08.04.2026
Бахшида ба 35 - солагии Истиқлоли давлатии Ҷумҳурии Тоҷикистон, Рӯзи иқтисодчиён ва эълон гардидани солҳои 2025-2030 - “Cолҳои рушди иқтисоди рақамӣ” санаи 8 апрели соли равон дар Донишгоҳи Техникии Тоҷикистон ба номи академик М.С.Осимӣ конференсияи байналмилалии илмӣ-амалиро таҳти унвони “Тамоюлҳо ва дурнамои рушди инноватсионии иқтисоди рақамӣ” ташкил ва баргузор гардид.
Дар конференсияи мазкур олимон ва муҳаққиқони дохиливу хориҷӣ, омӯзгорон, магистрантон, докторантон, донишҷӯён ва кормандони Донишгоҳи техникии Тоҷикистон иштирок намуданд.
Қисмати ифтитоҳии конференсияи байналмилалӣ бо суханронии муовини ректор оид ба илм ва инноватсия Рамазон Абдуллозода оғоз гардида, бо қаноатмандию нишоти худ ва ҳайати омӯзгорону донишҷӯёни донишгоҳ ва меҳмонон барои ташриф миннатдорӣ намуда, баргузории чунин конференсияҳоро қадами муҳимму устувор дар роҳи таҳкими омода намудани мутахассисони варзида дар соҳаи иқтисодиёти рақамӣ арзёбӣ намуданд.
Дар идомаи қисмати асосӣ иштирокчиёни конфронс дар мавзуҳои мубрами рӯз аз ҷумла профессори кафедари Иқтисодиёт ва логистикаи нақлиёти донишгоҳ Ҳамроев Ф.М. дар мавзуи “Нақши долонҳои нақлиёти сабз дар баланд бардоштани самаранокӣ ва сифати ҳамлу нақли байналмиллалӣ ва таранзитӣ”, доктори илмҳои иқтисодӣ, профессор, сарходими илмии Институти иқтисодиёт ва демографияи Академияи миллии илмҳои Тоҷикистон Рауфӣ Абдуғаффор дар бораи “Муҳимияти рақамикунонии иқтисодиёти Тоҷикистон”, докторант (PhD)-и курси 3-и кафедраи иқтисодиёт ва ташкили истеҳсолоти факултети иқтисодиёти соҳаҳо ва идораи донишгоҳ Бердиева Н. дар мавзуи “Экономико-математическое моделирование, взаимосвязи конкурентных преимуществ промышленных предприятий с процессами цифрровизации в экономике” ва магистранти курси якуми ихтисоси 270101-17 кафедраи иқтисодиёт ва ташкили истеҳсолоти факултети иқтисодиёти соҳаҳо ва идораи донишгоҳ Хайруллоева М.Б. оиди “Интеграция BIM – технологий, искусственного интеллекта имашинного обучения в процессы расчета стоимости строительства”. маърузахонӣ намуданд.
Дар рафти конференсия аз ҷониби маърузачиён таъкид гашт, ки иқтисоди рақамӣ ҳамчун марҳилаи сифатан нави рушд, дар заминаи ҳамгироии технологияҳои иттилоотӣ, додаҳои калон ва системаҳои интеллектуалӣ ташаккул меёбад. Дар шароити кунунӣ, ки рақобати ҷаҳонӣ босуръат афзоиш меёбад, кишварҳо бояд тавонанд натиҷаҳои илмӣ ва технологияҳоро ба амалия табдил диҳанд. Конфронс ин равандро дар заминаи таҳлили назариявӣ ва таҷрибаҳои байналмилалӣ муҳокима намуд.
Ҳамзамон дар ҷараёни конфронс як қатор масъалаҳои марбут ба ҷомеаи ҷаҳонӣ аз қабили энергетика, саноат ва сохтмон, нақлиёт, логистика ва алоқа технологияҳои инноватсионӣ, амнияти рақамӣ ва зеҳни сунъӣ ва сармояи инсонӣ баррасӣ гардиданд.
