30.04.2025
Имрӯз, (30.04.2025) дар толори китобхонаи Донишкада даври минтақавии озмуни ҷумҳуриявии “Омӯзгори соли Тоҷикистон-2025” бомуваффақият ҷамъбаст гардид. Дар маросими ҷамъбастии озмун ректори Донишкада - Наврӯз Мирзозода, намояндагони раёсат ва шуъбаҳои маорифи шаҳру ноҳияҳо, ҳайати ҳакамон ва довталабони озмун иштирок намуданд. Ректори Донишкада иброз намуд, ки яке аз иқдомҳои беназири Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон вобаста ба баланд бардоштани мақому манзалати омӯзгор дар ҷомеа имкон дод, ки ҳазорон нафар донишҷӯён, муҳаққиқон ва омӯзгорону кормандони соҳаи маориф ва илм дар озмунҳои гуногун иштирок намуда, дар татбиқи сиёсати маорифпарваронаи Президенти кишвар муҳтарам Эмомалӣ Раҳмон нақши худро гузоранд. Аз ҷумла, имрӯз ҷамъбасти даври минтақавии озмуни ҷумҳуриявии "Омӯзгори соли Тоҷикистон" бори дигар нишон дод, ки омӯзгорону навовару эҷодкор кӯшиш менамояд, маҳорату малакаи худро нишон дода, дар давраҳои минбаъдаи озмун сабқат намоянд. Рафти озмун шаффоф ва тибқи талаботҳои Низомномаи озмун баргузор гардид, ҷиҳати фаъолияти довталабон ва ҳакамон ҳамаи шароитҳо муҳайё гардиданд. Дар рафти озмун вазири маориф ва илм муҳтарам Саидзода Раҳим Ҳамро бевосита ташриф оварда бо довталабон суҳбат анҷом дода, ҷиҳати дастгириҳои давлату ҳукумат оид ба мактабу маориф ва баланд бардоштани мақому манзалати омӯзгор дар ҷомеа андешаронӣ намуданд.
Ҳайати ҳакамон аз рафти озмун натиҷагирӣ намуда, дар асоси талаботи Низомномаи озмуни "Омӯзгори соли Тоҷикистон" ғолиби даври минтақавиро эълон намуданд.
Ҳамин тавр, Неъматов Ҷамшед-омӯзгори фанни химияи муассисаи таҳсилоти миёнаи умумии №39-и ноҳияи Варзоб дар рафти озмун малака ва маҳорати баланди касбӣ нишон дода, сазовори ҷойи аввал дониста шуда, барои сабқат ба даври ҷумҳуриявии озмун пешниҳод карда шуд.
Ба довталабон Бобиев Маҳмадрасул – омӯзгори фанни математикаи МТМУ №182 ноҳияи Рӯдакӣ ва Шарифов Фирдавс – омӯзгори фанни географияи МТМУ №3 ноҳияи Рашт пешниҳод карда шуд, ки ҳамчун омӯзгорони ҳамкор дар Донишкада фаъолият намоянд.
Ҳамзамон, иброз гардид, ки таҷрибаи ҳамаи довталабон ҳамчун омӯзгорони таҷрибаи пешқадам мавриди омӯзиш қарор гирифта, дар семинару омӯзишҳо ва тренингҳои Донишкада ҷалб карда мешаванд.
Ёдовар мешавем, ки озмун рӯзи 27-уми апрел оғоз шуда, дар давоми се рӯз иштирокчиён аз руйи шаш шарт маҳорати худро санҷиданд.
