12.11.2026

 img

Имрӯз 12 ноябри соли 2026 дар Китобхонаи миллии Тоҷикистон маросими ифтитоҳи даври ниҳоии озмуни ҷумҳуриявии «Фурӯғи субҳи доноӣ китоб аст» баргузор гардид.

 

Дар маросими ифтитоҳ вазири маориф ва илми Ҷумҳурии Тоҷикистон Раҳим Саидзода, сардори раёсати маориф, фарҳанг ва иттилооти Дастгоҳи иҷроияи Президенти Ҷумҳурии Тоҷикистон Сайдулло Қувватзода , муовинони вазир, намояндагони вазорату кумитаҳои дахлдор, роҳбарияти Китобхонаи миллӣ, аъзои комиссияи ҷумҳуриявии озмун, иштирокчиён ва дигар масъулон иштирок намуданд.

 

Нахуст, вазири маориф ва илм аҳли адаб, масъулони озмун ва меҳмононро ба муносибати оғози даври ниҳоӣ табрик намуда, таъкид кард, ки баргузории он дар остонаи таҷлили Рӯзи Президенти Ҷумҳурии Тоҷикистон ва солгарди Иҷлосияи XVI Шурои Олии Ҷумҳурии Тоҷикистон дорои аҳаммияти хосси рамзӣ ва маънавӣ мебошад.

 

Зикр гардид, ки бо иқдоми хирадмандонаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон озмуни ҷумҳуриявии «Фурӯғи субҳи доноӣ китоб аст» ба ҳаракати фарогири маърифатӣ ва фарҳангӣ табдил ёфта, дар бедор намудани завқи китобхонӣ, баланд бардоштани сатҳи маърифати ҷомеа, таҳкими худшиносиву худогоҳии миллӣ ва дарёфти истеъдодҳои нав нақши муҳим дорад.

 

Таъкид шуд, ки дар шароити ҷаҳони муосир, ки ҷомеа бо ҷараёни густурдаи иттилоот ва таъсири гуногуни фарҳангӣ рӯ ба рӯ мебошад, китоб яке аз воситаҳои муҳимми ҳифзи ҳувият, арзишҳо ва фарҳанги миллӣ ба шумор меравад. Ҳадафи асосии баргузории озмун низ дарёфти чеҳраҳои нави соҳибистеъдод, тарбияи насли донишманду китобдӯст, тарғиби илму дониш, адабиёту фарҳанг ва арҷгузорӣ ба таърихи пурифтихори миллати тоҷик мебошад.

 

Сипас, сардори раёсати маориф, фарҳанг ва иттилооти Дастгоҳи иҷроияи Президенти Ҷумҳурии Тоҷикистон ҳозиринро ба муносибати Рӯзи Парчами давлатии Ҷумҳурии Тоҷикистон ва Рӯзи Президенти Ҷумҳурии Тоҷикистон табрик гуфта, иброз дошт, ки озмуни мазкур аз соли 2019 инҷониб ҳамасола бо мақсади баланд бардоштани маърифати ҷомеа, ҷалби наврасону ҷавонон ва дигар қишрҳои аҳолӣ ба китобхонӣ, тақвияти ҳисси худшиносиву худогоҳии миллӣ ва дарёфти истеъдодҳои нав баргузор мегардад.

 

Мавсуф таъкид намуд, ки озмун дар ташаккули фарҳанги китобхонӣ ва табдил додани мутолиа ба ҷузъи ҷудонашавандаи ҳаёти ҷомеа саҳми назаррас дорад. Иштироки намояндагони қишрҳои гуногуни ҷомеа, аз ҷумла, хонандагону донишҷӯён, омӯзгорон, ходимони илму адаб, фарҳангу санъат, калонсолон ва намояндагони дигар касбу кор далели густариши таваҷҷуҳи ҷомеа ба ин иқдоми маърифатӣ мебошад.

 

Ҳамзамон, бо назардошти ҷамъбастӣ будани даври мазкур, таъмини шаффофият, риояи талаботи низомномаи озмун ва баҳогузории холисонаву одилонаи дониш ва маҳорати довталабон аз вазифаҳои муҳимми комиссияи ҷумҳуриявӣ ва масъулони баргузории озмун арзёбӣ гардид.

 

Дар идома вазири маориф ва илм иброз дошт, ки озмуни «Фурӯғи субҳи доноӣ китоб аст» дар тӯли баргузории худ тавонистааст чеҳраҳои нави соҳибистеъдодро муаррифӣ намуда, муҳаббати насли наврасу ҷавон ва қишрҳои гуногуни ҷомеаро ба китоб, забони тоҷикӣ ва забонҳои хориҷӣ тақвият бахшад. Ҳамзамон, он дар тарбияи ҳисси ватандӯстӣ, худшиносии миллӣ ва баланд бардоштани маърифати сиёсиву фарҳангии шаҳрвандон нақши муассир гузоштааст.

 

Дар фарҷом ба довталабон, омӯзгорон, аъзои ҳакамон ва масъулони озмун барору комёбӣ таманно карда шуд.

 

Ёдовар мешавем, ки дар даври ниҳоии озмуни ҷумҳуриявии «Фурӯғи субҳи доноӣ китоб аст» 562 нафар довталаб иштирок менамоянд.

 

Маркази матбуоти

Вазорати маориф ва илми

Ҷумҳурии Тоҷикистон

  • МАРОСИМИ ИФТИТОҲИ ДАВРИ НИҲОИИ ОЗМУНИ ҶУМҲУРИЯВИИ “ФУРӮҒИ СУБҲИ ДОНОӢ КИТОБ АСТ” img
  • МАРОСИМИ ИФТИТОҲИ ДАВРИ НИҲОИИ ОЗМУНИ ҶУМҲУРИЯВИИ “ФУРӮҒИ СУБҲИ ДОНОӢ КИТОБ АСТ” img
  • МАРОСИМИ ИФТИТОҲИ ДАВРИ НИҲОИИ ОЗМУНИ ҶУМҲУРИЯВИИ “ФУРӮҒИ СУБҲИ ДОНОӢ КИТОБ АСТ” img
  • МАРОСИМИ ИФТИТОҲИ ДАВРИ НИҲОИИ ОЗМУНИ ҶУМҲУРИЯВИИ “ФУРӮҒИ СУБҲИ ДОНОӢ КИТОБ АСТ” img
  • МАРОСИМИ ИФТИТОҲИ ДАВРИ НИҲОИИ ОЗМУНИ ҶУМҲУРИЯВИИ “ФУРӮҒИ СУБҲИ ДОНОӢ КИТОБ АСТ” img
  • МАРОСИМИ ИФТИТОҲИ ДАВРИ НИҲОИИ ОЗМУНИ ҶУМҲУРИЯВИИ “ФУРӮҒИ СУБҲИ ДОНОӢ КИТОБ АСТ” img