Дар фарҷом иштирокчиёни конфронси байналмилалӣ қайд намуданд, ки натиҷаҳои конфронс метавонанд ҳамчун заминаи назариявӣ ва амалӣ барои таҳияи стратегияҳои миллии рушди иқтисоди рақамӣ, густариши ҳамкориҳои байналмилалӣ ва татбиқи технологияҳои инноватсионӣ хизмат кунанд. Конфронс ҳамчун платформаи муҳими мубодилаи дониш ва таҷриба имконият фароҳам овард, ки илми иқтисоди рақамӣ ва роҳҳои татбиқи он дар соҳаҳои гуногун таҳлил карда шаванд.
Хабарҳои дигар
-
ОҒОЗИ ДАВРИ ҶУМҲУРИЯВИИ ОЛИМПИАДАҲОИ ФАННӢ БАРОИ ХОНАНДАГОНИ СИНФИ 11 Имрӯз, 9 апрели соли 2026 дар Муассисаи таълимии давлатии «Мактаби байналмилалии Президентӣ» дар шаҳри Душанбе даври чорум (ҷумҳуриявӣ)-и олимпиадаҳои фаннӣ барои хонандагони синфи 11-и муассисаҳои таҳсилоти умумии кишвар оғоз гардид. Дар маросими ифтитоҳи олимпиада муовини вазири маориф ва илми Ҷумҳурии Тоҷикистон Равшан Каримзода, муовини якуми директори Маркази ҷумҳуриявии дарёфт ва рушди истеъдодҳо Н. Ғафуриён, муовини якуми директори Маркази миллии тестии назди Президенти Ҷумҳурии Тоҷикистон А. Шодиниё, инчунин намояндагони раёсату шуъбаҳои маориф, омӯзгорон, волидайн ва хонандагон иштирок намуданд. Муовини вазири маориф ва илм зимни ифтитоҳи чорабинӣ зикр намуд, ки олимпиадаҳои фаннӣ ҳамчун бахши муҳимми сиёсати давлатӣ дар соҳаи маориф ба рушди зеҳнӣ, таҳкими ҷаҳонбинии илмӣ ва баланд бардоштани сатҳи донишандӯзии хонандагон мусоидат менамоянд. Қайд гардид, ки чунин чорабиниҳо барои дарёфт ва рушди истеъдодҳо, тақвияти шавқу рағбат ба омӯзиши фанҳо ва омодасозии мутахассисони баландихтисоси оянда заминаи мусоид фароҳам меоранд. Ҳамзамон таъкид карда шуд, ки таваҷҷуҳи доимии Пешвои миллат муҳтарам Эмомалӣ Раҳмон ба рушди илму маориф имкон фароҳам овардааст, ки сатҳу сифати дониш ва рақобати солим миёни хонандагон сол аз сол беҳтар гардад. Сипас, муовини якуми директори Маркази миллии тестии назди Президенти Ҷумҳурии Тоҷикистон суханронӣ намуда, иштирокдоронро бо шартҳо ва тартиби баргузории олимпиада шинос кард. Баъди анҷоми маросими ифтитоҳӣ хонандагон вобаста ба фанҳо ба гурӯҳҳо ҷудо гардида, ба иҷрои супоришҳои олимпиада оғоз намуданд. Маврид ба зикр аст, ки дар олимпиадаҳои мазкур дар маҷмуъ 1343 нафар хонанда иштирок доранд. Аз ҷумла, рӯзи 9 апрел аз фанҳои ҷамъиятӣ-гуманитарӣ 694 нафар ва рӯзи 10 апрел аз фанҳои табиӣ-риёзӣ 649 нафар хонанда донишу маҳорати худро месанҷанд.
