21.09.2026
Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар идомаи сафари корӣ ба шаҳру ноҳияҳои вилояти Суғд ба таври фосилавӣ 6 иншооти таъйиноти гуногунро дар шаҳрҳои Истиқлол ва Гулистон ба истифода доданд.
Нахуст дар ин ҷо Сарвари давлат муҳтарам Эмомалӣ Раҳмон ба фаъолияти Ҷамъияти дорои масъулияти маҳдуди Оҳаки Истиқлол бо иқтидори истеҳсолии 200 тонна дар як шабонарӯз расман оғоз бахшиданд.
Пас аз ба истифода додани ин корхона 70 кас бо кори доимӣ ва маоши хуб таъмин гардида, маҳсулоти истеҳсолии он ба хориҷи кишвар содирот мешавад.
Гуфта шуд, ки дар оянда бунёди марҳилаи дуюми корхона дар назар дошта шудааст, ки баъди ба фаъолият оғоз кардани он иқтидори истеҳсолӣ ва шумораи кормандон зиёд мегардад.
Ҳоло дар ҳудуди шаҳри Истиқлол 6 корхона мавҷуд буда, дар онҳо зиёда аз 620 нафар ба кор ҷалб карда шудаанд ва дар як сол ба миқдори 46 миллиону 330 ҳазор сомонӣ маҳсулот истеҳсол мегардад.
Иншооти дигаре, ки ба таври фосилавӣ ба истифода дода шуд, корхонаи истеҳсоли пахтаи минералии ҷамъияти дорои масъулияти маҳдуди Дилроз Ғаюр дар шаҳраки Чоруқдарони шаҳри Гулистон мебошад.
Бунёди ин корхона имкон медиҳад, ки дар як сол ба миқдори 50 ҳазор тонна пахтаи минералӣ истеҳсол шавад. Корхона бо ҷалби сармояи дохилӣ ва хориҷӣ сохта шуда, дар он 60 ҷойи корӣ таъсис ёфтааст.
Ба кор андохтани ду дастгоҳи нави бофандагӣ дар ҷамъияти дорои масъулияти маҳдуди Қолинҳои Қайроққум бо иқтидори 450 ҳазор метри мураббаъ дар як сол иншооти дуюми саноатӣ дар шаҳри Гулистон аст.
Таҷҳизоти дар ин корхона васлгардида аз ширкати Вандевили кишвари Белгия буда, дар ин ҷо 20 сокини маҳаллӣ бо кори доимӣ таъмин гардидаанд.
Корхонаи парвариши мурғи тухмдеҳ дар минтақаи саноатии шаҳри Гулистон дар заминаи бинои ҷамъияти дорои масъулияти маҳдуди Шамс тиҷорат бунёд гардидааст, ки тариқи фосилавӣ бо иқтидори 630 ҳазор дона тухми мурғ дар як моҳ мавриди истифода қарор гирифт.
Корҳои сохтмонӣ дар ин иншоот аз соли 2025 оғоз ёфта, дар муддат кӯтоҳ ба истифода дода шуд ва дар он 20 кас соҳиби ҷойи кор гардид.
Ифтитоҳи фосилавии корхонаи истеҳсоли гӯшти мурғ дар шаҳри Гулистон иншооти дигари саноатие буд, ки дар масоҳати зиёда аз 55 метри мураббаъ бунёд шудааст.
Ҷамъияти дорои масъулияти маҳдуди Сифат мурғ дар як сол 320 тонна гӯшти мурғи аълосифат истеҳсол менамояд. Баъди ба истифода додани ин корхона 18 сокини маҳаллӣ ба кори доимӣ ҷалб карда шуд.
Дар ҳудуди шаҳри Гулистон ба ҳолати моҳи сентябри соли 2026 зиёда аз 50 корхонаи саноатӣ фаъолият доранд. Дар онҳо 5385 нафар ба кор ҷалб шудаанд, ки ин рақам нишондод ба ҳамин давраи соли гузашта беш аз 550 нафар зиёд мебошад.