Хабарҳои дигар
-
ТАТБИҚИ НИЗОМИ 10-ХОЛА ДАР МУАССИСАҲОИ ТАЪЛИМӢ 30 апрели соли ҷорӣ дар Маркази таълимию методии Вазорати маориф ва илми Ҷумҳурии Тоҷикистон ҷаласаи кории муовини вазири маориф ва илм Равшан Каримзода бо таҳиягарони дастурҳои методӣ оид ба татбиқи низоми 10-холаи баҳогузорӣ дар муассисаҳои таҳсилоти миёнаи умумии кишвар баргузор гардид. Дар оғоз муовини вазир таъкид намуд, ки таҳкими сифати таҳсилот ва мутобиқ кардани он ба талаботи ҷаҳонӣ яке аз ҳадафҳои асосии сиёсати давлатӣ дар соҳаи маориф мебошад ва ворид кардани низоми баҳогузории 10-хола як иқдоми муҳимми стратегӣ барои беҳтар намудани сифати таҳсилот ва баланд бардоштани сатҳи дониш ва малакаи хонандагон дар кишвар ба ҳисоб меравад. Ҳамзамон муовини вазир қайд намуд, ки низоми 10-холаи баҳогузорӣ дар давлатҳои Иттиҳоди Аврупо, аз ҷумла Литва, Латвия ва Италия, қаблан татбиқ шудааст ва як таҷрибаи муваффақ ба шумор рафта, таҷрибаи онҳо нишон медиҳад, ки ин низом ба рушди фикри мустақил ва қобилиятҳои амалии хонандагон кӯмак мерасонад. Гуфта шуд, ки низоми баҳогузории 10-хола як ислоҳоти амиқи методологӣ ва педагогӣ дар раванди таълим мебошад ва имконият медиҳад, ки натиҷаҳои таълимии хонандагон бо дақиқии бештар ва ба таври таҳлилӣ арзёбӣ шаванд. Аз ҷониби дигар, низом имконият медиҳад, ки муҳити таълимии муассисаҳои таълимӣ мутобиқ ба хусусиятҳои инфиродии хонандагон барои беҳтар кардани ҷараёни таълим тарҳрезӣ шавад. Ёдовар мешавем, ки дар кишвар озмоиши низоми баҳогузории 10-хола дар 140 муассисаи таълимӣ, ки аз минтақаҳои гуногуни кишвар интихоб шудаанд, ба роҳ монда шуда, натиҷаҳои онро метавон мусбат арзёбӣ кард. Татбиқи низоми баҳогузории 10-хола дар муассисаҳои таълимии Тоҷикистон як қадами муҳим дар ислоҳоти соҳаи маориф буда, ҷиҳати мутобиқ намудани маорифи миллӣ бо стандартҳои ҷаҳонии таҳсилот омили таъсиррасон ба ҳисоб меравад. Маркази матбуоти Вазорати маориф ва илми Ҷумҳурии Тоҷикистон
32
30.04.2025 -
ВОХӮРИИ ВАЗИРИ МАОРИФ ВА ИЛМ БО НАМОЯНДАИ БОНКИ ИСЛОМИИ РУШД Имрӯз, 30 апрели соли 2025 вазири маориф ва илми Ҷумҳурии Тоҷикистон Раҳим Саидзода бо намояндаи Бонки Исломии Рушд Ҷафер Бисер ва роҳбари намояндагии Бонки Исломии Рушд дар Ҷумҳурии Тоҷикистон Исмоил Ғаффоров вохӯрӣ намуд. Дар оғози мулоқот вазири маориф ва илм иброз дошт, ки барои ба даст овардан ва расидан ба ҳадафҳои бузурге, ки дар назди худ барои рушди соҳаи маориф дар сатҳи нав ва ҳамқадам бо технологияҳои муосир гузоштаем, барои ташаккулёбии кишварамон аҳамияти ҳалкунанда дорад. Дар ҳамкорӣ бо Бонки Исломии Рушд, Шарикии глобалӣ дар соҳаи маориф, Фонди ОПЕК марҳилаи аввали татбиқи лоиҳаи муштараки Дастгирии амалигардонии Стратегияи миллии рушди маорифи Ҷумҳурии Тоҷикистон дар