Хабарҳои дигар

  •  img
    Терроризм ва экстремизм – хатар ба амнияти ҷомеа Дар ҷаҳони муосир терроризм ва экстремизм аз ҷумлаи хатарҳои ҷиддӣ ба шумор рафта, ба амнияти башар, сулҳу суботи ҷомеа ва рушди устувори давлатҳо таъсири манфӣ мерасонад.   Паҳншавии ғояҳои ифротӣ, истифодаи зӯроварӣ барои расидан ба ҳадафҳои нопоки сиёсиву мафкуравӣ аз ҷониби бархе аз ҳизбу ҳаракатҳои ғайриқонунӣ пайомадҳои ҷиддии иҷтимоӣ, равонӣ ва маънавӣ низ ба вуҷуд меоранд.   Мубориза бо ин зуҳурот дар шароити рушди босуръати технологияҳои иттилоотӣ ва густариши шабакаҳои иҷтимоӣ аҳаммияти бештар пайдо кардааст. Имрӯз иттилооти бардурӯғ, таблиғоти ғаразнок ва талқини ақидаҳои носолим метавонад дар муҳити маҷозӣ ба зудӣ паҳн шуда, ба ҷаҳонбинӣ ва рафтори баъзе афрод таъсири манфӣ расонад. Аз ин рӯ, масъалаи муқовимат ба терроризм ва экстремизм танҳо вазифаи мақомоти ҳифзи ҳуқуқ набуда, дар пешгирии он бояд дигар сохторҳои давлатӣ, аз ҷумла, муассисаҳои таълимӣ, оила, воситаҳои ахбори омма ва ҷомеаи шаҳрвандӣ низ саҳмгузор бошанд.   Яке аз омилҳои муҳимми осебпазирии шаҳрвадон ин сатҳи нокифояи дониш ва малакаи таҳлил намудани иттилоот мебошад. Агар шахс манбаи хабарро насанҷад, далелҳоро бо маълумоти дигар муқоиса накунад ва ҳар паёми эҳсосангезро ҳамчун ҳақиқат қабул намояд, эҳтимоли осебпазирӣ ва шомилшавии ӯ ба гурӯҳҳои иртиҷоӣ зиёд шуда метавонад.   Имрӯз шабакаҳои иҷтимоӣ ба яке аз майдонҳои таъсиррасонӣ ба ҷаҳонбинии шаҳрвадон, махсусан, ҷавонон табдил ёфтааст. Дар ин фазо иттилооти гуногун, аз ҷумла, овозаҳо, хабарҳои бардурӯғ, наворҳои таҳрифшуда ва паёмҳои эҳсосангез паҳн мешаванд. Баъзе таблиғгарон аз ин фурсат истифода бурда, афродро ба қабули ақидаҳои тундгароёна водор карданӣ мешаванд.   Дар чунин шароит саводи расонаӣ ва тафаккури интиқодӣ аҳаммияти махсус пайдо мекунанд. Ҷавонон бояд, пеш аз ҳама, манбаи иттилоотро муайян кунанд, сана ва муҳтавои хабарро бисанҷанд, далелҳоро бо сарчашмаҳои мустақил муқоиса намоянд ва пеш аз паҳн кардани маводи шубҳанок, дурустии онро дида бароянд. Аз ин рӯ, баланд бардоштани саводи рақамӣ ва қабули қарорҳои дуруст дар ин гуна ҳолатҳо аз ҷониби ҷавонону наврасон хеле муҳим аст.   Дар баробари шабакаҳои иҷтимоӣ, муҳити оила низ дар ташаккули шахсият нақши муҳим мебозад. Оила нахустин муҳити рушди ҷаҳонбинӣ ва хислати инсон аст. Муносибати самимӣ, эҳтироми ҳамдигар, гӯш кардани мушкилоти фарзанд ва дастгирии ӯ дар ҳолатҳои душвор барои эътимод ва масъулиятшиносӣ замина фароҳам меоранд.   Волидайн бояд бо фарзандон дар бораи арзишҳои инсонӣ, эҳтироми қонун, масъулияти шаҳрвандӣ ва хатарҳои таблиғоти хушунатомез суҳбат кунанд. Дар ин раванд, на тарсонидану айбдоркунӣ, балки фаҳмондадиҳӣ, саволу ҷавоб ва эътимод ба ҳамдигар натиҷаи беҳтар дода метавонад.   Муассисаҳои таълимӣ низ дар пешгирии ифротгароӣ нақши калидӣ доранд. Дар мактабу донишгоҳҳо гузаронидани семинарҳои илмӣ-маърифатӣ, мизҳои мудаввар, вохӯриҳо бо ҳуқуқшиносон, равоншиносон ва мутахассисони соҳаи иттилоот метавонад ба дарки амиқтари масъала мусоидат кунад.   Донишҷӯ ё хонанда бояд тавонад маводи шубҳанокро муайян кунад, ҳуқуқу уҳдадориҳои шаҳрвандии худро дарк намояд, ихтилофро бо роҳи муколама ҳал кунад ва ҳангоми дучор шудан ба таҳдиди воқеӣ ба ниҳодҳои дахлдор муроҷиат намояд.   Ҳамкории оила, муассисаҳои таълимӣ, равоншиносон, кормандони иҷтимоӣ ва мақомоти дахлдор метавонад барои сари вақт пешгирӣ намудани ҷавонон аз амалҳои номатлуб заминаи мусоид фароҳам оварад.   Бо дарназардошти омилҳои зикршуда, дар муқовимат ба терроризм ва экстремизм бояд ба чанд самти асосӣ такя намуд: Якум, баланд бардоштани маърифати ҳуқуқӣ, шиносоии шаҳрвандон бо ҳуқуқу уҳдадориҳои худ, қонунгузории дахлдор ва оқибатҳои ҳуқуқии амалҳои террористию экстремистӣ. Дуюм, рушди саводи расонаӣ. Омӯзонидани усулҳои санҷиши иттилоот, шинохти манбаъҳои боэътимод ва муайян кардани таблиғоти ғаразнок.   Сеюм, фароҳам овардани имкониятҳо баҳри рушди ҷавонон. Дастгирӣ барои таҳсил, касбомӯзӣ, шуғл, варзиш, фаъолияти эҷодӣ ва иштироки ҷавонон дар ҳаёти ҷамъиятӣ.   Чорум, таҳкими ҳамкории оила ва муассисаҳои таълимӣ. Фароҳам овардани муҳити эътимод, шунидани мушкилоти ҷавонон ва дастгирии саривақтии онҳо.   Панҷум, густариши фарҳанги муколама. Тарбияи эҳтиром ба гуногунандешӣ, малакаи ҳалли осоиштаи ихтилофҳо ва таҳаммулпазирӣ нисбат ба дигарон.   Шашум, риояи қонун ва ҳуқуқи инсон. Ҳамаи чораҳои муқовимат бояд дар асоси қонун, далелҳои санҷидашуда ва эҳтироми ҳуқуқу озодиҳои шаҳрвандон амалӣ карда шаванд.   Ҳафтум, ҳамоҳангсозии фаъолияти ниҳодҳои ҷомеа. Ҳамкории муассисаҳои таълимӣ, оилаҳо, ҷомеаи шаҳрвандӣ ва воситаҳои ахбори омма метавонад барои пешгирии саривақтии хатарҳо мусоидат намояд. Муқовимат бо терроризму экстремизм ҳамкории пайвастаи ниҳодҳои дахлдор бо шаҳрвандонро талаб мекунад. Барои Тоҷикистон, ки сулҳу субот, ваҳдати миллӣ ва рушди насли ҷавон аз масъалаҳои муҳимми ҷомеа мебошанд, баланд бардоштани маърифати ҳуқуқиву расонаӣ ва тарбияи наврасону ҷавонони худогоҳу масъулиятшинос аҳаммияти махсус дорад. Дар ин раванд ҳар як омӯзгор, волидайн, донишҷӯ, рӯзноманигор ва ҷомеаи шаҳрвандӣ метавонад бо муносибати оқилона ва риояи қонун саҳми худро гузорад.   Афзал БОСОЛИЕВ, муаллими кафедраи журналистика ва назарияи тарҷумаи Донишгоҳи давлатии Хуҷанд ба номи академик Бобоҷон Ғафуров

