18.03.2025
18-уми марти соли равон дар Вазорати маориф ва илми Ҷумҳурии Тоҷикистон ҷаласаи якуми ҳайати Комиссияи озмуни ҷумҳуриявии “Фурӯғи субҳи доноӣ китоб аст” дар соли 2025 таҳти раёсати раиси комиссияи озмуни мазкур, муовини Сарвазири Ҷумҳурии Тоҷикистон Дилрабо Мансурӣ баргузор гардид.
Дар кори ҷаласа муовини вазири маориф ва илм Равшан Каримзода, аъзоёни комиссияи озмун, намояндагони мақомоти иҷроияи ҳокимияти давлатии вилоят ва шаҳру ноҳияҳои кишвар, сардорон ва мудирони раёсату шуъбаҳои маориф ва дигар масъулон ба тариқи ҳузурӣ ва маҷозӣ иштирок намуданд.
Нахуст, Дилрабо Мансурӣ иштирокчиёни ҷаласаро ба муносибати фарорасии ҷашни байналмилалии Наврӯз табрику таҳният гуфта, қайд намуд, ки бо ташаббуси Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар кишвар озмуни ҷумҳуриявии “Фурӯғи субҳи доноӣ китоб аст” роҳандозӣ гардида, аз ҷониби аҳолӣ дастгирии васеъ пайдо кардааст.
Раиси комиссия доир ба вазифаҳои Комиссияи ҷумҳуриявӣ ва салоҳиятҳои он тибқи Низомномаи озмуни ҷумҳуриявии “Фурӯғи субҳи доноӣ китоб аст”баромад карда, вазифаҳои комиссияро дар самти баргузор намудани озмун иброз намуд.
Сипас, муовини вазири маориф ва илм доир ба ҷамъбасти озмун дар соли 2024 ва омодагиҳо барои баргузории он дар соли 2025 ва тартиби баргузории он маъруза намуд. Муовини вазири маориф ва илм қайд кард, ки соли ҳафтум аст, ки озмун таҳти сарпарастии бевоситаи Пешвои муаззами миллат муҳтарам Эмомалӣ Раҳмон бо мақсади баланд бардоштани завқи китобхонӣ, тақвияти неруи зеҳнӣ, дарёфти чеҳраҳои нави суханвару сухандон, арҷ гузоштан ба арзишҳои миллию фарҳангӣ, инкишофи қобилияти эҷодӣ, таҳкими эҳсоси худогоҳию худшиносӣ, такмили захираи луғавӣ, тақвияти ҷаҳони маънавӣ миёни аҳолии кишвар, аз ҷумла, хонандагони муассисаҳои таҳсилоти миёнаи умумӣ, хонандагон ва донишҷӯёни муассисаҳои таҳсилоти ибтидоӣ, миёна ва олии касбӣ, баъд аз муассисаҳои таҳсилоти касбӣ, омӯзгорони ҳамаи зинаҳои таҳсилот, ходимони илмию адабии муассисаҳои илмиву эҷодӣ, фарҳангу санъат, калонсолон, намояндагони касбу кори гуногун ва дигар табақаҳои аҳолии кишвар доир мегардад.
Тибқи Амри Президенти Ҷумҳурии Тоҷикистон аз 2 январи соли 2025 ба Низомномаи озмуни ҷумҳуриявии “Фурӯғи субҳи доноӣ китоб аст” тағйиру иловаҳо ворид гардида, дар соли 2025 номинаи эҷоди назм ва наср тибқи хулоса ва пешниҳоди коршиносон аз низомнома берун карда шуд. Ҳамзамон, ҷиҳати боз ҳам такмил ва таҳким бахшидани раванди баргузории озмун ва ҳавасмандсозии бештари иштирокчиён бо дастури бевоситаи Роҳбари давлат ба Низомномаи озмун дар соли 2025 навгониҳо ворид карда шуд.