Бинои навсозишудаи кӯдакистони Садбарг дар шаҳраки Адрасмони шаҳри Гулистон дар ҳамин рӯз тариқи фосилавӣ ба истифода дода шуд.
Ба Пешвои миллат муҳтарам Эмомалӣ Раҳмон иттилоъ дода шуд, ки ин муассисаи таълимии томактабӣ барои ба тарбия фаро гирифтани 350 кӯдак аз таъмири асосӣ бароварда шуда, дар он барои ташаккули барвақтӣ ва ҷалби кӯдакон ба бозиҳои шавқовару зеҳнӣ шароити арзанда фароҳам оварда шудааст.
Дар бинои аз таъмиршудаи кӯдакистон 14 гурӯҳ фаъолият менамояд ва дар ин ҷо 55 нафар соҳиби ҷойи корӣ доимӣ гардиданд.
Дар ҳудуди шаҳри Гулистон 11 муассисаи томактабӣ, аз он ҷумла 1 хусусӣ, мавҷуд буда, шумораи кӯдакони дар онҳо ба таълим фарогирифташуда 2087 нафарро ташкил медиҳад, ки нисбати соли гузашта 108 кӯдак зиёд аст.
Пас аз ифтитоҳи як зумра иншооти таъйиноти гуногун Сарвари давлат муҳтарам Эмомалӣ Раҳмон ба масъулон ҷиҳати афзоиши истеҳсоли маҳсулоти рақобатпазир, таъсиси ҷойҳои нави корӣ, боз ҳам беҳтар намудани шароити арзандаи кору фаъолият ва зиндагии мардум дар деҳот ва ҳидоят намудани насли наврас меҳнатдӯстию ватанпарварӣ тавсияҳо доданд.
Хабарҳои дигар
-
«ШОҲНОМАХОНӢ» - РОҲЕ БА СӮЙИ ХУДШИНОСӢ ВА АРҶГУЗОРӢ БА МЕРОСИ МИЛЛӢ 21 сентябри соли 2026 дар Муассисаи давлатии таълимии «Донишгоҳи давлатии Бохтар ба номи Носири Хусрав» маросими кушодашавии даври вилоятии озмуни ҷумҳуриявии «Шоҳномахонӣ» баргузор гардид. Дар маросими ифтитоҳи озмун муовини раиси вилояти Хатлон Анзурат Абдусаломзода, сардори Раёсати маорифи вилояти Хатлон Зиёдулло Абдулзода, мудирони шуъбаву бахшҳои маориф, намояндагони ҳайати комиссия ва дигар шахсони масъул аз шаҳру ноҳияҳои вилоят, инчунин довталабони озмун иштирок намуданд. Дар оғоз муовини раиси вилояти Хатлон суханронӣ намуда, оид ба ҳадаф ва аҳамияти баргузории озмуни ҷумҳуриявии «Шоҳномахонӣ» андешаронӣ кард. Зикр гардид, ки «Шоҳнома»-и Абулқосим Фирдавсӣ танҳо як асари бузурги адабӣ набуда, дар он таърихи пурифтихор, ҷаҳонбинӣ, арзишҳои ахлоқӣ, қаҳрамонӣ, ватандӯстӣ ва фарҳанги чандинҳазорсолаи миллати тоҷик инъикос ёфтааст. Аз ин рӯ, ташвиқи мутолиа ва аз бар намудани достонҳои «Шоҳнома» барои шинохти таъриху фарҳанги миллӣ ва таҳкими ҳисси худшиносиву ватандӯстии насли наврас аҳамияти хос дорад. Таъкидшуд, ки ташкили чунин озмунҳои ҷумҳуриявӣ бо ташаббус ва