13.03.2026
13 марти соли 2026, дар ҳошияи Форуми сеюми ректорони муассисаҳои таҳсилоти олии Ҷумҳурии Тоҷикистон ва Ҷумҳурии Ӯзбекистон дар Донишгоҳи давлатии омӯзгории Тоҷикистон ба номи Садриддин Айнӣ вохӯрии вазири маориф ва илми Ҷумҳурии Тоҷикистон Раҳим Саидзода бо вазири таҳсилоти олӣ, илм ва инноватсияи Ҷумҳурии Ӯзбекистон Қунғратбой Шарипов баргузор гардид.
Зимни мулоқот ҷонибҳо масъалаҳои муҳимми густариши ҳамкориҳои дуҷониба дар соҳаи маориф ва илм, рушди робитаҳои байни донишгоҳҳои ду кишвар, татбиқи барномаҳои муштараки таълимӣ, густариши табодули донишҷӯёну омӯзгорон ва амалисозии лоиҳаҳои муштараки илмиро мавриди баррасӣ қарор доданд.
Вазири маориф ва илми Ҷумҳурии Тоҷикистон меҳмононро ба Тоҷикистон хайрамақдам гуфта, таъкид намуд, ки муносибатҳои ду кишвар дар соҳаи маориф ва илм имрӯз ба марҳилаи сифатан нав ворид шуда, имзои созишномаҳои байниҳукуматӣ, таъсиси факултетҳои муштарак, татбиқи барномаҳои мубодилаи академӣ ва афзоиши ҳамкориҳои мустақими донишгоҳҳо гувоҳи равшани таҳкими робитаҳои илмию таълимии Тоҷикистону Ӯзбекистон мебошад.
Таъкид гардид, ки заминаи асосии густариши муносибатҳои дӯстона ва ҳамкориҳои самараноки Тоҷикистону Ӯзбекистон дар соҳаҳои гуногун, аз ҷумла маориф ва илм, сиёсати хирадмандона ва созандаи сарони ду давлат - Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Ӯзекистон муҳтарам Шавкат Мирзиёев мебошад. Маҳз бо ташаббус ва иродаи сиёсии роҳбарони ду кишвар муносибатҳои дуҷониба ба марҳилаи нави рушд ворид гардида, ҳамкориҳо дар соҳаҳои илм, маориф, фарҳанг ва дигар самтҳои муҳим ба таври бесобиқа густариш ёфтаанд.
Ҳамзамон зикр гардид, ки Ҷумҳурии Ӯзбекистон яке аз шарикони муҳимми Ҷумҳурии Тоҷикистон дар соҳаи маориф ва илм ба ҳисоб меравад ва донишгоҳҳои Тоҷикистон пайваста бо муассисаҳои таҳсилоти олии Ӯзбекистон созишномаҳои нави ҳамкорӣ ба имзо мерасонанд.
Дар навбати худ, вазири таҳсилоти олӣ, илм ва инноватсияи Ҷумҳурии Ӯзбекистон аз сатҳи баланди ҳамкориҳои ду кишвар дар соҳаи маориф изҳори қаноатмандӣ намуда, таъкид кард, ки густариши ҳамкориҳои байни донишгоҳҳои Тоҷикистон ва Ӯзбекистон барои таҳкими робитаҳои илмӣ, табодули таҷриба ва татбиқи барномаҳои муштараки таълимӣ аҳамияти муҳим дорад.
Изҳори боварӣ карда шуд, ки баргузории форуми навбатии ректорон ба таҳкими бештари робитаҳои илмию таълимӣ, рушди сармояи инсонӣ ва омодасозии мутахассисони баландихтисос барои рушди устувори ду кишвар мусоидат хоҳад кард.