Ҳамин тавр, вобаста ба иштирокдорони озмун маҳдудиятҳо бартараф карда шуда, минбаъд дар озмуни мазкур дар баробари шаҳрвандони Ҷумҳурии Тоҷикистон шаҳрвандони кишварҳои хориҷӣ, аз он ҷумла, тамоми тоҷикони ҷаҳон ва ҳамватанони бурунмарзӣ низ метавонанд фаъолона иштирок намоянд.
Бар замми ин, мукофотпулӣ барои ғолибони озмун ду баробар зиёд карда шуда, маблағи умумӣ барои баргузорӣ ва қадршиносии ғолибони озмун 6 670 000 (шаш миллиону шашсаду ҳафтод ҳазор) сомониро ташкил медиҳад.
Дар ҷаласа масъалаҳои зиёде, аз қабили дастрас намудани китобҳои бадеии электронӣ ба иштирокчиён, аз рӯйи принсипи ягона баҳо гузоштан ба иштирокчиён мавриди муҳокима ва баррасӣ қарор гирифт.
Инчунин, таъкид шуд, ки ба хотири таъмини пурраи шаффофият, пешгирӣ аз ҳолатҳои баҳогузории ғайримеъёрӣ ва қонеъ гардонидани дархости иштирокчиён зарур аст, ки баргузории даврҳои сеюм ва чоруми озмун пурра ба навор гирифта шавад.
Пешниҳод гардид, ки даври якуми озмун моҳи март ва даври дуюм моҳи май баргузор карда шавад.
Дар охир ҳайати ҷаласаи озмун қарорҳои дахлдор ҷиҳати баргузории даври аввали он ва андешидани чораҳои зарурӣ қабул намуд.
Маркази матбуоти
Вазорати маориф ва илми
Ҷумҳурии Тоҷикистон
Хабарҳои дигар
-
Гузоштани санги асоси калонтарин Маҷмааи хизматрасонӣ дар Душанбе 3 сентябр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ва Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ барои бунёди Маҷмааи меъмории бисёрсамтаи хизматрасонӣ дар ноҳияи Шоҳмансури пойтахт сангӣ асос гузоштанд. Маҷмааи меъморӣ аз 52 силсилаи иншоот, аз ҷумла 5 бурҷи баланд иборат хоҳад буд. Бурҷи аз ҳама бузурги он, ки бо 77 ошёна 340 метр баландӣ хоҳад дошт, бурҷи Душанбе номида хоҳад шуд. Ин маҷмаа бо чунин бурҷҳои азим ва калонтарин маркази савдо (mall) дар кулли минтақа камназир хоҳад буд. Маҷмаа дорои меҳмонхона, қаҳвахона, тарабхона, нуқтаҳои тиҷоратию хизматрасониҳои гуногун, ҳуҷраҳои корӣ, толори консертӣ бо 1000 ҷойи нишаст, толори намоиши кино, маркази савдою фароғат, ҷой барои бозии кӯдакон, макони дилфаро барои гузаронидани чорабиниҳои гуногун, толори варзишӣ, боғ ва кӯл хоҳад буд. Намои берунаи биноҳо мувофиқ ба талаботи брендҳои ҷаҳонӣ сохта мешавад. Дар ин маҷмааи муҳташам намунаи маҳсулоти брендӣ ва хӯроку хизматрасониҳои ҷаҳонӣ ҳам пешниҳоди сокинону меҳмонони шаҳри Душанбе мегардад. Дар доираи лоиҳаи муосир 42 бинои истиқоматӣ бо 6160 манзили зист, бинои муассисаи таҳсилоти миёнаи умумӣ барои 1200 хонанда ва кӯдакистон барои 500 кӯдак сохта мешавад. Дар маҷмуъ баъди