14.11.2025
14 ноябри соли 2025 муовини Сарвазири Ҷумҳурии Тоҷикистон, раиси Комиссияи ҷумҳуриявии озмуни “Фурӯғи субҳи доноӣ китоб аст” Дилрабо Мансурӣ ҳамроҳи вазири маориф ва илм Раҳим Саидзода аз ҷараёни баргузории рӯзи якуми даври ниҳоии озмун дар Китобхонаи миллии Тоҷикистон дидан намуданд.
Зимни боздид муовини Сарвазири кишвар ва вазири маориф ва илм аз рафти иҷрои вазифаҳо дар ҳамаи номинатсияҳои озмун, аз ҷумла “Адабиёти кӯдакону наврасон ва осори шифоҳӣ”, “Адабиёти муосири тоҷик”, “Адабиёти классикии тоҷик” ва “Адабиёти ҷаҳон” дидан намуданд.
Масъулони комиссия, доварон ва иштирокчиён дар бораи сатҳи омодагӣ, ҷараёни пешниҳоди мавод ва муҳити озмунӣ маълумоти муфассал ироа карданд.
Дилрабо Мансурӣ дар суҳбат бо довталабон ба ташаббус ва талошҳои китобхонӣ, заҳмати омӯзгорон ва дастгирии волидон баҳои баланд дода, таъкид намуд, ки ин озмун яке аз ташаббусҳои беназири Асосгузори сулҳу ваҳдати миллӣ – Пешвои миллат, Президенти кишвар муҳтарам Эмомалӣ Раҳмон дар самти боло бурдани фарҳанги мутолиа ва боло бурдани завқи китобхонии насли ҷавон мебошад.
Иброз шуд, ки таваҷҷуҳи рӯзафзуни хонандагону донишҷӯён ба китоб ва афзоиши шумораи иштирокчиён дарак аз он медиҳад, ки озмун ба ташаккули тафаккури созанда ва пурзӯр гардидани шавқи мутолиа дар ҷомеа мусоидат намудааст.
Баъди шиносоӣ бо ҷараёни озмун, Дилрабо Мансурӣ вобаста ба дар сатҳи баланд баргузор шудани озмун, шаффофият ва риояи талаботи Низомнома дастурҳои мушаххас дод.
Хабарҳои дигар
-
Иштирок дар Вохӯрии ҳафтуми машваратии сарони давлатҳои Осиёи Марказӣ 16 ноябр дар шаҳри Тошканди Ҷумҳурии Узбекистон Вохӯрии ҳафтуми машваратии сарони давлатҳои Осиёи Марказӣ баргузор шуд. Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар ин вохӯрӣ иштирок ва суханронӣ намуданд. Дар ҳамоиш доираи васеи масъалаҳои мубрами робитаҳои кишварҳои минтақа, дурнамои тавсеаи ҳамкорӣ дар самти таъмини рушди устувори иқтисодӣ, таҳкими заминаи муносибатҳои дӯстӣ ва накуҳамсоягӣ, ҳамчунин, масъалаҳои рушди минбаъдаи фазои фарҳангӣ ва гуманитарӣ баррасӣ шуд. Президенти Ҷумҳурии Тоҷикистон муҳтарам Эмомалӣ Раҳмон зимни суханронӣ нахуст ба роҳбари кишвари мизбон барои пазироии гарм ва ташкили вохӯрӣ дар сатҳи баланд изҳори сипос намуданд. Ҳамчунин, Роҳбари давлати мо муҳтарам Эмомалӣ Раҳмон муҳтарам Илҳом Алиевро ба муносибати ҳамроҳшавии Ҷумҳурии Озарбойҷон ба Вохӯрии машваратии сарони давлатҳои Осиёи Марказӣ табрику таҳният гуфтанд. Президенти кишвари мо муҳтарам Эмомалӣ Раҳмон оид ба нақш ва мавқеи Вохӯрии машваратии сарони давлатҳои Осиёи Марказӣ андешаронӣ намуда, таъкид доштанд, ки минбари он бо эътимод мавқеи худро ҳамчун иштирокдори муҳимми равандҳои байналмилалӣ ва минтақавӣ устувор мегардонад. “Дар ин зимн муносибатҳои байнидавлатӣ таҳким меёбанд ва мо тамосҳои худро бо шарикони хориҷӣ фаъолона пеш мебарем”, изҳор доштанд дар робита ба ин муҳтарам Эмомалӣ Раҳмон. Сарвари давлати мо натиҷаҳои дар гузашта бадастомадаро заминаи мусоид барои густариши маҷмӯи ҳамкории судманд арзёбӣ намуданд. Гуфта шуд, ки Тоҷикистон ҷонибдори рушди минбаъдаи муколамаи сиёсӣ ва ҳамгироии минтақавӣ дар доираи ҳамин қолаб мебошад. Муҳтарам Эмомалӣ Раҳмон аз имзои Аҳдномаи дӯстӣ, ҳамсоягии нек ва ҳамкорӣ барои рушди Осиёи Марказӣ ёдовар шуда, иброз доштанд, ки ин санад уҳдадории муштараки ҷонибҳоро ба пешбурди пайвастаи рӯзнома, ки дар асоси принсипҳои шарикии баробарҳуқуқ, эҳтироми ҳамдигарӣ ва эътимод асос ёфтааст, возеҳ тасдиқ менамояд. Роҳбари давлати мо муҳтарам Эмомалӣ Раҳмон иброз доштанд, ки имрӯз Осиёи Марказӣ ба фазои муколамаи пурсамари дипломатӣ, ташаббусҳои созанда ва ташаккули робитаҳои нави ҳамкорӣ табдил ёфтааст. Президенти кишвари мо муҳтарам Эмомалӣ Раҳмон таъкид доштанд, ки минтақаи мо бо иқтидори назаррас маркази рушди тиҷорат, транзит, энергетика, илм ва сайёҳӣ мебошад. Ба андешаи муҳтарам Эмомалӣ Раҳмон, мувофиқаҳои бадастомада, ки дар Консепсияи рушди ҳамкории минтақавӣ “Осиёи Марказӣ-2040” инъикос ёфтааст, заминаи мустаҳкам барои расидан ба ин аҳдоф фароҳам меоранд. Оид ба аҳамияти қабули Консепсияи таъмини амният, субот ва рушди устувори минтақавӣ дар Осиёи Марказӣ гуфта шуд, ки ин санад барои таъмини амну субот, тақвияти робитаҳои иқтисодӣ ва татбиқи ташаббусҳои муштарак, ки ба рушди ҳамаҷонибаи минтақаи мо нигаронида шудаанд, имкониятҳои васеъ фароҳам меорад. Ҳамчунин, изҳор гардид, ки ин тамоюли созанда ба мо имкон медиҳад, ки иқтидори минтақаи худро ба манфиати наслҳои оянда самаранок истифода намоем. Президенти кишвари мо муҳтарам Эмомалӣ Раҳмон рушди иқтисодиро заминаи устувори оянда номида, зарур шумурданд, ки иқтисоди минтақавӣ тавассути ҳамкорӣ ва навовариҳо густариш дода шавад. Муҳтарам Эмомалӣ Раҳмон зимни суханронӣ таъкид намуданд, ки барои рушди ҳамгироии истеҳсолӣ, таҳияи механизми минтақавии ҳамкории саноатӣ, густариши ҳамкорӣ дар бахши энергетика, таҷдиди долонҳои роҳи оҳан, васеъ намудани нақлиёти ҳавоӣ ва омехта, иқдомҳои муштараки созанда зарур аст. Дар ин робита муҳтарам Эмомалӣ Раҳмон пешниҳод намуданд, ки фазои ягонаи нақлиётӣ ва логистикии Осиёи Марказӣ ташаккул дода шавад. Истифодаи самараноки имкониятҳои минтақаҳои озоди иқтисодӣ дар кишварҳои минтақа зарур шумурда шуд. Бо дарназардошти аҳамияти рӯзафзуни иқтисоди рақамӣ ва зарурати таҳкими ҳамкории минтақавӣ дар ин соҳа, Роҳбари давлати мо муҳтарам Эмомалӣ Раҳмон пешниҳод намуданд, ки Маркази минтақавии зеҳни сунъӣ дар шаҳри Душанбе таъсис дода шавад. Ба андешаи Сарвари давлати мо вазифаи ин марказ таҳияи барномаҳои тадқиқотӣ оид ба истифодаи зеҳни сунъӣ дар соҳаҳои калидии ҳамкорӣ хоҳад буд. Бо истифода аз фурсат муҳтарам Эмомалӣ Раҳмон барои дастгирии Тоҷикистон дар Маҷмаи Умумии СММ ҷиҳати қабули Қатъномаи махсус таҳти унвони “Нақши зеҳни сунъӣ дар фароҳам овардани имконоти нав барои рушди устувор дар Осиёи Марказӣ”, изҳори сипос намуданд. Илова бар ин, гуфта шуд, ки таъсиси як платформаи ягонаи рақамӣ барои рушди тиҷорати электронӣ, ки имрӯз ба нерӯи пешбарандаи иқтисодиёт табдил ёфтааст, мувофиқи мақсад хоҳад буд. Таъкид гардид, ки татбиқи ин ташаббус на танҳо ҳамгироии иқтисодиро тақвият медиҳад, балки ба афзоиши фаъолияти тиҷоратӣ ва гуногунсозии ҷараёнҳои тиҷорат дар минтақа мусоидат хоҳад кард. Президенти кишвари мо муҳтарам Эмомалӣ Раҳмон нигоҳ доштани амнияти минтақавии устуворро яке аз авлавиятҳои асосии ҳамкорӣ номиданд, зеро таҳдидҳои терроризм, экстремизм, идеологияи тундгароӣ, ҷиноятҳои киберӣ ва қочоқи маводи мухаддир нигаронкунанда боқӣ мемонанд. Дар ин зимн пешниҳод гардид, ки ба масъалаи баланд бардоштани иқтидори сохторҳо ва идораҳои дахлдор таваҷҷуҳи махсус зоҳир карда шавад. Рушди мунтазами ҳамкорӣ дар соҳаи омодасозии касбии кадрҳо ва коршиносон барои бахши амният яке аз унсурҳои муҳими муқовимати муносиб бо таҳдидҳои нав номида шуд. Роҳбари давлати мо муҳтарам Эмомалӣ Раҳмон изҳор доштанд, ки бо назардошти афзоиши таҳдидҳои киберӣ, тақвияти чораҳои муштарак бо истифода аз технологияҳои пешрафта зарур аст. Зимни суханронӣ Президенти кишвари мо муҳтарам Эмомалӣ Раҳмон, ҳамчунин, барои бо мундариҷаи нав ғанӣ сохтани равандҳои рушди ҳамкорӣ дар соҳаҳои илм, маориф ва фарҳанг як қатор пешниҳодҳо ба миён гузоштанд. Муҳтарам Эмомалӣ Раҳмон бо назардошти зарурати рушди ҳамкорӣ дар ин самт, пешниҳод намуданд, ки дар Осиёи Марказӣ як маркази байналмилалии инноватсия ва маориф таъсис дода шавад. Сарвари давлати мо муҳтарам Эмомалӣ Раҳмон аз имкониятҳои бузург барои таҳкими