29.04.2025
29 апрели соли 2025 дар Вазорати маориф ва илм таҳти раёсати муовини якуми вазири маориф ва илм Ҳомид Ҳошимзода ҷаласаи навбатии ҳайати мушовараи Вазорати маориф ва илми Ҷумҳурии Тоҷикистон баргузор гардид.
Нахуст, муовини якуми вазири маориф ва илм ҷаласаро оғоз карда, ҳозиринро ба рӯзномаи ҷаласа ва масъалаҳои ҷории баррасишаванда шинос намуд.
Сипас, гузоришҳои сардори раёсати кадрҳо ва корҳои махсус Шамсиддин Саъдуллозода оид ба вазъи иҷрои «Тартиби баргардонидани маблағҳое, ки аз ҳисоби буҷети давлатӣ барои тайёр намудани мутахассисон харҷ шудаанд» ва ректори Донишкадаи ҷумҳуриявии такмили ихтисос ва бозомӯзии кормандони соҳаи маориф Наврӯз Мирзозода доир ба рафти иҷрои «Талаботи моддаи 51-и Қонуни Ҷумҳурии Тоҷикистон «Дар бораи маориф» оид ба гузариш ба низоми сесолаи такмили ихтисос» шунида шуд.
Зимни баррасии масъалаҳои мазкур раиси ҷаласа иброз дошт, ки таъмини муассисаҳои таълимии ҷумҳурӣ бо кадрҳои омӯзгорӣ яке аз масъалаҳои асосӣ дар соҳаи маориф маҳсуб гардида, он ба раванди бомаром ва муваффақонаи таълиму тарбия ва баланд бардоштани сатҳи дониши хонандагон зич алоқаманд аст.
Боиси тазаккур аст, ки ҳамасола дар асоси талабот ва пешниҳоди сарраёсату раёсат ва шуъбаҳову бахшҳои маорифи вилоятҳо ва шаҳру ноҳияҳои ҷумҳурӣ эҳтиёҷоти кадрҳои соҳаи маориф ба Вазорати маориф ва илм пешниҳод карда мешавад. Соли таҳсили 2024-2025 вобаста ба эҳтиёҷоти кадрӣ, ки 4301 нафарро ташкил медод, аз ҳисоби хатмкардагони зинаи таҳсилоти миёна ва олии касбӣ 3168 нафар ба ҷойи кор фиристода шуданд.
Ҳамзамон, гузариш ба низоми сесолаи такмили ихтисос дар ба роҳ мондани курсҳои онлайнӣ, фосилавӣ, омехта ва худомӯзӣ барои рушду малакаи омӯзгорон ва тавсеаи маорифи миллӣ омили таъсиррасон ба ҳисоб меравад.
Дар идома гузориши директори Маркази таҳия, нашр ва муомилоти китобҳои дарсӣ, илмию методӣ Наврӯзи Ҷумъамурод оид ба китоби дарсии «BIOCHEMISTRY» (Биохимия, бо забони англисӣ) барои донишҷӯёни муассисаҳои таҳсилоти олии касбӣ, китоби дарсии «Анатомия человека (книга для стоматологов. том 1 – 2)» барои донишҷӯёни муассисаҳои таҳсилоти олии касбӣ, китоби дарсии «Асосҳои назариявии амнияти иттилоотӣ» барои донишҷӯёни муассисаҳои таҳсилоти олии касбӣ, китоби дарсии «Гуногунии олами набототи Тоҷикистон» барои донишҷӯёни муассисаҳои таҳсилоти олии касбӣ ва дигар китобҳои дарсиву маводҳои таълимӣ шунида шуд.
Бо назардошти ироаи таклифу пешниҳодҳои аҳли толор вобаста ба масъалаҳои баррасишуда қарорҳои дахлдор қабул гардид.
Дар охир муовини якуми вазири маориф ва илм дар доираи дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба масъулин доир ба иҷрои ҳатмию саривақтии стратегия, барнома, консепсия, қарорҳои ҳайати мушовара ва фармоишҳои вазири маориф ва илм, азнавсозии системаи иттилоотии соҳаи маориф, пардохти ғайринақдии иҷораи китобҳои дарсӣ, боло бурдани сифати таълиму тарбия, фарогирии бештари кӯдакон ба таҳсилоти томактабӣ, иштироки бештари хонандагону омӯзгорон дар озмунҳои ҷумҳуриявию байналмилалӣ, нашр ва бознашри китобҳои дарсӣ ва чанде дигар дастуру супоришҳои мушаххас дод.