татбиқи пурраи лоиҳа дар ин гӯшаи шаҳри Душанбе бо пешниҳоди беҳтарин шароити кору хизматрасонӣ ва зист дар майдони 29 гектар шаҳраки зебою замонавӣ бо масоҳати умумии 270 ҳазор метри мураббаъ сохта шуда, зиёда аз 4300 ҷойи нави корӣ муҳайё мегардад. Зиёда аз 2000 бинокори маҳаллӣ дар вақти сохтмони ин маҷмааи азим, ки дар муҳлати 5 сол бояд ба анҷом расад, ба кор ҷалб мегарданд. Умуман, ин баландтарин иншоот дар минтақа хоҳад буд, ки дорои самтҳои васеи кору хизматрасонӣ гашта, бо афзалият ба идоракунии технологии рақамӣ бо назардошти тараққиёти минбаъдаи пойтахти кишвар дар он барои тиҷорат, истироҳат, зиндагӣ ва саёҳат шароити муосир фароҳам оварда мешавад. Намунаи имкониятҳои нави иқтисодию тиҷоратӣ, таҷрибаи муосири шаҳрсозию шаҳрдорӣ ва хизматрасонӣ дар ин маҷмааи муҳташами муосир таҷассум хоҳад ёфт. Роҳбари давлат муҳтарам Эмомалӣ Раҳмон зимни шиносоӣ бо лоиҳаи иншооти нав таваҷҷуҳи масъулини дахлдор ва соҳибкорону меъморонро ба иҷрои босифати корҳои сохтмонӣ бо афзалият ба сохти меъмории муосири шаҳрсозӣ ҷалб намуданд. Маҷмааи хизматрасонӣ аз ҷониби ҷамъияти дорои масъулияти маҳдуди TAS ИНТЕРНЕШНЛ ГРУП бо пешниҳоди инфросохтори намунавии муосири иҷтимоӣ сохта мешавад. Имрӯз ҳадафи шаҳрдорӣ дар доираи татбиқи нақшаи генералии шаҳри Душанбе бо бунёди ин маҷмааи муҳташам барои фароҳам овардани шароити замонавӣ ҷиҳати кору хизматрасонӣ, ҷалби сармоя ва ҷаҳонгардон, беҳсозии имконият ва таъмини фазои мусоид барои кору зиндагӣ, тиҷорат ва истироҳату фароғат мебошад. Иҷрои саривақтии дастуру супоришҳои Роҳбари давлат аз ҷониби Раиси шаҳри Душанбе муҳтарам Рустами Эмомалӣ бо такя ба таърихи ғании созандагии миллат ва омезиши он бо таҷрибаи технологии меъмории муосир имкон фароҳам овардааст, ки солҳои охир Душанбе ба намунаи ибратбахши шаҳрдорию шаҳрсозӣ дар минтақа табдил ёбад.
5
04.09.2026 -
ВОХӮРӢ БО РОҲБАРИ БАХШИ МАОРИФИ ЮНИСЕФ ДАР ТОҶИКИСТОН 2 сентябри соли 2026 муовини вазири маориф ва илми Ҷумҳурии Тоҷикистон Илҳомуддин Иброҳимзода бо мудири бахши маорифи Хазинаи кӯдакони Созмони Милали Муттаҳид (ЮНИСЕФ) дар Тоҷикистон Наоко Хосака вохӯрӣ анҷом дод. Дар вохӯрӣ директори Муассисаи давлатии «Маркази ҷумҳуриявии таълимию методӣ» назди Вазорати маориф ва илми Ҷумҳурии Тоҷикистон, муовини сардори раёсати таҳсилоти олии касбӣ ва баъдидипломӣ, муовини директори марказ, сардори раёсати таҳсилоти касбии марказ, сармутахассиси ЮНИСЕФ дар Тоҷикистон ва мушовири миллӣ оид ба такмили низоми омодасозии кадрҳои педагогӣ иштирок намуданд. Зимни