муносибатҳои неки ҳамсоягӣ ва густариши ҳамкорӣ дар соҳаҳои сайёҳӣ ва варзиш ёдовар шуда, таъкид доштанд, ки барои баланд бардоштани обурую нуфзи минтақа аз мероси ғании фарҳангию таърихӣ бояд васеъ истифода намоем. Масъалаи экологӣ ҳамчун яке аз самтҳои муҳими ҳамкорӣ номида шуд, зеро тағйирёбии иқлим, обшавии пиряхҳо ва хокборишҳои тӯлонӣ ба амнияти озуқавории кишварҳои мо таъсири бевосита мерасонанд. Дар фароварди сухан муҳтарам Эмомалӣ Раҳмон таъкид намуданд, ки шукуфоии ояндаи Осиёи Марказӣ ба ҳамкории зич вобаста мебошад, ки пеш аз ҳама ба беҳтар намудани сифати зиндагии шаҳрвандон равона шудааст. Аз рӯйи натиҷаҳои Вохӯрии ҳафтуми машваратии сарони давлатҳои Осиёи Марказӣ аз ҷониби сарони давлатҳо Изҳороти муштарак ва дигар санадҳои муҳим ба имзо расид. Дар фароварди ҳамоиш Президенти Ҷумҳурии Узбекистон муҳтарам Шавкат Мирзиёев аз номи сарони давлатҳои Осиёи Марказӣ ва Озарбойҷон Сарвари давлати мо муҳтарам Эмомалӣ Раҳмонро бо Рӯзи Президенти Ҷумҳурии Тоҷикистон самимона табрику таҳният гуфтанд.
41
16.11.2025 -
БАРНОМАИ ФАРҲАНГӢ-МАЪРИФАТӢ БО ИШТИРОКЧИЁНИ ДАВРИ ҶУМҲУРИЯВИИ ОЗМУНИ "ФУРӮҒИ СУБҲИ ДОНОӢ КИТОБ АСТ" Имрӯз бо иштироки муовини вазири маориф ва илми Ҷумҳурии Тоҷикистон Абдухолиқзода Лутфия ва ректори Донишгоҳи байналмилалии забонҳои хориҷӣ ба номи С. Улуғзода Жило Гулназарзода, ҳайати маъмурият ва кормандони Маркази ҷумҳуриявии муассисаҳои таҳсилоти иловагӣ бо иштирокчиёни Озмуни ҷумҳуриявии “Фурӯғи субҳи доноӣ китоб аст” дар толори Муассисаи давлатии "Тоҷикфилм" тамошои дастҷамъонаи филми мустанади "Марди роҳ" баргузор гардид. Боиси қайд аст, ки барои сафарбар намудани иштирокчиён ба макони чорабинӣ бо дастгирии мақомоти иҷроияи ҳокимияти давлатии шаҳри Душанбе як адад нақлиёти мусофиркаши "Автобус"-и дуошёна ҷудо карда шуд. Зимни вохӯрӣ муовини якуми директори "Тоҷикфилм" оид ба корҳои эҷодӣ Ғайбуллозода Толиб иштирокчиёнро бо таърихи студия, аҳли эҷоди он шинос намуда, ба ҳамаи иштирокчиён комёбиву пирӯзиҳо таманно намуданд. Сипас муовини вазири маориф ва илм Лутфия Абдухолиқзода ҳозиринро ба муносибати Рӯзи Президент ва Иҷлосияи сарнавиштсози 16-уми Шурои Олии Ҷумҳурии Тоҷикистон табрик намуда, аз хусуси саҳми Пешвои миллат, Президенти Тоҷикистон муҳтарам Эмомалӣ Раҳмон дар таҳкими сулҳу субот, ваҳдати миллӣ, рушди Истиқлолият ва зиндагии пурсаодати халқи Тоҷикистон ибрози андеша намуданд. Пас аз он ба иштирокчиён филми мустанади "Марди роҳ" ба намоиш гузошта шуд, ки писанди ҳамагон гардид.