Хабарҳои дигар
-
ҲАМОИШИ ИДОНА ТАҲТИ УНВОНИ «БАҲОРИ МАЪРИФАТ: МОДАР, ҚАЛАМ ВА НАВРӮЗ» 13 марти соли 2026 бо дастгирии Вазорати маориф ва илми Ҷумҳурии Тоҷикистон ва ташаббуси маҷаллаи «Маърифати омӯзгор» ба муносибати Рӯзи модар, Рӯзи матбуоти тоҷик ва фарорасии Ҷашни байналмилалии Наврӯз ҳамоиши идона таҳти унвони «Баҳори маърифат: модар, қалам ва Наврӯз» баргузор гардид. Дар ҳамоиш муовини якуми вазири маориф ва илми Ҷумҳурии Тоҷикистон Ҳомид Ҳошимзода, сармуҳаррири маҷаллаи «Маърифати омӯзгор» Дилафрӯз Қурбонзода, муовини директори Китобхонаи миллии Тоҷикистон Муҳаммадиқбол Атозода, устоди Донишгоҳи давлатии омӯзгории Тоҷикистон ба номи Садриддин Айнӣ, профессор Саъдӣ Қосимӣ, ходими Институти забон ва адабиёти ба номи А. Рӯдакии Академияи миллии илмҳои Тоҷикистон Олим Бухориев, сармуҳаррири ҳафтаномаи «Омӯзгор» Эҳсон Сафарзода, сармуҳаррири маҷаллаи «Маорифи Тоҷикистон» Ноилшоҳ Нурализода, инчунин, роҳбарони муассисаҳои таълимӣ, устодону омӯзгорон, аҳли қалам ва муаллифони фаъоли маҷалла ширкат варзиданд. Ҳамоиш бо сухани ифтитоҳии сармуҳаррири маҷаллаи «Маърифати омӯзгор» оғоз гардид. Мавсуф меҳмонон ва иштирокдорони чорабиниро хайрамақдам гуфта, баргузории чунин ҳамоишро дар арҷгузорӣ ба арзишҳои миллӣ, таҳкими робитаҳои эҷодиву маърифатӣ ва қадршиносии аҳли илму маориф амри зарурӣ донист. Сипас, муовини якуми вазири маориф ва илми Ҷумҳурии Тоҷикистон суханронӣ намуда, ҳозиринро ба муносибати ҷашнҳои фархунда табрик гуфт. Номбурда таъкид кард, ки Наврӯз яке аз куҳантарин ҷашнҳои тамаддуни башар буда, рамзи эҳёи табиат, оғози фасли баҳор ва таҷдиди зиндагӣ маҳсуб меёбад. Арзишҳои маънавии Наврӯз инсонро ба некандешӣ, меҳнатдӯстӣ ва созандагӣ ҳидоят намуда, бо ғояҳои илму маърифат ва тарбияи инсон ҳамоҳанг мебошанд. Ҳамзамон, зикр гардид, ки давлат ва Ҳукумати Ҷумҳурии Тоҷикистон таҳти роҳбарии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба рушди соҳаи маориф ва илм таваҷҷуҳи хосса зоҳир намуда, баланд бардоштани сатҳи дониш ва маърифати ҷомеаро яке аз самтҳои афзалиятноки сиёсати давлатӣ медонанд. Дар ин замина, нақши омӯзгорон дар тарбияи насли донишманду ватандӯст ва инчунин, саҳми воситаҳои ахбори омма дар тарғиби таҷрибаи пешқадами омӯзгорӣ ва инъикоси дастовардҳои соҳаи маориф муҳим арзёбӣ гардид. Дар идомаи ҳамоиш ходими Институти забон ва адабиёти ба номи А. Рӯдакии АМИТ О. Бухориев дар мавзуи «Нақши зан-модар дар таълим ва тарбия» суханронӣ намуда, мақому манзалати модарро дар тарбияи фарзанд ва ташаккули ҷомеаи солим басо арзишманд хонд. Сипас, сармуҳаррири маҷаллаи «Маорифи Тоҷикистон» дар мавзуи «Дониш ва омӯзгор» - ниҳоли тозае дар боғи матбуоти тоҷик» маъруза намуда, бо ёдоварӣ аз таърих, марҳилаҳои ташаккул ва фаъолияти имрӯзаи маҷаллаи «Маърифати омӯзгор» нақши матбуоти соҳавиро дар рушди матбуоти миллӣ ва инъикоси масъалаҳои соҳаи маориф мавриди баррасӣ қарор дод. Муовини директори Китобхонаи миллии Тоҷикистон зимни маърузаи худ дар мавзуи «Заминаҳои пайдоиши нахустрӯзномаи тоҷикии «Бухорои Шариф» ва ташаккули матбуоти миллӣ» аз таърихи пайдоиш ва аҳаммияти аввалин рӯзномаи тоҷикӣ дар рушди ҳаёти фарҳангиву иҷтимоии ҷомеа ёдовар шуд. Дар идома, устоди Донишгоҳи давлатии омӯзгории Тоҷикистон ба номи Садриддин Айнӣ, профессор С. Қосимӣ дар мавзуи «Истиқлоли давлатӣ ва ҷашни Наврӯз» суханронӣ намуда, таъкид кард, ки бо шарофати Истиқлоли давлатӣ арзишҳои фарҳангии миллӣ, аз ҷумла, Наврӯз, эҳё гардида, ба рамзи худшиносии миллӣ ва ваҳдати ҷомеа табдил ёфтааст. Дар қисмати дигари ҳамоиш сармуҳаррири ҳафтаномаи «Омӯзгор», муҳаррири маҷаллаи «Маорифи Тоҷикистон» С. Набиева ва омӯзгори Академияи идоракунии давлатии назди Президенти Ҷумҳурии Тоҷикистон С. Мавлоназаров оид ба мавзуъҳои мавриди назари ҳамоиш андешаронӣ намуданд. Дар ҷараёни ҳамоиш барномаи фарҳангӣ низ пешниҳод гардид. Аз ҷумла, суруди «Омӯзгор» дар иҷрои С. Раҷабзода, суруди «Сарварам» дар иҷрои Д.Шеров, қироати шеър аз ҷониби тарбиягирандагони кӯдакистони №1-и ноҳияи Шоҳмансури шаҳри Душанбе таҳти унвони «Меҳри модар» ва рақс дар иҷрои хонандаи МТМУ №102 ба чорабинӣ шукӯҳу шаҳомати тоза бахшид. Дар хотимаи ҳамоиш як қатор кормандони соҳаи маориф, аҳли қалам, омӯзгорон ва муаллифони фаъоли маҷаллаи «Маърифати омӯзгор» барои саҳми арзанда дар рушди соҳаи маориф ва ҳамкории судманд бо нашрия бо Сипоснома ва туҳфаҳои хотиравӣ қадрдонӣ гардиданд.
18
13.03.2026 -
ШОМИ ФАРҲАНГИИ СЕЮМИН ФОРУМИ РЕКТОРОНИ МУАССИСАҲОИ ТАҲСИЛОТИ ОЛИИ ҶУМҲУРИИ ТОҶИКИСТОН ВА ҶУМҲУРИИ ӮЗБЕКИСТОН Дар доираи баргузории сеюмин Форуми ректорони муассисаҳои таҳсилоти олии Ҷумҳурии Тоҷикистон ва Ҷумҳурии Ӯзбекистон шоми фарҳангӣ бо иштироки намояндагони муассисаҳои таҳсилоти олии ду кишвар баргузор гардид. Барномаи фарҳангӣ аз ҷониби ҳунармандони ансамбли “Чеҳранамо”-и Донишгоҳи давлатии омӯзгории Тоҷикистон ба номи Садриддин Айнӣ, инчунин дигар сарояндагон ва дастаҳои рақсии кишвар пешниҳоди меҳмонон гардонида шуд. Дар рафти шоми фарҳангӣ суруду оҳангҳои дилнишин ва рақсу таронаҳои миллӣ пешкаш гардида, фарҳангу санъати ғании тоҷиконро бозгӯ намуданд. Ҳунармандон бо иҷрои барномаҳои рангини худ фазои дӯстӣ, ҳамдигарфаҳмӣ ва ҳамбастагиро миёни иштирокдорони форум боз ҳам таҳким бахшиданд. Меҳмонони форум, аз ҷумла ректорон ва намояндагони муассисаҳои таҳсилоти олии ду кишвар, аз барномаи фарҳангӣ таассуроти нек бардошта, онро намунаи равшани ғановати фарҳанг ва суннатҳои миллии тоҷикон арзёбӣ намуданд. Албатта баргузории чунин чорабиниҳои фарҳангӣ дар доираи форумҳо ба таҳкими робитаҳои дӯстона, густариши ҳамкориҳои илмӣ ва фарҳангии миёни муассисаҳои таҳсилоти олии Тоҷикистону Ӯзбекистон мусоидат менамояд.