    49

    16.11.2026
  •  img
    РОҲПАЙМОӢ БАХШИДА БА РӮЗИ ПРЕЗИДЕНТИ ҶУМҲУРИИ ТОҶИКИСТОН Дар доираи таҷлили Рӯзи Президенти Ҷумҳурии Тоҷикистон роҳпаймоии идона баргузор гардид, ки дар он омӯзгорону донишҷӯён ва кормандони Донишкадаи иқтисод ва савдои ДДТТ дар шаҳри Хуҷанд фаъолона иштирок намуданд.   Иштироки фаъолонаи ҳайати устодону донишҷӯён ва кормандони донишкада аз эҳтиром ба арзишҳои миллӣ, арҷгузорӣ ба таърихи давлатдорӣ ва саҳмгузорӣ дар чорабиниҳои муҳимми ҷамъиятӣ шаҳодат медиҳад.

    38

    16.11.2026
  •  img
    НАҚШИ ПРЕЗИДЕНТИ ҶУМҲУРИИ ТОҶИКИСТОН ДАР РУШДИ ИҚТИСОДИ МИЛЛӢ ДАР ДАВРОНИ ИСТИҚЛОЛИЯТИ ДАВЛАТӢ (Дар ҳошияи Рӯзи Президенти Ҷумҳурии Тоҷикистон) Рушди иқтисоди миллӣ яке аз нишондиҳандаҳои асосии устувории давлатдорӣ, сатҳи мустақилияти иқтисодӣ, иқтидори истеҳсолӣ ва некӯаҳволии аҳолӣ ба ҳисоб меравад. Таҷрибаи таърихии Ҷумҳурии Тоҷикистон дар даврони соҳибистиқлолӣ нишон медиҳад, ки ташаккули иқтисоди мустақили миллӣ раванди мураккабу бисёрҷанба буда, аз таъмини суботи сиёсӣ, таҳкими институтҳои давлатӣ, муайян намудани афзалиятҳои стратегӣ, ташаккули заминаи ҳуқуқию иқтисодӣ ва сафарбар намудани захираҳои дохиливу хориҷӣ вобастагии мустақим дорад. Дар ин раванд нақши Президенти Ҷумҳурии Тоҷикистон, Пешвои муаззами миллат, муҳтарам Эмомалӣ Раҳмон дар муайян намудани самтҳои афзалиятноки сиёсати иқтисодӣ, ташаккули стратегияҳои дарозмуддати рушд, пешбурди ислоҳоти иқтисодӣ ва ҳамоҳангсозии фаъолияти сохторҳои давлатӣ аҳаммияти махсус дорад. Таҳти роҳбарии Президенти мамлакат иқтисоди Тоҷикистон аз марҳалаи буҳрони шадиди солҳои аввали истиқлолият ва барқарорсозии иқтидорҳои истеҳсолӣ ба марҳалаи рушди устувор, саноатикунонӣ, навсозии инфрасохтор ва густариши робитаҳои иқтисодии байналмилалӣ ворид гардид. Яке аз масъалаҳои аввалиндараҷаи давраи аввали истиқлолият барқарор намудани фаъолияти иқтисодӣ, таъмини сулҳу субот, эҳёи корхонаҳо, барқарорсозии низоми молиявӣ ва фароҳам овардани шароити зарурӣ барои фаъолияти муътадили субъектҳои хоҷагидорӣ буд, ки бо ташаббуси бевоситаи Пешвои миллат амалӣ гардиданд. Бе ҳалли ин масъалаҳо татбиқи ягон барномаи дарозмуддати иқтисодӣ имконнопазир буд. Дар ин марҳала сиёсати роҳбарияти давлат ба барқарор намудани пояҳои иқтисоди миллӣ, таҳкими идоракунии давлатӣ ва ташкили шароити мусоид барои рушди соҳибкорӣ равона гардид. Дар марҳалаҳои минбаъда сиёсати иқтисодӣ тадриҷан хусусияти барномавӣ ва стратегӣ касб намуд. Қабули Стратегияи миллии рушди Ҷумҳурии Тоҷикистон барои давраи то соли 2030 ва барномаҳои миёнамуҳлати рушди кишвар бо ташаббуси Пешвои миллат имкон доданд, ки афзалиятҳои иқтисодӣ дар робита бо имкониятҳои воқеии кишвар, захираҳои табиӣ, иқтидори инсонӣ ва талаботи бозори дохиливу хориҷӣ муайян карда шаванд. Барномаи миёнамуҳлати рушди Ҷумҳурии Тоҷикистон барои солҳои 2026-2030 низ ҳамчун марҳалаи ниҳоии татбиқи Стратегияи миллии рушд барои расидан ба ҳадафҳои муайяншуда заминаи барномавӣ фароҳам меорад. Бо ҳидоятҳои Пешвои миллат, дар сиёсати иқтисодии давлат чор ҳадафи стратегии миллӣ ҷойгоҳи марказӣ дода шуд: таъмини истиқлолияти энергетикӣ, раҳоӣ аз бунбасти коммуникатсионӣ, ҳифзи амнияти озуқаворӣ ва саноатикунонии босуръати кишвар. Ин ҳадафҳо аз ҳам ҷудо нестанд. Энергетика барои фаъолияти саноат, нақлиёт барои пайвастшавии бозорҳо, кишоварзӣ барои таъмини амнияти озуқаворӣ ва саноат барои коркарди ашёи хом, таъсиси ҷойҳои корӣ ва афзоиши содирот замина фароҳам меоранд. Нишондиҳандаи муҳимтарини арзёбии рушди иқтисоди миллӣ маҷмӯи маҳсулоти дохилӣ мебошад. Тибқи маълумоти расмӣ, ҳаҷми ММД-и Тоҷикистон дар соли 2025 ба 176,9 миллиард сомонӣ расида, суръати рушди воқеии он 8,4 фоизро ташкил дод. Дар муқоиса бо соли 2015 ҳаҷми ММД 3,4 баробар афзоиш ёфта, суръати миёнаи рушди иқтисодӣ дар давоми даҳ соли охир 7,6 фоизро ташкил кардааст. ММД ба ҳар сари аҳолӣ низ аз 6 ҳазор сомонии соли 2015 ба 16,4 ҳазор сомонӣ дар соли 2025 расидааст. Ин нишондиҳандаҳо аз васеъ гардидани ҳаҷми иқтисоди миллӣ ва афзоиши иқтидори истеҳсоливу молиявии кишвар шаҳодат медиҳанд. Дар нуҳ моҳи соли 2026 суръати рушди воқеии иқтисоди миллӣ 8,3 фоизро ташкил намуд. Ин натиҷа идома ёфтани тамоюли рушди иқтисодиро дар шароити тағйирёбии вазъи иқтисоди ҷаҳонӣ инъикос мекунад. Нақши Президенти мамлакат дар ин раванд пеш аз ҳама дар муайян намудани самтҳои стратегии сиёсати иқтисодӣ, гузоштани вазифаҳои мушаххас дар назди Ҳукумат ва мақомоти давлатӣ, дастгирии лоиҳаҳои афзалиятнок ва фароҳам овардани шароити сиёсиву институтсионалӣ барои татбиқи ислоҳот зоҳир мегардад. Дар натиҷаи назорату арзёбии мунтазами Пешвои муаззами миллат, Ҳукумат, вазорату идораҳо, мақомоти маҳаллӣ, соҳибкорон, сармоягузорон, мутахассисон ва аҳолӣ ба чунин натиҷаҳо омаданд. Тавре аз дастуру супоришҳои Пешвои муаззами миллат бармеоянд, барои нигоҳ доштани суръати рушди иқтисодӣ дар оянда муҳим аст, ки афзоиши ММД на танҳо аз ҳисоби зиёд шудани ҳаҷми истеҳсолот, балки аз ҳисоби баланд гардидани маҳсулнокии меҳнат, рушди технология, афзоиши содироти маҳсулоти коркардшуда ва беҳтар гардидани сифати ҷойҳои корӣ таъмин карда шавад. Саноатикунонии босуръат, ки ҳамчун ҳадафи чоруми стратегии миллӣ аз ҷониби Пешвои муаззами миллат муайян шудааст, ба яке аз самтҳои калидии сиёсати иқтисодии давлат табдил ёфт. Мақсади он танҳо зиёд намудани шумораи корхонаҳо нест, балки тағйир додани сохтори иқтисоди миллӣ, рушди истеҳсолоти ватанӣ, коркарди ашёи хом, таъсиси ҷойҳои кории устувор ва зиёд намудани ҳиссаи маҳсулоти рақобатпазир дар бозори дохиливу хориҷӣ мебошад. Тибқи маълумоти расмӣ, шумораи корхонаҳои саноатӣ аз 358 адад дар соли 1991 ба зиёда аз 4 ҳазор адад дар соли 2025 расидааст. Номгӯйи маҳсулоти саноатӣ низ аз 85 намуд ба зиёда аз 1400 намуд афзоиш ёфтааст. Дар давраи солҳои 2019–2025 бо кушишҳои шабонарӯзии Пешвои миллат дар кишвар зиёда аз 2600 корхонаи нави саноатӣ бо таъсиси беш аз 87 ҳазор ҷойи корӣ ба истифода дода шудааст. Танҳо дар соли 2025 фаъолияти 400 корхонаи нави истеҳсолӣ оғоз гардид. Ҳаҷми истеҳсоли маҳсулоти саноатӣ дар соли 2025 ба 66 миллиарду 726,1 миллион сомонӣ расида, рушди воқеии он 22,1 фоизро ташкил дод. Ин натиҷаҳо нишон медиҳанд, ки саноатикунонӣ тадриҷан ба омили муҳими тағйирёбии сохтори иқтисоди миллӣ табдил меёбад. Бо вуҷуди ин, тибқи таъкидҳои Пешвои муаззами миллат, масъалаи асосии марҳалаи минбаъда баланд бардоштани сатҳи коркарди ашёи хоми ватанӣ, рушди саноати мошинсозӣ, металлургия, саноати сабук, хӯрокворӣ, дорусозӣ ва истеҳсоли маҳсулоти дорои арзиши баланди иловашуда мебошад. Нақши бағоят бузурги Президенти Ҷумҳурии Тоҷикистон дар пешбурди ин самт бо муайян намудани саноатикунонии босуръат ҳамчун ҳадафи стратегӣ, ҷалби таваҷҷуҳи сармоягузорони дохиливу хориҷӣ ба лоиҳаҳои истеҳсолӣ ва дастгирии таъсиси иқтидорҳои нави саноатӣ ва чандин маротиба эълон кардани моратория алоқаманд мебошад. Самаранокии ниҳоии ин сиёсат, тибқи ҳидоятҳои роҳбари олии кишвар бояд бо нишондиҳандаҳои маҳсулнокӣ, ҳаҷми содирот, сатҳи коркарди ашёи хом ва рақобатпазирии маҳсулоти ватанӣ арзёбӣ гардад. Пешвои муаззами миллат, энергетикаро ҳамчун яке аз омилҳои асосии рушди саноат, кишоварзӣ, нақлиёт ва хизматрасонӣ ба ҳисобида, таъмини истиқлолияти энергетикӣ дар сиёсати иқтисодии давлат мавқеи стратегӣ дорад. Дар даврони соҳибистиқлолӣ бо заҳматҳои бесобиқаи Пешвои муаззами миллат сохтмон ва таҷдиди неругоҳҳои барқи обӣ, аз ҷумла «Сангтӯда-1», «Сангтӯда-2», идомаи сохтмони НБО «Роғун» ва навсозии инфрасохтори энергетикӣ ба рушди иқтидори истеҳсоли неруи барқ омада расидем. Тибқи маълумоти оморӣ, дар давраи истиқлолият беш аз 2300 мегаватт иқтидори нави энергетикӣ ба истифода дода шуда, иқтидори умумии энергетикии кишвар тақрибан ба 6700 мегаватт расонида шудааст. Соли 2025 дар соҳаи энергетика 13 лоиҳаи давлатии сармоягузорӣ ба маблағи умумии 14,9 миллиард сомонӣ амалӣ гардид. Ҳаҷми истеҳсоли неруи барқ дар ҳамин сол ба 24 миллиард киловатт-соат расида, нисбат ба соли 2024 ҳафт фоиз афзоиш ёфт. Таваҷҷуҳи пайвастаи Президенти мамлакат ба рушди