22
09.04.2026 -
Кӯлоб. Форуми байналмилалӣ оид ба рушди забони русӣ ва технологияҳои рақамӣ Дар Муассисаи таҳсилоти миёнаи умумии Россияву Тоҷикистон ба номи К.Д. Ушинский форуми кормандони соҳаи маориф ва муҳассилин таҳти унвони «Забони русӣ дар Тоҷикистон: забон дар масири рақамӣ» баргузор гардид. Дар чорабинӣ сардори раёсати таҳсилоти умумии Вазорати маориф ва илми Ҷумҳурии Тоҷикистон Асомиддинзода Шарофиддин, сардори Раёсати маорифи вилояти Хатлон Зиёдулло Абдулзода, раиси шаҳри Кӯлоб Диловар Пирзода, ректори Донишгоҳи давлатии педагогии Алтай Лазаренко И.Р., директори муассисаи мазкур Восифджонзода Р.В., муовини ректор оид ба илм ва инноватсияи Донишгоҳи давлатии Кӯлоб ба номи А. Рӯдакӣ Камолзода Ш.В. ва директори Институти коммуникатсияҳои Донишгоҳи давлатии омӯзгории Алтайи Федератсияи Россия Маркина П.В., инчунин омӯзгорон, донишҷӯён ва намояндагони соҳаи маориф иштирок намуданд. Дар маросими ифтитоҳ суханронии меҳмонон сурат гирифта, аз ҷумла, сардори Раёсати маорифи вилояти Хатлон зимни баромади худ аҳаммияти омӯзиши забони русиро ҳамчун воситаи муҳимми муоширати байналмилалӣ ва рушди ҳамкориҳои илмию таълимӣ таъкид намуд. Ӯ инчунин зикр кард, ки дар шароити ҷаҳонишавӣ истифодаи технологияҳои рақамӣ дар раванди таълим яке аз самтҳои афзалиятнок ба ҳисоб рафта, барои баланд бардоштани сифати таҳсилот заминаи мусоид фароҳам меорад. Ҳамзамон, мавсуф омӯзгоронро ба истифодаи усулҳои муосири таълим, ҷалби хонандагон ба омӯзиши фаъол ва рушди тафаккури эҷодӣ даъват намуд. Ҳамчунин, сардори раёсати таҳсилоти умумии Вазорати маориф ва илми Ҷумҳурии Тоҷикистон дар баромади худ иброз дошт, ки рушди омӯзиши забонҳои хориҷӣ, аз ҷумла забони русӣ, яке аз самтҳои муҳимми сиёсати давлатии соҳаи маориф ба шумор меравад. Ӯ таъкид намуд, ки забони русӣ ҳамчун воситаи иртиботи илмӣ ва фарҳангӣ имкониятҳои васеъро барои дастрасӣ ба донишҳои муосир ва густариши ҳамкориҳои байналмилалӣ фароҳам меорад. Дар идомаи суханронӣ номбурда ба масъалаи ҷорӣ намудани технологияҳои рақамӣ дар раванди таълим таваҷҷуҳ зоҳир намуда, изҳор дошт, ки истифодаи васеи платформаҳои таълимии электронӣ, захираҳои рақамӣ ва усулҳои инноватсионӣ метавонад сатҳу сифати таълимро ба марҳилаи нав бардорад. Ӯ ҳамзамон омӯзгоронро ба такмили ихтисос, аз худ кардани малакаҳои рақамӣ ва истифодаи усулҳои муосир дар таълим даъват кард. Дар идома дигар меҳмонон низ вобаста ба аҳамияти рушди забони русӣ, густариши ҳамкориҳои байналмилалӣ ва ҷорӣ намудани технологияҳои инноватсионӣ дар соҳаи маориф андешаҳои худро баён доштанд. Дар ҷараёни форум семинарҳо, машғулиятҳои амалӣ ва майдончаҳои методӣ ташкил гардида, иштирокчиён масъалаҳои истифодаи зеҳни сунъӣ, усулҳои интерактивӣ ва роҳҳои рушди нутқи хонандагонро мавриди баррасӣ қарор доданд. Форуми мазкур ба як майдони муҳимми табодули таҷриба ва таҳкими ҳамкориҳои байналмилалӣ табдил ёфта, нақши забонро ҳамчун воситаи пайвандгари фарҳангҳо бори дигар собит намуд. Дар анҷоми чорабинӣ ба иштирокчиён сертификатҳо тақдим гардиданд.