21
13.03.2026 -
СЕЮМИН ФОРУМИ РЕКТОРОНИ МУАССИСАҲОИ ТАҲСИЛОТИ ОЛИИ ҶУМҲУРИИ ТОҶИКИСТОН ВА ҶУМҲУРИИ ӮЗБЕКИСТОН Имрӯз, 13 марти соли 2026 дар Донишгоҳи давлатии омӯзгории Тоҷикистон ба номи Садриддин Айнӣ сеюмин Форуми ректорони муассисаҳои таҳсилоти олии Ҷумҳурии Тоҷикистон ва Ҷумҳурии Узбекистон таҳти унвони «Таҳсилоти олӣ ва илми Тоҷикистон ва Ӯзбекистон: уфуқҳои нави ҳамкорӣ» баргузор гардид. Чорабинии мазкур бо ташаббуси Вазорати маориф ва илми Ҷумҳурии Тоҷикистон ва Вазорати таҳсилоти олӣ, илм ва инноватсияи Ҷумҳурии Ӯзбекистон доир шуда, ҳамчун майдони муҳимми муколамаи илмӣ ва академӣ барои густариши ҳамкориҳои миёни донишгоҳҳои ду кишвар арзёбӣ гардид. Форум бо ҳадафи таҳкими ҳамкориҳои байнидавлатӣ дар соҳаи маорифи олӣ ва илм, рушди робитаҳои академӣ, густариши табодули таҷриба ва ташаккули фазои ягонаи таълимӣ миёни муассисаҳои таҳсилоти олии Тоҷикистон ва Ӯзбекистон баргузор гардид. Дар маросими ифтитоҳи форум вазири маориф ва илми Ҷумҳурии Тоҷикистон Раҳим Саидзода, вазири таҳсилоти олӣ, илм ва инноватсияҳои Ҷумҳурии Ӯзбекистон Қунғратбой Шарипов, Сафири Фавқулода ва Мухтори Ҷумҳурии Ӯзбекистон дар Ҷумҳурии Тоҷикистон Эргаш Шоисматов, муовинони вазири маориф ва илми Ҷумҳурии Тоҷикистон, инчунин ректорони донишгоҳҳо ва намояндагони ҷомеаи илмии ду кишвар иштирок намуданд. Вазири маориф ва илми Ҷумҳурии Тоҷикистон зимни суханронии худ меҳмононро хайрамақдам гуфта, баргузории чунин форумҳоро қадами муҳим дар таҳкими ҳамкориҳои илмию таълимӣ миёни ду кишвари дӯсту ҳамсоя арзёбӣ намуд. Ба гуфтаи вазир чунин чорабиниҳо дар баробари мусоидат ба рушди робитаҳои байнидонишгоҳӣ барои наздиктар гардидани халқҳои бародар ва таҳкими робитаҳои гуманитарӣ заминаи мусоид фароҳам меоранд. Ҷумҳурии Ӯзбекистон яке аз шарикони муҳимми Ҷумҳурии Тоҷикистон дар соҳаи маориф ва илм ба ҳисоб рафта, ҳамкориҳои ду кишвар дар ин самт ба заминаи устувори ҳуқуқӣ ва созишномаҳои байнидавлатӣ такя мекунад. Ҳамчунин дар маросими ифтитоҳи форум вазири таҳсилоти олӣ, илм ва инноватсияи Ҷумҳурии Ӯзбекистон суханронӣ намуда, аз ташкили чунин чорабинии муҳим истиқбол кард. Ӯ таъкид намуд, ки ҳамкориҳои илмӣ ва таълимӣ миёни донишгоҳҳои ду кишвар дар солҳои охир ба таври назаррас густариш ёфта, барои рушди таҳқиқоти муштарак, табодули донишҷӯёну омӯзгорон ва татбиқи барномаҳои муштараки таълимӣ заминаи мусоид фароҳам овардааст. Ба гуфтаи ӯ, форумҳои ректорон имконияти хубе барои табодули таҷриба, баррасии масъалаҳои мубрами рушди таҳсилоти олӣ ва муайян намудани самтҳои нави ҳамкориҳо миёни донишгоҳҳои Тоҷикистону Ӯзбекистон мебошанд. Дар идомаи маросими ифтитоҳӣ Сафири Фавқулода ва Мухтори Ҷумҳурии Узбекистон дар Ҷумҳурии Тоҷикистон баромад