29-уми ноябри соли ҷорӣ таҳти раёсати вазири маориф ва илм Раҳим Саидзода ҷаласаи навбатии ҳайати мушовараи Вазорати маориф ва илми Ҷумҳурии Тоҷикистон баргузор гардид, ки дар он аъзои ҳайати мушовара, муовинони вазири маориф ва илм, сардорони раёсат, шуъба, бахши дастгоҳи марказӣ, роҳбарони муассисаҳои тобеъ, ректорони муассисаҳои таҳсилоти олии касбӣ, сардори Сарраёсати маорифи шаҳри Душанбе, раёсатҳои маорифи вилоятҳои Суғду Хатлон, ВМКБ ва дигар кормандони соҳаи маориф ба тариқи ҳузурӣ ва маҷозӣ иштирок намуданд.

Нахуст, вазири маориф ва илм ҷаласаро оғоз карда, ҳозиринро ба рӯзномаи ҷаласа ва масъалаҳои ҷории баррасишаванда шинос намуд.

Сипас, гузориши сардори раёсати кадрҳо ва корҳои махсус Ш.Саъдуллозода оид ба «Натиҷаи ҳозиршавии мутахассисони ҷавони муассисаҳои таҳсилоти олии касбии ҷумҳурӣ (равияи омӯзгорӣ) дар соли 2024» шунида шуд.

Зимни баррасии масъалаҳои мазкур раиси ҷаласа иброз дошт, ки таъмини муассисаҳои таҳсилоти умумии ҷумҳурӣ бо кадрҳои баландихтисоси омӯзгорӣ дар меҳвари сиёсати Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қарор дошта, дар робита ба ин масъала Сарвари давлат дар Паёми хеш ба Маҷлиси Олӣ таъкид намуданд, ки: «Ҷиҳати таъмин намудани муассисаҳои таълимӣ бо омӯзгорони баландихтисос чораҷӯӣ карда, доир ба ҳалли масъалаи норасоии омӯзгорон, махсусан, аз фанҳои дақиқ ва забонҳои хориҷӣ, инчунин, бо кадрҳои дорои таҳсилоти олии касбӣ таъмин намудани муассисаҳои таълимӣ тадбирҳои зарурӣ андешида, масъалаи норасоии кадрҳои омӯзгорӣ дар мамлакат бояд пурра бартараф карда шавад». Соли ҷорӣ барои иҷрои дастуру супоришҳои Сарвари давлат ва бартараф намудани норасоии кадрӣ тибқи роҳхати Вазорати маориф ва илми Ҷумҳурии Тоҷикистон ва Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон бо теъдоди 3168 нафар, аз ин шумора 2512 нафар (629 нафар тибқи квота) хатмкардагони муассисаҳои таҳсилоти олии касбӣ ва 656 нафар хатмкардагони муассисаҳои таҳсилоти миёнаи касбӣ ва хатмкунандагони курсҳои 4-ум ва 5-уми равияи омӯзгории муассисаҳои таҳсилоти олии касбӣ ба ҷойи кор фиристода шуданд.

Гуфта шуд, ки пурра бартараф намудани норасоии омӯзгорон, боло бурдани сифати таълиму тарбия дар муассисаҳои таҳсилоти олии касбӣ, тайёр намудани мутахассисони ҷавобгӯ ба бозори меҳнат ва тарбияи ҷавонон дар рӯҳияи ватандӯстиву меҳанпарастӣ дар рушду тавсеаи маорифи миллӣ омили таъсиррасон ба ҳисоб меравад.

Инчунин, гузориши ректори Донишкадаи ҷумҳуриявии такмилиихтисос ва бозомӯзии кормандони соҳаи маориф Н.Мирзозода оид ба «Робитаҳои байналмилалӣ ва ҳамкорӣ бо шарикони рушд дар Донишкада ва филиалҳои он» шунида шуд.

Бо назардошти ироаи таклифу пешниҳодҳои аҳли толор вобаста ба масъалаҳои баррасишуда ва масъалаҳои иловагӣ қарорҳои дахлдор қабул гардид.

Дар охир, вазири маориф ва илм дар доираи дастуру супоришҳои Пешвои миллат муҳтарам Эмомалӣ Раҳмон ба масъулин доир ба иҷрои ҳатмию саривақтии стратегия, барнома, консепсия, қарорҳои ҳайати мушовара ва фармоишҳои вазири маориф ва илм, боло бурдани сифати таълиму тарбия, пешгирии шомилшавии ҷавонон ба ҳизбу ҳаракатҳои террористиву ифротгароӣ, фарогирии бештари кӯдакон ба таҳсилоти томактабӣ, бештар намудани ҳисси ватандӯстиву хештаншиносии ҷавонон, иштироки бештари хонандагону омӯзгорон дар озмунҳои ҷумҳуриявию байналмилалӣ, ҳамкорӣ бо шарикони рушд дар самти такмили ихтисоси омӯзгорон ва дигар самтҳои соҳа супоришҳои мушаххас дод.

Маркази матбуоти

Вазорати маориф ва илми

Ҷумҳурии Тоҷикистон