20
08.04.2026 -
ФАЪОЛИЯТИ ВАЗОРАТИ МАОРИФ ВА ИЛМИ ҶУМҲУРИИ ТОҶИКИСТОН ДАР СЕМОҲАИ АВВАЛИ СОЛИ 2026 Имрӯз, 8 апрели соли 2026 ҷаласаи ҳайати мушовараи Вазорати маориф ва илми Ҷумҳурии Тоҷикистон «Оид ба ҷамъбасти фаъолияти Вазорати маориф ва илми Ҷумҳурии Тоҷикистон дар семоҳаи аввали соли 2026 ва вазифаҳо то охири сол» баргузор гардид. Дар ҷаласаи ҳайати мушовара вазири маориф ва илми Ҷумҳурии Тоҷикистон Раҳим Саидзода, муовини якум ва муовинони вазири маориф ва илм, намояндагони вазорату идораҳо, сардорони раёсату шуъбаҳои дастгоҳи марказӣ, роҳбарони муассисаҳои тобеи вазорат, сардорони сарраёсат, раёсату шуъбаҳои маорифи вилоят, шаҳру ноҳияҳо, ректорони муассисаҳои таҳсилоти олии касбӣ ва директорони муассисаҳои мақоми ҷумҳуриявидошта ба тариқи ҳузурӣ ва маҷозӣ иштирок намуданд. Ҷаласа бо садо додани Суруди миллӣ ифтитоҳ гардида, сипас, ҳисоботи вазири маориф ва илми Ҷумҳурии Тоҷикистон «Оид ба ҷамъбасти фаъолияти Вазорати маориф ва илми Ҷумҳурии Тоҷикистон дар семоҳаи аввали соли 2026 ва вазифаҳо то охири сол» шунида шуд. Дар ҳисобот худ вазири маориф ва илм аз тадбирҳои муассири Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати баланд бардоштани сатҳу сифати таълиму тарбия ёдовар шуда, фаъолияти вазорат ва зерсохторҳоро дар самти таъминоти ҳуқуқӣ, таъминоти кадрӣ, ташкили гурӯҳҳои рушди барвақтии кӯдак ва марказҳои инкишофи кӯдак, зиёд намудани шумораи муассисаҳои томактабӣ, таҳияи санадҳои нав дар самтҳои гуногуни соҳа, таъмини муассисаҳои таълимӣ бо кабинетҳои фаннӣ, беҳтар намудани пояи моддӣ-техникии муассисаҳои томактабӣ, расидагӣ ба муроҷиатҳои шаҳрвандон, таъмини муассисаҳои таҳсилоти миёнаи умумӣ бо омӯзгорон, натиҷагирӣ аз сифати таҳсилот дар муассисаҳои таълимии соҳаи маориф, рушди ҳамкориҳо бо кишварҳои хориҷ дар самти маориф, бақайдгирии довталабон дар Маркази миллии тестии назди Президенти Ҷумҳурии Тоҷикистон, омода кардани кадрҳои илмӣ, бартараф намудани норасоии кадрию китобҳои дарсӣ, иҷрои саривақтии барномаҳои давлатӣ, теъдоди омӯзгорону кормандони дорои дараҷа ва унвони илмӣ дар муассисаҳои таҳсилоти олии касбӣ, озмунҳои ҷумҳуриявии «Фурӯғи субҳи доноӣ китоб аст», «Илм – фурӯғи маърифат», «Шоҳномахонӣ», таҳияи китобҳои дарсӣ барои донишҷӯёни муассисаҳои таҳсилоти олии касбӣ, беҳтар намудани сатҳу сифати таълим ҳамаҷониба мавриди таҳлилу баррасӣ қарор дод. Ҳамзамон, дар маърузаи худ вазири маориф ва илм фаъолияти Академияи таҳсилоти Тоҷикистон, Пажуҳишгоҳи