гидроэнергетика ва татбиқи лоиҳаҳои бузурги энергетикӣ бо зарурати таъмини талаботи дохилӣ, рушди иқтидори саноатӣ ва истифодаи имкониятҳои содиротии кишвар алоқаманд буда, тибқи таъкидҳояшон дар марҳалаи минбаъда масъалаҳои кам намудани талафоти неруи барқ, истифодаи технологияҳои каммасраф, рушди манбаъҳои барқароршавандаи энергия ва таъмини дастрасии устувори корхонаҳои истеҳсолӣ ба неруи барқ бояд дар маркази сиёсати энергетикӣ қарор дошта бошанд. Дар ин марҳила сиёсати Президенти Ҷумҳурии Тоҷикистон дар самти кишоварзӣ ба истифодаи самараноки замин, таъмини амнияти озуқаворӣ, рушди инфрасохтори обёрӣ, дастгирии истеҳсолкунандагони ватанӣ ва тақвияти робитаи кишоварзӣ бо саноат равона гардида буд. Кишоварзӣ дар сохтори иқтисоди Тоҷикистон на танҳо соҳаи истеҳсолӣ, балки омили муҳими таъмини шуғли аҳолии деҳот, амнияти озуқаворӣ ва рушди минтақаҳо буда, дар давраи истиқлолият бо дастгирии бевоситаи Пешвои миллат дар соҳа ислоҳоти замин, рушди хоҷагиҳои деҳқонӣ, васеъ намудани боғу токзор, беҳтар кардани таъминоти обёрӣ ва диверсификатсияи истеҳсолот амалӣ гардиданд. Дар натиҷаи ин раванд имкониятҳои истеҳсолии соҳа тадриҷан васеъ шуданд. Соли 2025 ҳаҷми умумии маҳсулоти кишоварзӣ ба 84 миллиарду 653,8 миллион сомонӣ расида, нисбат ба соли қаблӣ 9,5 фоиз афзоиш ёфт. Дар ин сол зиёда аз 1,74 миллион тонна ғалладона, 382,9 ҳазор тонна пахта, 1,33 миллион тонна картошка, 3,38 миллион тонна сабзавот ва 954,4 ҳазор тонна мева истеҳсол гардид. Тибқи таъкидҳои Сарвари давлат, бо вуҷуди афзоиши истеҳсолот, масъалаи муҳимми иқтисодӣ дар ин соҳа баланд бардоштани ҳосилнокии замин, истифодаи технологияҳои муосири аграрӣ, кам кардани талафоти маҳсулот, рушди корхонаҳои коркард, сардхонаҳо, бастабандӣ ва логистика мебошад. Танҳо дар ин сурат афзоиши истеҳсоли маҳсулоти кишоварзӣ метавонад ба зиёд шудани даромади истеҳсолкунандагон, рушди содирот ва афзоиши арзиши иловашуда дар дохили кишвар мусоидат намояд. Яке аз шартҳои асосии рушди иқтисоди миллӣ ташаккули фазои мусоиди сармоягузорӣ ва фароҳам овардани шароити ҳуқуқию иқтисодӣ барои фаъолияти соҳибкорӣ мебошад. Дар давраи соҳибистиқлолӣ бо дастурҳои Пешвои муаззами миллат низоми қонунгузории иқтисодӣ, низоми андозу гумрук, институтҳои молиявӣ ва механизмҳои ҷалби сармоя тадриҷан такмил дода шуданд. Тибқи маълумоти оморӣ, дар давраи истиқлолият ба иқтисоди кишвар дар маҷмӯъ 760 миллиард сомонӣ сармоя, аз ҷумла 337 миллиард сомонӣ сармояи хориҷӣ ҷалб гардидааст. Ин маблағҳо ба рушди энергетика, нақлиёт, саноат, маориф, тандурустӣ ва дигар соҳаҳои афзалиятнок равона шудаанд. Танҳо дар соли 2025 ҳаҷми маблағгузорӣ ба сармояи асосӣ 28,7 миллиард сомониро ташкил дода, нисбат ба соли 2024 23 фоиз афзоиш ёфт. Ҳаҷми сармоягузории хориҷии воридшуда низ 59,5 миллиард сомонӣ арзёбӣ гардидааст. Нақши бесобиқаи роҳбарияти давлат дар ин самт бо муайян намудани афзалиятҳои сармоягузорӣ, муаррифии имкониятҳои иқтисодии кишвар, густариши ҳамкориҳои байналмилалӣ ва дастгирии ташаббусҳои соҳибкорӣ алоқаманд буда, таъкид менамоянд, ки дар баробари ин, барои баланд бардоштани самаранокии сармоягузорӣ зарур аст, ки на танҳо ҳаҷми маблағҳои ҷалбшуда, балки натиҷаҳои онҳо низ арзёбӣ шаванд. Аз ҷумла, таъсиси ҷойҳои нави корӣ, афзоиши содирот, ворид намудани технологияҳои муосир, рушди истеҳсолоти маҳаллӣ ва таъсири лоиҳаҳо ба иқтисоди минтақаҳо бояд меъёрҳои асосии арзёбии самаранокӣ бошанд. Низоми молиявии устувор яке аз заминаҳои асосии татбиқи сиёсати иқтисодии давлат мебошад. Дар солҳои соҳибистиқлолӣ низоми буҷетӣ, андозбандӣ, фаъолияти бонкӣ, хизматрасониҳои молиявӣ ва ҳисоббаробаркуниҳои ғайринақдӣ марҳалаҳои гуногуни ислоҳотро бо супоришҳои бевоситаи Пешвои муаззами миллат паси сар намуданд. Дар соли 2025 ба қисми даромади буҷети давлатӣ 60,3 миллиард сомонӣ маблағ ворид гардид, ки нисбат ба нақша ҳафт миллиард сомонӣ зиёд мебошад. Афзоиши даромадҳои буҷетӣ имконият медиҳад, ки маблағгузории соҳаҳои иҷтимоӣ, инфрасохтор, маориф, тандурустӣ ва барномаҳои рушди иқтисодӣ васеъ карда шавад. Дар ин раванд нақши Президенти Ҷумҳурии Тоҷикистон дар муайян намудани сиёсати буҷетию андоз, тақвияти интизоми молиявӣ, дастгирии ислоҳоти низоми идоракунии молияи давлатӣ ва гузоштани вазифаҳои мушаххас барои афзоиши даромадҳои буҷетӣ хело муассир буда, таъкид менамоянд, ки дар оянда масъалаи асосӣ бояд баланд бардоштани самаранокии хароҷоти давлатӣ, шаффофияти буҷетӣ, беҳтар намудани маъмурикунонии андоз ва равона кардани маблағҳои буҷетӣ ба лоиҳаҳое бошад, ки натиҷаи воқеии иқтисодӣ ва иҷтимоӣ медиҳанд. Бо назардошти мавқеи ҷуғрофии Тоҷикистон, рушди роҳҳои автомобилгард, нақбҳо, пулҳо, роҳи оҳан ва инфрасохтори логистикӣ яке аз самтҳои муҳими сиёсати иқтисодии роҳбарияти давлат ба ҳисоб меравад. Дар даврони истиқлолият сохтмон ва таҷдиди роҳҳои байналмилалӣ ва ҷумҳуриявӣ, бунёди пулҳо ва нақбҳо имконият фароҳам оварданд, ки робитаи минтақаҳои кишвар беҳтар гардида, шароити ҳамлу нақли дохиливу байналмилалӣ васеъ шавад. Тибқи маълумоти оморӣ, дар ин давра зиёда аз 3200 километр роҳҳои байналмилалӣ ва ҷумҳуриявӣ, 254 пул, 43 километр нақб ва 220 километр роҳи оҳан сохта шудаанд. Соли 2025 дар соҳаи нақлиёт 14 лоиҳаи сармоягузорӣ ба маблағи умумии 11,7 миллиард сомонӣ амалӣ гардид. Дар ҳамин сол тавассути ҳамаи намудҳои нақлиёт 155 миллион тонна бор ва 1,1 миллиард мусофир интиқол дода шуд. Ташаббусҳои беназири Президенти мамлакат дар самти раҳоӣ аз бунбасти коммуникатсионӣ ва рушди долонҳои нақлиётӣ ба густариши робитаҳои иқтисодӣ, осон гардидани дастрасии истеҳсолкунандагон ба бозорҳо ва баланд бардоштани имкониятҳои транзитии кишвар мусоидат намуда, вазифаҳои минбаъдаро табдил додани инфрасохтори мавҷуда ба низоми муосири логистикӣ, рақамикунонии хизматрасониҳои нақлиётӣ, рушди терминалҳои боркашонӣ ва баланд бардоштани рақобатпазирии долонҳои транзитӣ арзёбӣ менамоянд. Сайёҳиро Сарвари давлат яке аз самтҳои дорои имкониятҳои назарраси диверсификатсияи иқтисоди миллӣ ҳисобида, истифодаи захираҳои табиӣ, кӯҳҳо, пиряхҳо, мавзеъҳои таърихию фарҳангӣ ва ҳунарҳои мардумиро барои рушди сайёҳии экологӣ, кӯҳӣ, фарҳангӣ ва табобатӣ имтиёзҳои зиёде муқаррар карда шуд. Соли 2025 ба Тоҷикистон 2 миллиону 104,7 ҳазор нафар шаҳрвандони хориҷӣ ташриф оварданд, ки нисбат ба соли 2024 31,3 фоиз зиёд мебошад. Аз ин шумора беш аз 1 миллиону 784,4 ҳазор нафар тибқи методологияи байналмилалӣ ҳамчун сайёҳ арзёбӣ шудаанд. Таваҷҷуҳи роҳбарияти давлат ба рушди сайёҳӣ бо мақсади истифодаи имкониятҳои табиию фарҳангии кишвар, зиёд намудани хизматрасониҳо, ташкили ҷойҳои корӣ ва ҷалби сармоягузорӣ ба инфрасохтори сайёҳӣ хело зиёд буда, дастур доданд, ки барои баланд бардоштани саҳми воқеии сайёҳӣ дар ММД зарур аст, ки сифати хизматрасонӣ, инфрасохтори меҳмонхонаҳо, нақлиёти сайёҳӣ, марказҳои иттилоотӣ, омодагии кадрҳо ва низоми муаррифии маҳсулоти сайёҳии миллӣ такмил дода шаванд. Ҳадафи ниҳоии рушди иқтисодӣ беҳтар гардидани сатҳи зиндагии аҳолӣ мебошад. Аз ин рӯ, сиёсати иқтисодии роҳбарияти кишвр на танҳо ба афзоиши нишондиҳандаҳои макроиқтисодӣ, балки ба баланд бардоштани даромади воқеии аҳолӣ, ташкили ҷойҳои кории пурмаҳсул ва коҳиш додани сатҳи камбизоатӣ равона шудааст. Натиҷаи ин кушишҳо буд, ки тибқи маълумоти расмӣ, сатҳи камбизоатӣ дар Тоҷикистон дар соли 2025 то 19 фоиз коҳиш ёфта, даромади пулии аҳолӣ аз 26 миллиард сомонии соли 2015 ба 165 миллиард сомонӣ дар соли 2025 расидааст. Танҳо дар соли 2025 аз ҳисоби ҳамаи сарчашмаҳо 280 ҳазор ҷойи нави корӣ таъсис дода шудааст. Ин нишондиҳандаҳо аз аҳаммияти ғамхориҳои роҳбарияти кишвар дар сиёсати шуғл, рушди соҳибкорӣ, афзоиши истеҳсолот ва густариши хизматрасонӣ шаҳодат дода, таъкид мекунанд, ки масъалаи асосии марҳалаи нав на танҳо шумораи ҷойҳои корӣ, балки сифати онҳо, музди меҳнати рақобатпазир, ҳосилнокии меҳнат ва таъмини шуғли устувор мебошад. Дар ин замина маориф, илм, тайёр намудани мутахассисони соҳибкасб ва рушди технология аҳаммияти мустақими иқтисодӣ доранд. Афзоиши хароҷоти маориф аз 5,2 фоизи ММД дар соли 2020 то 6,6 фоиз