арафаи анҷомёбӣ қарор дошта, марҳилаи II лоиҳаи мазкур фаъолиятро оғоз намуд. Амалигардонии лоиҳаи мазкур ҷиҳати баланд бардоштани дастрасӣ ба таҳсилоти асосӣ, фароҳам овардани шароити мусоид барои хонандагон ва муаллимон, дастгирии институтсионализатсия ва татбиқи ислоҳоти барномаи таълимии таҳсилоти фарогир дар асоси салоҳият бо назардошти омилҳои гендерӣ; таъсис додани системаи таълимии доимии касбии омӯзгорон ва барои баланд бардоштани некӯаҳволии умумии аҳолии Ҷумҳурии Тоҷикистон мусоидат мекунад. Дар навбати худ намояндаи Бонки Исломии Рушд қайд намуд, ки ҷиҳати боз ҳам хубтару беҳтар ба роҳ мондани ҳамкориҳо дар низоми таҳсилоти миллии Тоҷикистон тамоми саъю кӯшиши худро ба харҷ дода, талош менамоем, ки дигар шарикони рушдро низ барои дар амал татбиқ намудани ҳадафу мақсадҳои созанда дар соҳаи маориф ҷалб намоем. Инчунин бо таваҷҷуҳ ба ҳодисаи табиӣ, ки 13-уми апрел дар водии Рашт қисме аз муассисаҳои таълимӣ зарар диданд, қайд гардид, ки Бонки Исломии Рушд барои бунёди сохтмони муассисаҳо омодаи ҳамкорӣ мебошад. Дар охир, вазири маориф ва илм изҳори умед намуд, ки натиҷаи ҳамкориҳо миёни Вазорати маориф ва илм ва Бонки Исломии Рушд барои расидан ба ҳадафи беҳтар намудани сифати таҳсилот, баланд бардоштани сатҳи касбияти кадрҳои омӯзгорӣ, китобҳои дарсии мутобиқ ба талаботи меъёрӣ, инчунин, бунёд ва азнавсозии муассисаҳои муосири таълимӣ заминаи мустаҳкам хоҳад гузошт. Маркази матбуоти Вазорати маориф ва илми Ҷумҳурии Тоҷикистон
37
30.04.2025 -
ФАТҲИ ҚУЛЛАҲОИ НАВ: ҒОЛИБИЯТИ ХОНАНДАГОНИ ТОҶИКИСТОН ДАР ОЛИМПИАДАИ БАЙНАЛМИЛАЛИИ BRAINIACS Аз 24 то 30-юми апрели соли ҷорӣ дар шаҳри Куала-Лумпури Малайзия даври ниҳоии Олимпиадаи байналмилалии Brainiacs баргузор гардид. Дар ин Олимпиада кишвари моро 117 нафар хонанда аз муассисаҳои таҳсилоти умумии кишвар муаррифӣ намуданд, ки аз ин шумора 12 нафар сазовори медали тило, 12 нафар сазовори медали нуқра ва 36 нафар сазовори медали биринҷӣ гардиданд. Олимпиадаи мазкур сатҳи миёна буда, аз фанҳои математика, физика, химия, биология ва зеҳни сунъӣ миёни хонандагони 50 давлати дунё баргузор карда шуд. Иштироки фаъолона ва натиҷаҳои назарраси хонандагони тоҷик дар ин олимпиадаҳои байналмилалӣ гувоҳи равшани сатҳи баланди омодагии онҳо ва таваҷҷуҳи Ҳукумати Ҷумҳурии Тоҷикистон ба рушди соҳаи маориф мебошад. Бояд қайд кард, ки Олимпиадаи Brainiacs майдоне барои муаррифии истеъдодҳои ҷавон, табодули таҷриба миёни иштирокдорон аз кишварҳои гуногун ва мусоидат ба рушди минбаъдаи илмҳои дақиқ ва технологияҳои нав дар байни насли наврас буда, барои омодашавии хонандагон ба олимпиадаҳои сатҳи баланд заминаи мусоидро фароҳам меорад. Маркази ҷумҳуриявии дарёфт ва рушди истеъдодҳо
47
30.04.2025