рушди маориф ба номи Абдураҳмони Ҷомии Академияи таҳсилоти Тоҷикистон, Донишкадаи ҷумҳуриявии такмили ихтисос ва бозомӯзии кормандони соҳаи маориф, Маркази ҷумҳуриявии таълимию методӣ, Маркази ҷумҳуриявии таҳлил, иттилоот ва технологияҳои рақамӣ, Маркази таҳия, нашр ва муомилоти китобҳои дарсӣ, илмию методӣ ва Маркази матбуотро мавриди таҳлилу баррасӣ қарор дода, таъкид дошт, ки гарчанде дар давраи ҳисоботӣ аз ҷониби кормандони дастгоҳи марказии Вазорати маориф ва илм, муассисаҳои тобеъ, сарраёсат, раёсату шуъбаҳои маорифи вилоят, шаҳру ноҳия, муассисаҳои ҳамаи зинаҳои таҳсилот корҳои назаррас ба сомон расонида шуда бошад ҳам, дар татбиқи сиёсати пешгирифтаи давлату Ҳукумат оид ба рушди босамари низоми маорифи мамлакат, мушкилоту норасоиҳо ҳанӯз ҷой доранд ва бартараф кардани онҳо аз ҳар кадоми мо масъулияти баландро тақозо мекунад. Сипас, дар қисмати музокира директори Муассисаи нашриявии «Маориф» К. Исозода, ректори Донишгоҳи давлатии ҳуқуқ, бизнес ва сиёсати Тоҷикистон Ш.Мӯминзода ва мудири шуъбаи маорифи ноҳияи Данғара С. Хайруллозода баромад намуда, маърузаи вазири маориф ва илмро вобаста ба фаъолияти Вазорати маориф ва илми Ҷумҳурии Тоҷикистонро дар семоҳаи аввали соли 2026 қаноатбахш арзёбӣ намуданд. Ҷаласаро вазири маориф ва илм ҷамъбаст намуда, дар охир бори дигар ба масъулин ҷиҳати иҷрои дастуру супоришҳои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, Ҳукумати Ҷумҳурии Тоҷикистон, Вазорати маориф ва илм, стратегия, барнома, консепсия, қарорҳои ҳайати мушовара, фармоишҳои вазири маориф ва илм ва масъалагузориҳо барои соли 2026 дастуру супоришҳои мушаххас дод. Дар ҷамъбаст вазир таъкид дошт, ки соли 2026 барои миллати тоҷик соли таърихӣ ва фаромӯшнашаванда маҳсуб ёфта, аз ҳар як корманди соҳа масъулияти баланди касбӣ ва шаҳрвандиро тақозо менамояд. Дар ин замина, зарур дониста шуд, ки тамоми муассисаҳои таълимӣ ҷиҳати дар сатҳи баланд ва шоиста истиқбол гирифтани ҷашни 35-солагии Истиқлолияти давлатии Ҷумҳурии Тоҷикистон тадбирҳои мушаххас ва натиҷабахшро амалӣ намоянд. Ҳамзамон, роҳбарону масъулини соҳа вазифадор гардиданд, ки баргузории конфронсҳо, семинарҳои илмӣ, ҳамоишҳо ва дигар чорабиниҳои сатҳи баландро бахшида ба ин ҷашни таърихӣ ба таври шоиста таъмин намуда, тавассути онҳо ҳисси ватандӯстӣ, худшиносии миллӣ ва арҷгузорӣ ба арзишҳои давлатдориро дар миёни наврасону ҷавонон тақвият бахшанд. Маркази матбуоти Вазорати маориф ва илми Ҷумҳурии Тоҷикистон
61
08.04.2026