мулоқот ҷонибҳо масъалаҳои вобаста ба такмили низоми омодасозии кадрҳои педагогӣ, бозбинии барномаҳои таҳсилотии ихтисосҳои омӯзгорӣ, таҳкими ҷанбаҳои амалии омодасозии донишҷӯён ва татбиқи модели нави таҷрибаомӯзии педагогиро мавриди баррасӣ қарор доданд. Муовини вазир зимни суҳбат таъкид намуд, ки баланд бардоштани сифати омодасозии кадрҳои педагогӣ аз самтҳои муҳимми рушди низоми маориф ба ҳисоб рафта, мутобиқ намудани мазмуну муҳтавои барномаҳои таҳсилотӣ ба талаботи муосири касби омӯзгорӣ ва эҳтиёҷоти муассисаҳои таълимӣ аҳаммияти хосса дорад. Дар ин замина масъалаҳои ташаккули салоҳиятҳои касбӣ, методӣ, рақамӣ, таҳлилӣ ва иҷтимоии омӯзгорони оянда, истифодаи усулҳои фаъоли таълим, арзёбии натиҷаҳои таълим, таҳияи маводи таълимӣ ва истифодаи самараноки технологияҳои муосир мавриди таваҷҷуҳ қарор гирифтанд. Ҷонибҳо ҳамчунин зарурати тақвияти ҷанбаи амалии омодасозии донишҷӯёни ихтисосҳои педагогиро муҳим арзёбӣ намуданд. Қайд гардид, ки пайванди донишҳои фаннӣ, педагогӣ, психологӣ ва методӣ бо фаъолияти амалии донишҷӯ дар муассисаи таълимӣ барои ташаккули омодагии воқеии касбии омӯзгори оянда заминаи мусоид фароҳам меорад. Дар идомаи мулоқот ба масъалаи татбиқи модели нави таҷрибаомӯзии педагогӣ таваҷҷуҳи махсус зоҳир гардид. Таъкид шуд, ки таҷрибаомӯзии педагогӣ бояд ба иштироки фаъоли донишҷӯ дар банақшагирӣ ва гузаронидани дарс, таҳияи маводи таълимӣ, арзёбии дастовардҳои хонандагон, таҳлили натиҷаҳо ва худбаҳодиҳии фаъолияти касбӣ мусоидат намояд. Ҳамзамон нақши омӯзгори роҳнамо дар раванди таҷрибаомӯзӣ муҳим арзёбӣ гардид. Пешниҳоди машварату дастгирии мунтазам, таҳлили фаъолияти педагогии донишҷӯ ва муайян намудани самтҳои такмили маҳорати касбӣ метавонад ба рушди устувори омӯзгори оянда мусоидат намояд. Ҷонибҳо зарурати таҳкими робитаи муассисаҳои таҳсилоти олии касбӣ бо муассисаҳои таҳсилоти умумиро таъкид намуда, чунин ҳамкориро барои наздик намудани мазмун ва раванди омодасозии омӯзгорон ба талаботи воқеии муассисаҳои таълимӣ муҳим арзёбӣ карданд. Наоко Хосака омодагии ЮНИСЕФ-ро барои идомаи ҳамкории судманд бо Вазорати маориф ва илми Ҷумҳурии Тоҷикистон дар самти такмили низоми омодасозии кадрҳои педагогӣ, рушди таҷрибаомӯзии педагогӣ ва дастгирии ташаббусҳои марбут ба баланд бардоштани сифати таҳсилот изҳор намуд. Дар анҷоми вохӯрӣ ҷонибҳо сатҳи ҳамкориҳои мавҷударо мусбат арзёбӣ намуда, омодагии худро барои идомаи корҳои муштарак, табодули таҷриба ва таҳияи механизмҳои муассири татбиқи ташаббусҳои пешбинишуда баён доштанд.
