии худ аз аҳаммияти чунин чорабиниҳои фарҳангӣ дар таҳкими худшиносии миллӣ, боло бурдани завқи эстетикии ҷавонон ва тарғиби арзишҳои фарҳангии миллат ёдовар шуда, аз ашъори худ ва дигар шоирони тоҷик дар васфи Истиқлоли давлатии Ҷумҳурии Тоҷикистон, Ватан ва сиёсати созандаи Пешвои миллат муҳтарам Эмомалӣ Раҳмон порчаҳо қироат намуд.

Роҳбари бадеии Ансамбли халқии «Наврӯз» Ҷумахони Қурбон низ баргузор гардидани чунин чорабиниҳоро барои ғанӣ гардонидани фазои фарҳангии пойтахт ва таҳкими робитаи аҳли ҳунар бо ҷомеа муҳим арзёбӣ кард.

Дар идомаи барнома ҳунармандони ансамбл бо пешниҳоди суруду таронаҳои дилнишин ба чорабинӣ шукуҳу таровати тоза бахшиданд. Сокинон ва меҳмонони пойтахт аз барномаи рангини ҳунарӣ истиқболи гарму самимӣ намуда, бо сарояндагон аксҳои хотиравӣ гирифтанд.