дастгирии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барои ҷалби аҳли ҷомеа, бахусус наврасону ҷавонон, ба китобхонӣ, омӯзиши таъриху адабиёт ва эҳёи арзишҳои маънавии миллӣ заминаи муносиб фароҳам меорад. Сипас, сардори Раёсати маорифи вилояти Хатлон суханронӣ намуда, доир ба омодагии довталабон ва раванди баргузории даври вилоятии озмун маълумот пешниҳод кард. Қайд гардид, ки дар даври имсолаи озмун довталабон аз шаҳру ноҳияҳои вилояти Хатлон иштирок намуда, баъди гузаштани марҳилаҳои якум ва дуюм ба даври вилоятӣ роҳ ёфтаанд. Дар ин раванд барои муайян намудани довталабони воқеан арзанда, ки дорои донишу малака, қобилияти қироат, дарки мазмун ва шинохти амиқи «Шоҳнома» мебошанд, корҳои зарурӣ ба роҳ монда шудаанд. Гуфташуд, ки ташаббуси Пешвои миллат муҳтарам Эмомалӣ Раҳмон дар мавриди роҳандозии озмуни «Шоҳномахонӣ» дар ҷалби насли наврасу ҷавон ва умуман қишрҳои гуногуни ҷомеа ба омӯзиши мероси адабию таърихии миллат аҳамияти бузург дорад. Зеро ҳар қадаре ки «Шоҳнома» бештар хонда, омӯхта ва дарк карда шавад, ҳамон андоза дониши насли наврас дар бораи гузашта, арзишҳои миллӣ, чеҳраҳои таърихӣ ва сабақҳои маънавии ниёгон густариш меёбад. Сардори Раёсати маориф ҳамчунин ба масъалаи шаффофияти озмун ва интихоби одилонаи довталабон таваҷҷуҳ намуда, гуфт, ки ҳайати комиссия ҳангоми баҳогузорӣ талаботи низомномаи озмунро қатъиян риоя менамояд. Танҳо он довталабоне, ки ба талаботи муқарраршуда ҷавобгӯ буда, сатҳи зарурии дониш, маҳорат ва омодагии худро нишон медиҳанд, ба давраҳои минбаъдаи озмун роҳхат хоҳанд гирифт. Дар идомаи маросим намояндагони ҳайати комиссия ва дигар шахсони масъул низ суханронӣ намуда, вобаста ба тартиби баргузории озмун, талабот, шартҳои иштирок ва бахшҳои он маълумоти зарурӣ пешниҳод карданд. Таъкид гардид, ки тамоми марҳилаҳои озмун дар асоси талаботи муқарраргардида ва бо риояи принсипи шаффофият баргузор шуда, ба натиҷаи ниҳоӣ танҳо донишу маҳорат ва сатҳи омодагии воқеии довталабон таъсир хоҳад расонд. Даври вилоятии озмуни ҷумҳуриявии «Шоҳномахонӣ» идомаи иқдомҳои муҳим дар самти арҷгузорӣ ба мероси адабию фарҳангии миллат буда, барои боз ҳам бештар ҷалб намудани хонандагону ҷавонон ба мутолиаи «Шоҳнома», таҳкими худшиносии миллӣ ва тарбияи ҳисси ватандӯстӣ заминаи мусоид фароҳам меорад.