намуда, изҳор дошт, ки муносибатҳои дӯстона ва ҳамкориҳои судманди Тоҷикистону Ӯзбекистон дар солҳои охир ба сатҳи нав баромада, бахши маориф ва илм дар ин раванд мавқеи муҳим дорад. Ба таъкиди ӯ, густариши ҳамкориҳо миёни донишгоҳҳои ду кишвар, амалисозии барномаҳои муштараки таълимӣ ва таҳқиқоти илмӣ ба таҳкими робитаҳои фарҳангию гуманитарӣ ва рушди устувори минтақа мусоидат менамояд. Дар рафти рафти форум зикр шуд, ки соҳаи маориф яке аз самтҳои калидии ҳамкориҳои стратегӣ миёни Тоҷикистон ва Ӯзбекистон ба шумор меравад. Рушди ҳамкориҳои академӣ ба баланд бардоштани сифати омодасозии мутахассисон, таҳкими робитаҳои фарҳангӣ ва гуманитарии байни халқҳои ду кишвар нақши муҳим мебозад. Татбиқи барномаҳои муштараки таълимӣ, анҷом додани таҳқиқоти илмии муштарак, табодули донишҷӯён ва омӯзгорон, инчунин ҳамкории мустақими донишгоҳҳо заминаи боэътимод барои ташаккули фазои ягонаи академӣ ва омодасозии кадрҳои рақобатпазирро фароҳам меорад. Гуфта шуд, ки имрӯз ҳамкориҳои донишгоҳҳои Тоҷикистон ва Узбекистон ба таври фаъол рушд ёфта, хусусияти амалӣ касб намудаанд. Барномаҳои табодули академӣ, лоиҳаҳои муштараки таълимӣ ва таҳқиқоти илмӣ ба таври васеъ татбиқ гардида, баргузории форумҳои ректорон, конференсияҳои илмӣ ва дигар чорабиниҳои байналмилалӣ ба густариши робитаҳои мустақим миёни донишгоҳҳо мусоидат менамояд. Баргузории ду форуми қаблии ректорони донишгоҳҳои Тоҷикистон ва Ӯзбекистон дар Душанбе ва Тошканд, таъсиси факултети муштарак миёни Донишгоҳи давлатии ҳуқуқ, бизнес ва сиёсати Тоҷикистон ва Донишгоҳи давлатии иқтисодии Тошканд, инчунин, амалисозии барномаҳои табодули омӯзгорону донишҷӯён намунаи равшани таҳкими робитаҳои илмию таълимии ду кишвар мебошанд. Дар айни замон донишгоҳҳои Ҷумҳурии Тоҷикистон бо донишгоҳҳои Ҷумҳурии Ӯзбекистон зиёда аз 100 созишномаи ҳамкорӣ ба имзо расонидаанд, ки ин заминаи устувор барои рушди минбаъдаи ҳамкориҳои илмӣ ва академии ду кишвар мебошад. Дар идомаи форум ректорони як қатор донишгоҳҳои Тоҷикистон ва Ӯзбекистон бо маърузаҳо баромад намуда, масъалаҳои муҳимми рушди ҳамкориҳои илмӣ, густариши барномаҳои таълимии муштарак, рушди таҳқиқоти илмӣ ва татбиқи лоиҳаҳои инноватсиониро баррасӣ карданд. Ҳамчунин, дар доираи чорабинӣ маросими имзои созишномаҳои нави ҳамкорӣ миёни донишгоҳҳои Ҷумҳурии Тоҷикистон ва Ҷумҳурии Ӯзбекистон баргузор гардид, ки ба густариши робитаҳои академӣ ва рушди барномаҳои муштараки таълимӣ мусоидат хоҳад кард. Иштирокчиёни форум таъкид намуданд, ки густариши ҳамкориҳои миёни донишгоҳҳои Тоҷикистон ва Ӯзбекистон барои рушди илму маориф, омодасозии кадрҳои баландихтисос ва таҳкими муносибатҳои дӯстонаи ду кишвари ҳамсоя аҳаммияти муҳим дорад.
17
13.03.2026