дар соли 2025 нишон медиҳад, ки маблағгузории сармояи инсонӣ дар сиёсати давлатӣ мавқеи муҳим дорад. Ин рақамҳо нишон медиҳанд, ки маориф дар сиёсати молиявии давлат мавқеи стратегӣ дорад. Маблағгузорӣ ба маориф дар асл сармоягузорӣ ба сармояи инсонӣ ва заминаи рушди дарозмуддати иқтисоди миллӣ мебошад. Дар давраи соҳибистиқлолӣ бо ташаббуси бевоситаи Пешвои муаззами миллат аз ҳисоби буҷети давлатӣ ба соҳаи маориф беш аз 70 миллиард сомонӣ, аз ҳисоби лоиҳаҳои сармоягузории давлатӣ бошад 10 миллиард сомонӣ маблағгузорӣ шуда, таъкид менамоянд, ки сифати маориф бевосита ба сатҳи касбӣ, мақоми иҷтимоӣ ва ҳавасмандии омӯзгорон вобаста мебошад ва аз ин рӯ, дастгирии омӯзгор ҳамчун яке аз самтҳои асосии сиёсати давлатӣ дар соҳа арзёбӣ мешавад. Дар ин давра шумораи хонандагони муассисаҳои таҳсилоти умумии рӯзона аз 1 миллиону 325,4 ҳазор нафар ба 2 миллиону 462,1 ҳазор нафар расидааст. Яъне, дар давраи истиқлол шумораи хонандагон беш аз 1 миллион нафар зиёд шудааст. Танҳо дар муқоиса бо соли таҳсили 2020–2021 шумораи хонандагон аз 2 миллиону 108,9 ҳазор нафар ба 2 миллиону 462,1 ҳазор нафар, ё 353,2 ҳазор нафар зиёд гардидааст. Шумораи духтарони муассисаҳои таҳсилоти умумии рӯзона низ аз 641,8 ҳазор нафар дар соли 1991–1992 ба 1 миллиону 195,1 ҳазор нафар дар соли 2025–2026 расидааст. Ин нишондиҳанда хизматҳои шоёни Пешвои миллатро ҷиҳати афзоиши дастрасии духтаронро ба таҳсил ва аҳамияти сиёсати давлатӣ дар самти таъмини имкониятҳои баробар барои таҳсилро нишон медиҳад. Агар соли 1991–1992 дар Тоҷикистон 13 муассисаи таҳсилоти олии касбӣ бо 69,3 ҳазор донишҷӯ фаъолият дошта бошад, дар соли таҳсили 2025–2026 бо ташаббусҳои бевоситаи Пешвои миллат шумораи муассисаҳо ба 51 адад ва шумораи донишҷӯён ба 226,2 ҳазор нафар расидааст. Яъне шумораи муассисаҳои таҳсилоти олӣ нисбат ба оғози истиқлол 38 адад, ё тақрибан 3,9 баробар, зиёд гардида, шумораи донишҷӯён беш аз 156,1 ҳазор нафар, ё тақрибан 3,3 баробар, афзоиш ёфтааст, ки аз шумораи умумии донишҷӯён 94,3 ҳазор нафар духтарон мебошанд. Тибқи таъкидҳои роҳбари давлат, рушди иқтисоди донишбунёд талаб мекунад, ки робитаи муассисаҳои таҳсилоти олии касбӣ бо истеҳсолот, таҳқиқоти илмӣ бо талаботи бозори меҳнат ва омодасозии мутахассисон бо самтҳои афзалиятноки саноат ва иқтисоди рақамӣ боз ҳам тақвият дода шавад. Дар шароити ҷаҳонишавӣ рушди иқтисоди миллӣ аз сатҳи ҳамгироӣ бо бозорҳои минтақавию байналмилалӣ, ҷалби сармояи хориҷӣ, дастрасӣ ба технология ва тавсеаи робитаҳои тиҷоратӣ вобастагии зиёд дорад. Президенти Ҷумҳурии Тоҷикистон дар доираи сафарҳои давлатӣ, мулоқотҳои сатҳи баланд ва иштирок дар ҳамоишҳои байналмилалӣ масъалаҳои рушди ҳамкориҳои иқтисодӣ, ҷалби сармоя, татбиқи лоиҳаҳои муштарак ва истифодаи имкониятҳои транзитии кишварро пайваста матраҳ менамоянд. Ин самт барои иқтисоди Тоҷикистон аҳаммияти махсус дорад, зеро васеъ намудани бозорҳои содиротӣ, ҷалби технологияҳои муосир ва ворид шудан ба занҷираҳои минтақавию ҷаҳонии арзиши иловашуда метавонад имкониятҳои нави истеҳсолӣ фароҳам оварад. Сарвари давлат таъкид менамояд, ки дар марҳалаи минбаъда зарур аст, ки сиёсати ҳамкориҳои иқтисодии байналмилалӣ ба зиёд намудани содироти маҳсулоти коркардшуда, беҳтар намудани тавозуни тиҷоратӣ, рушди истеҳсолоти муштарак ва афзоиши саҳми сармоягузориҳои технологиябунёд равона гардад. Бо дарназардошти натиҷаҳои бадастомада ва талаботи иқтисоди муосир, тибқи дастурҳои Пешвои муаззами миллат, барои марҳалаи минбаъдаи рушд ҳалли масъалаҳои зерин аҳаммияти аввалиндараҷа дорад: 1. Баланд бардоштани сифати рушди иқтисодӣ: табдил додани афзоиши миқдории ММД ба афзоиши маҳсулнокии меҳнат, даромади воқеии аҳолӣ ва рақобатпазирии иқтисоди миллӣ. 2. Тақвияти саноатикунонии босуръат: рушди коркарди амиқи ашёи хом, истеҳсоли маҳсулоти дорои арзиши баланди иловашуда ва зиёд намудани содироти маҳсулоти саноатӣ. 3. Таъмини истиқлолияти энергетикӣ: ба истифода додани иқтидорҳои нави истеҳсоли неруи барқ, кам намудани талафоти энергетикӣ ва густариши технологияҳои каммасраф. 