20
22.09.2026 -
ДАР ВМКБ ДАВРИ ВИЛОЯТИИ ОЗМУНИ ҶУМҲУРИЯВИИ «ШОҲНОМАХОНӢ» ОҒОЗ ГАРДИД Дар Вилояти Мухтори Кӯҳистони Бадахшон даври вилоятии Озмуни ҷумҳуриявии «Шоҳномахонӣ» оғоз гардид. Дар маросими ифтитоҳи даври вилоятии озмун намояндаи Вазорати маориф ва илми Ҷумҳурии Тоҷикистон, роҳбарияти мақомоти иҷроияи ҳокимияти давлатии вилоят, масъулони соҳаи маориф, омӯзгорон, иштирокчиёни озмун, падару модарон ва дигар шахсони масъул иштирок намуданд. Зимни суханронӣ таъкид гардид, ки озмуни ҷумҳуриявии «Шоҳномахонӣ» бо ташаббус ва иқдоми беназири Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон роҳандозӣ гардида, он барои ҷалби бештари насли наврас ба мутолиаи осори гаронбаҳои адабиёт, тақвияти ҳисси худшиносиву ватандӯстӣ ва арҷгузорӣ ба мероси фарҳангии ниёгон заминаи мусоид фароҳам меорад. Гуфта шуд, ки озмуни ҷумҳуриявии «Шоҳномахонӣ» ҳамчун як иқдоми беназир ба баланд бардоштани маърифати фарҳангӣ, тақвияти завқи китобхонӣ, рушди қобилияти суханварӣ ва азбар намудани осори адабии ниёгон мусоидат намуда, дар шинохти арзишҳои миллӣ ва фарҳангии хонандагон нақши муҳим дорад. Зикр гардид, ки «Шоҳнома»-и безаволи Абулқосим Фирдавсӣ яке аз шоҳасарҳои бузурги адабиёт ва ганҷинаи арзишманди фарҳанги миллӣ буда, омӯзишу азбар намудани он барои таҳкими худшиносии миллӣ, эҳтиром ба таъриху фарҳанг ва бедор намудани ҳисси ватандӯстии насли наврас аҳаммияти хосса дорад. Дар идомаи чорабинӣ иштирокчиёни даври вилоятии озмун маҳорати худро дар шоҳномахонӣ нишон дода, аз осори безаволи Ҳаким Абулқосим Фирдавсӣ порчаҳо қироат намуданд.
15
22.09.2026 -
ИФТИТОҲИ ДАВРИ СЕЮМИ ОЗМУНИ ҶУМҲУРИЯВИИ «ШОҲНОМАХОНӢ» ДАР МИНТАҚАИ ҲИСОР Дар шаҳри Ҳисор даври сеюми Озмуни ҷумҳуриявии «Шоҳномахонӣ» миёни ноҳияҳои Файзобод, Варзоб, Шаҳринав, Рӯдакӣ ва шаҳрҳои Ҳисору Роғуну Ваҳдат ва Турсунзода оғоз гардид. Дар маросими ифтитоҳи озмун раиси шаҳри Ҳисор, узви Маҷлиси миллии Маҷлиси Олии Ҷумҳурии Тоҷикистон Носирзода Ҷаббор иштирок ва суханронӣ намуд. Раиси шаҳр зимни баромади худ таъкид кард, ки баргузории чунин озмунҳои сатҳи ҷумҳуриявӣ барои баланд бардоштани маърифати фарҳангӣ, тақвияти завқи китобхонӣ ва арҷгузорӣ ба мероси адабии ниёгон, бахусус осори безаволи Абулқосим Фирдавсӣ, аҳамияти муҳим дорад. Ӯ иштирокчиён, омӯзгорон ва масъулонро барои ҷалби бештари наврасону ҷавонон ба чунин озмунҳои маърифатӣ ва фарҳангӣ даъват намуда, ба ҳамаи иштирокчиён барору комёбӣ орзу кард. Дар идома таъкид гардид, ки «Шоҳнома»-и Фирдавсӣ яке аз ганҷинаҳои бузурги адабиёти форсу тоҷик ба шумор рафта, омӯзиш ва мутолиаи он дар тарбияи ҳисси худшиносӣ, ватандӯстӣ ва эҳтиром ба таъриху фарҳанги миллӣ нақши муҳим дорад. Дар даври сеюми озмун беҳтарин иштирокчиён аз шаҳру ноҳияҳои зикршуда барои санҷиши донишу маҳорати худ иштирок намуда, аз ашъор ва достонҳои «Шоҳнома» қироат ва донишу маҳорати худро нишон медиҳанд ва аз имруз сар карда, то 24-уми сентябр дар шаҳри Ҳисор идома хоҳад ёфт. Баргузории чунин чорабиниҳо дар шаҳри Ҳисор бори дигар аз таваҷҷуҳи хос ба рушди маърифати ҷавонон, китобхонӣ ва эҳёи арзишҳои фарҳангиву адабии миллӣ шаҳодат медиҳад.
20
22.09.2026