Маркази матбуоти
Вазорати маориф ва илми
Ҷумҳурии Тоҷикистон
Хабарҳои дигар
-
МАШВАРАТИ АВГУСТИИ КОРМАНДОНИ СОҲАИ МАОРИФИ ВИЛОЯТИ СУҒД Дар Кохи фарҳанги ба номи Абуабдуллоҳи Рӯдакии шаҳри Хуҷанд машварати августии кормандони соҳаи маорифи вилояти Суғд баргузор гардид. Дар машварат вазири маориф ва илми Ҷумҳурии Тоҷикистон Раҳим Саидзода, раиси вилояти Суғд Раҷаб Аҳмадзода, роҳбарони сохторҳои соҳаи маориф, омӯзгорон ва кормандони муассисаҳои таълимӣ иштирок намуданд. Зимни машварат фаъолияти соҳаи маориф дар давраи гузашта таҳлил гардида, дастовардҳо, масъалаҳои ҳалталаб ва вазифаҳои минбаъда мавриди баррасӣ қарор гирифтанд. Раиси вилояти Суғд ба масъалаҳои баланд бардоштани сифати таълиму тарбия, омодагии муассисаҳои таълимӣ ба соли нави таҳсил, истифодаи технологияҳои муосир, таҳкими заминаи моддиву техникӣ ва беҳтар намудани шароити таълим таваҷҷуҳи махсус зоҳир намуд. Вазири маориф ва илми Ҷумҳурии Тоҷикистон низ оид ба самтҳои афзалиятноки рушди соҳа, таъмини муассисаҳои таълимӣ бо кадрҳои соҳибкасб, фароҳам овардани муҳити мусоиди таълиму тарбия ва баланд бардоштани сатҳи дониш ва ҷаҳонбинии хонандагон андешаронӣ кард. Таъкид гардид, ки рушди маориф яке аз самтҳои муҳими сиёсати иҷтимоии давлат буда, дар солҳои соҳибистиқлолӣ барои пешрафти соҳа ва фароҳам овардани шароити муносиб барои таълиму тарбияи насли наврас корҳои назаррас анҷом дода шудаанд. Ҳамзамон, ба нақши омӯзгор дар тарбияи насли донишманд, ватандӯсту худшинос ва омода намудани хонандагони лаёқатманд барои иштирок дар озмуну олимпиадаҳои ҷумҳуриявию байналмилалӣ таъкид карда шуд. Машварати имсола дар арафаи 35-солагии Истиқлоли давлатии Ҷумҳурии Тоҷикистон баргузор гардида, зарурати боз ҳам тақвият бахшидани фаъолияти соҳаи маориф ва истифодаи самараноки имкониятҳои мавҷуда барои баланд бардоштани сифати таҳсилот таъкид гардид. Дар фарҷоми машварат як қатор омӯзгорон ва кормандони фаъоли соҳа барои саҳми арзанда дар рушди маориф ва дастовардҳои назаррас бо нишони сарисинагии «Аълочии маориф ва илми Тоҷикистон», Ифтихорнома ва Сипосномаи Раиси вилояти Суғд сарфароз гардонида шуданд. Сипас, барои иштирокчиёни машварат барномаи фарҳангӣ пешкаш гардид.
4
23.08.2026 -
СУҒД: ҒОЛИБОНИ ОЛИМПИАДАҲО ВА ОМӮЗГОРОНИ ОНҲО ҚАДРДОНӢ ШУДАНД Дар машварати августии соҳаи маорифи вилояти Суғд бо иштироки вазири маориф ва илми Ҷумҳурии Тоҷикистон Раҳим Саидзода ва раиси вилояти Суғд Раҷаб Аҳмадзода омӯзгороне, ки дар омода намудани хонандагон ба олимпиадаҳои ҷумҳуриявию байналмилалӣ саҳми назаррас гузоштаанд, бо сипоснома ва мукофотпулии яквақта сарфароз гардиданд. Ҳамчунин хонандагоне, ки дар соли таҳсили 2025-2026 дар олимпиадаҳои фаннии сатҳи ҷумҳуриявӣ ва байналмилалӣ ҷойҳои ифтихориро соҳиб шудаанд, бо мукофотпулӣ ва туҳфаҳо қадрдонӣ шуданд. Илова бар ин, 9 нафар иштирокчии хурди озмуни вилоятии «Ахтарони дониш» низ бо мукофотпулии яквақта сарфароз гардиданд.
13
23.08.2026 -
СУҒД: ҚАДРДОНИИ СОБИҚАДОРОНИ СОҲАИ МАОРИФ Дар доираи машварати августии кормандони соҳаи маорифи вилояти Суғд ба 40 нафар собиқадори соҳаи маориф туҳфаи пулии яквақта тақдим гардид. Ин иқдом ҳамчун нишони эҳтиром ва қадрдонӣ аз заҳматҳои чандинсолаи собиқадорон дар рушди соҳаи маориф арзёбӣ гардид.
12
23.08.2026