4. Баланд бардоштани самаранокии кишоварзӣ: рушди обёрии муосир, тухмипарварӣ, коркарди маҳсулот, сардхонаҳо ва инфрасохтори логистикӣ. 5. Рушди бахши хусусӣ ва соҳибкорӣ: содда намудани расмиёти маъмурӣ, беҳтар намудани муҳити рақобат ва дастрасии соҳибкорон ба маблағгузорӣ. 6. Тақвияти иқтидори содиротӣ: диверсификатсияи бозорҳо, баланд бардоштани сифати маҳсулот ва мутобиқ намудани истеҳсолоти ватанӣ ба стандартҳои байналмилалӣ. 7. Рақамикунонии иқтисодиёт: ҷорӣ намудани технологияҳои рақамӣ ва зеҳни сунъӣ дар истеҳсолот, молия, савдо, нақлиёт ва идоракунии давлатӣ. 8. Рушди иқтисоди сабз: истифодаи самараноки захираҳои табиӣ, рушди манбаъҳои барқароршавандаи энергия ва мутобиқшавӣ ба тағйирёбии иқлим. 9. Тақвияти сармояи инсонӣ: пайвастани маорифу илм ба талаботи иқтисодиёт, рушди таҳсилоти касбӣ ва омодасозии кадрҳои дорои салоҳияти рақамӣ ва технологӣ. 10. Баланд бардоштани самаранокии идоракунии давлатӣ: такмили банақшагирии стратегӣ, шаффофияти буҷетӣ ва арзёбии натиҷавии барномаҳои давлатӣ. Барномаи миёнамуҳлати рушди Ҷумҳурии Тоҷикистон барои солҳои 2026-2030 дар ин самт аҳаммияти махсус дорад. Дар доираи он ҳадаф гузошта шудааст, ки ҳаҷми ММД дар панҷ соли оянда ду баробар зиёд ва сатҳи камбизоатӣ то 10 фоиз коҳиш дода шавад. Барои расидан ба чунин нишондиҳандаҳо на танҳо афзоиши маблағгузорӣ, балки баланд бардоштани самаранокии истифодаи захираҳо, рушди бахши хусусӣ ва тақвияти институтҳои иқтисодӣ зарур мебошад. Хулоса, таҳлили раванди рушди иқтисоди Ҷумҳурии Тоҷикистон дар даврони истиқлолият нишон медиҳад, ки нақши Президенти Ҷумҳурии Тоҷикистон муҳтарам Эмомалӣ Раҳмон пеш аз ҳама дар муайян намудани самтҳои стратегии сиёсати иқтисодӣ, ташаккули заминаҳои ҳуқуқию институтсионалӣ, пешбурди ислоҳот, дастгирии лоиҳаҳои бузурги инфрасохторӣ ва фароҳам овардани шароити сиёсӣ барои рушди иқтисоди миллӣ зоҳир гардида, барои ноилгардӣ ба нишондиҳандаҳои зерини иқтисодӣ мусоидат намуданд: ҳаҷми ММД дар соли 2025 ба 176,9 миллиард сомонӣ расида, рушди воқеӣ 8,4 фоизро ташкил дод; истеҳсоли саноатӣ аз 66,7 миллиард сомонӣ гузашт; ҳаҷми маҳсулоти кишоварзӣ ба 84,7 миллиард сомонӣ баробар гардид; даромади буҷети давлатӣ ба 60,3 миллиард сомонӣ расид; дар давраи истиқлолият ба иқтисоди кишвар 760 миллиард сомонӣ сармоя ҷалб гардид ва шумораи корхонаҳои саноатӣ ба зиёда аз 4 ҳазор адад расид. Ин рақамҳо на танҳо афзоиши ҳаҷми иқтисоди миллиро нишон медиҳанд, балки тағйироти назаррасро дар сохтори истеҳсолот, инфрасохтор, низоми молиявӣ ва имкониятҳои сармоягузории кишвар инъикос менамоянд. Тибқи таъкидҳои Пешвои миллат, дар баробари ин, рушди устувор танҳо бо нишондиҳандаҳои баланди афзоиши ММД маҳдуд нашуда, он тақозо менамояд, ки натиҷаҳои иқтисодӣ ба афзоиши даромади воқеии аҳолӣ, таъсиси ҷойҳои кории сермаҳсул, баланд гардидани рақобатпазирии истеҳсолоти ватанӣ, коҳиши вобастагӣ аз омилҳои беруна ва беҳтар шудани сифати зиндагии шаҳрвандон табдил ёбанд. Аз ин рӯ, вазифаи асосии марҳалаи нави рушди иқтисоди Тоҷикистонро Сарвари давлат таҳкими заминаҳои бадастомада, гузариш ба иқтисодиёти саноатӣ, рақамӣ, сабз ва ба дониш асосёфта, инчунин истифодаи самараноки имкониятҳои дохиливу байналмилалӣ мебошад. Татбиқи пайгиронаи стратегияҳои миллӣ, ҳамоҳангии фаъолияти мақомоти давлатӣ, иштироки фаъоли бахши хусусӣ ва истифодаи неруи зеҳниву касбии ҷомеа метавонанд барои расидан ба ин ҳадафҳо заминаи устувор фароҳам оваранд. Итминони комил дорем, ки таҳти Сарварии хирадмандона ва ободкоронаву ҳидоятҳои Асосгузори сулҳу Ваҳдати миллӣ - Пешвои муаззами миллат, Президенти Ҷумҳурии Тоҷикистон, муҳтарам Эмомалӣ Раҳмон, кишвари мо дар ояндаи наздик тамоми ҳадафҳои стартегии кишварро ба даст оварда, дар қатори давлатҳои рушдкунанда ҷойгоҳи сазоворро ноил мегардем. Аз фурсати муносиб истифода карда, фарорасии Рузи Президенти Ҷумҳурии Тоҷикистонро ба ҳама тоҷикону тоҷикистониён самимона муборакбод мегуем. Илҳомуддин Иброҳимзода, муовини вазири маориф ва илми Ҷумҳурии Тоҷикистон

    40

    16.11.2026