46
15.11.2025 -
ҲАМОИШ БАХШИДА БА ТАҶЛИЛИ РӮЗИ ПРЕЗИДЕНТИ ҶУМҲУРИИ ТОҶИКИСТОН Имрӯз, 14 ноябри соли 2025 дар Донишкада бахшида ба Рӯзи Президенти Ҷумҳурии Тоҷикистон ҳамоиш бо роҳбарии ректори Донишкада Наврӯз Мирзозода таҳти унвони «Иҷлосияи XVI-и Шурои Олӣ ва нақши Президенти Ҷумҳурии Тоҷикистон дар таҳкими сулҳ ва субот» баргузор гардид. Дар чорабинӣ муовинони ректор, сардорони раёсату шуъбаҳо, мудирони кафедра, бахш ва кормандону омӯзгорон иштирок намуданд. Ректори Донишкада Наврӯз Мирзозода чорабиниро ифтитоҳ намуда, ҳозиринро ба муносибати Рӯзи Президенти Ҷумҳурии Тоҷикистон табрик гуфта, ба ҳар яки онҳо осмони софу беғубор, меҳру муҳаббат, пирӯзиву муваффақият ва ба Тоҷикистони азиз сулҳу амонӣ таманно намуд. Дар баромад зикр гардид, ки бузургтарину мондагортарин хидмати Пешвои миллат муҳтарам Эмомалӣ Раҳмон ба даст овардани сулҳу ваҳдати миллӣ буд, ки он асосу дарунмояи рушду пешрафти кишварро таъмин намуд. Дар маҷмуъ, дар тамоми соҳаҳои хоҷагии халқ пешравиҳо ба амал омаданд. Тоҷикистон соҳиби нишону парчам, асъори миллӣ гардида, артиши неруманди худро ташкил намуд. Яке аз фазилатҳои инсондӯстонаю волои Пешвои миллат ғамхорӣ дар ҳаққи ятимону бепарасторон маҳсуб меёбад, ки маҳз бо иқдомҳои ватанпарвонаи муҳтарам Эмомалӣ Раҳмон сохтмони ҳазорон мактаб-интернатҳо вусъати тоза гирифт. Хидмати дигари барҷастаи Ҷаноби Олӣ муҳтарам Эмомалӣ Раҳмон барқарор намудани равобиту ҳамкориҳои дӯстона бо давлатҳои ҷаҳон мебошад, ки обрӯву нуфузи кишварро дар миқёси байналмилалӣ хеле баланд бардошт. Баъдан аз ҷониби мудири кафедраи методикаи таълими фанҳои ҷамъиятӣ-гуманитарии Донишкада н.и.с Ҷумахонова Манучеҳра, омӯзгори калони кафедраи иқтисод ва идора дар соҳаи маориф Имомназар Холназаров ва корманди Раёсати корҳои таълимӣ-методӣ Ташрипов Лутфулло доир ба самтҳои дигари ҳамоиш маърӯзаҳо ироа гардид. Дар маърузаҳои худ иброз доштанд, ки бо мустаҳкам гардидани пояҳои давлатдорӣ, рушди ҳамаи соҳаҳо, махсусан мактабу маориф ва мақоми омӯзгор дар ҷомеа баланд гардид, ки ҳамаи он аз заҳматҳои шабонарӯзӣ ва сиёсати хирадмандонаву маорифпарваронаи Президенти кишвар муҳтарам Эмомалӣ Раҳмон вобастагӣ дорад. Дар фарҷом бори дигар Наврӯз Мирзозода таъкид намуд, ки моҳияти таҷлили Рӯзи Президенти Ҷумҳурии Точикистон барои ҳар як корманди Донишкада азиз ва муқаддас буда, фаъолияти рӯзмаъраи худро дар асоси дастуру супоришҳои Сарвари давлат муҳтарам Эмомалӣ Раҳмон ба роҳ мондаанд.
33
14.11.2025