44
03.09.2026 -
РӮЗИ ДОНИШ – ОҒОЗИ РОҲИ МАЪРИФАТ 1 сентябри соли 2026 дар Пажӯҳишгоҳи рушди маориф ба номи Абдураҳмони Ҷомӣ бахшида ба Рӯзи дониш ва Дарси сулҳ таҳти унвони «Рӯзи дониш – оғози роҳи маърифат» конференсияи илмӣ-назариявӣ баргузор гардид. Конференсияро директори Пажӯҳишгоҳи рушди маориф ба номи Абдураҳмони Ҷомӣ, номзади илмҳои техникӣ Ниёзӣ Сиродҷиддин ифтитоҳ намуда, ҳозиринро ба муносибати оғози соли нави таҳсил, Рӯзи дониш ва Дарси сулҳ табрик гуфт. Мавсуф зимни суханронӣ ба нуктаҳои меҳварии суханронии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон, ки 31 августи соли 2026 ба муносибати Рӯзи дониш ва Дарси сулҳ ироа гардид, таваҷҷуҳ зоҳир намуд. Аз ҷумла, таъкид гардид, ки Сарвари давлат мақому манзалати илму дониш ва нақши маорифро дар таъмини ояндаи давлату миллат хеле баланд арзёбӣ намуда, иброз доштанд: «Миллати мо ҳанӯз аз аҳди бостон илм, маърифат ва китобро чароғи зиндагӣ, асоси давлатдорӣ ва сарчашмаи пешрафти ҷомеа медонист». Зимни шарҳи ин нуктаи муҳим таъкид намуд, ки дар шароити ҷаҳони муосир Рӯзи дониш танҳо оғози соли нави таҳсил набуда, балки рамзи арҷгузорӣ ба илм, маърифат, омӯзгор ва фарҳанги донишандӯзии миллати тоҷик мебошад. Дар бахши маърузаҳои илмӣ Амонов Салоҳиддин, номзади илмҳои педагогӣ, мудири шуъбаи коркард, татбиқи технологияи инноватсионӣ ва таҳсилоти фосилавии Пажӯҳишгоҳи рушди маориф ба номи Абдураҳмони Ҷомӣ, дар мавзуи «Маориф дар меҳвари рушди миллӣ: дастовардҳо, мушкилот ва вазифаҳои марҳалаи нав» маъруза намуд. Зимни маъруза дастовардҳои соҳаи маориф, масъалаҳои мавҷуда, зарурати татбиқи технологияҳои инноватсионӣ ва вазифаҳои афзалиятноки марҳалаи нави рушди таҳсилот мавриди таҳлил қарор гирифтанд. Ҳамчунин, Бобоева Маҳина, номзади илмҳои педагогӣ, мудири шуъбаи муассисаҳои томактабӣ, ибтидоӣ, бозигарӣ ва таҳкими стандарт, бо маъруза баромад намуда, масъалаҳои рушди таҳсилоти томактабӣ ва ибтидоӣ, такмили сифати таълиму тарбия, мазмуну муҳтавои таҳсилот ва татбиқи талаботи стандартҳои муосирро мавриди баррасӣ қарор дод. Рушди таҳсилоти томактабӣ дар ҷараёни конференсия ҳамчун яке аз самтҳои муҳимми сиёсати давлатии маориф мавриди таваҷҷуҳи махсус қарор гирифт. Дар ин замина таъкиди Пешвои миллат ёдоварӣ гардид, ки «таълиму тарбияи кӯдакон дар муассисаҳои томактабӣ зинаи муҳимтарин барои ояндаи онҳо ба шумор меравад». Дар анҷоми конференсия миёни иштирокчиён доир ба масъалаҳои матраҳшуда мубодилаи афкор сурат гирифта, таъкид гардид, ки татбиқи дастуру ҳидоятҳои Пешвои миллат, тақвияти корҳои илмиву таҳқиқотӣ, таҳияи технологияҳои инноватсионии таълим ва пайванди натиҷаҳои илмӣ бо амалияи педагогӣ аз вазифаҳои муҳимми аҳли илм ва маориф ба ҳисоб меравад. Конференсияи «Рӯзи дониш – оғози роҳи маърифат» бори дигар собит намуд, ки арҷгузорӣ ба илму дониш, рушди тафаккури илмӣ ва тарбияи насли соҳибмаърифат заминаи устувори пешрафти ҷомеа ва ояндаи давлат мебошад.
33
03.09.2026
