12.05.2025
Имрӯз, 12 майи соли 2025 дар Вазорати маориф ва илми Ҷумҳурии Тоҷикистон вохӯрии ҳайати миссияи кории Бонки Умумиҷаҳонӣ бо роҳбарияти вазорат доир гардид. Дар вохӯрӣ муовини якуми вазири маориф ва илм Ҳомид Ҳошимзода, муовинони вазир, сардорони раёсату шуъбаҳои дахлдори вазорат, кормандони лоиҳаи «Муҳити таълим – асоси таҳсилоти босифат» ва ҳайати миссияи кории Бонки Умумиҷаҳонӣ иштирок намуданд.
Зимни суҳбат муовини якуми вазири маориф ва илм таъкид кард, ки Бонки Умумиҷаҳонӣ яке аз шарикони боэътимоди Вазорати маориф ва илм ба шумор меравад, ки дар самти татбиқи ислоҳоти муҳимми соҳа саҳми назаррас дорад. Аз ҷумла, лоиҳаи «Муҳити таълим – асоси таҳсилоти босифат», ки бо маблағгузории Бонки Умумиҷаҳонӣ амалӣ мешавад, ҷиҳати баланд бардоштани сифати таҳсилот ва муҳайё намудани шароити мусоид барои хонандагону омӯзгорон нақши калидӣ дорад.
Зикр гардид, ки дар соли сипаришуда татбиқи лоиҳа бо натиҷаҳои назаррас анҷом ёфта, «Чаҳорчӯбаи миллии рушди таҳсилот дар Ҷумҳурии Тоҷикистон» таҳия ва дар ҷаласаи мушовараи вазорат тасдиқ шуд. Ҳамзамон, дар асоси ин санад «Роҳнамо оид ба ташаккули муҳити физикӣ дар муассисаҳои таҳсилоти миёнаи умумӣ» таҳия шуда, айни ҳол мавриди тарҷума қарор дорад.
Бо мақсади татбиқи Стратегияи миллии арзёбии сифати таҳсилот барои давраи то соли 2044 ва таҳияи санадҳои зарурӣ, бо фармоиши вазир гурӯҳи кории байниидоравӣ таъсис дода шуд. Ҳамзамон, дар 42 муассисаи таҳсилоти миёнаи умумии 25 шаҳру ноҳия давраи озмоишии арзёбии байналмилалии PIRLS - 2026 амалӣ гардид.
Муовини якуми вазири маориф ва илм изҳор дошт, ки вазорат умедвор аст, Бонки Умумиҷаҳонӣ барои бартараф намудани осебҳои расида ба муассисаҳои таҳсилоти умумии ноҳияҳои Рашт ва Тоҷикобод, ки бар асари заминҷунбии 13 апрели соли 2025 ба амал омад, кумак хоҳад расонид.
Роҳбари гурӯҳи кории Бонки Умумиҷаҳонӣ Тигран Шмис зимни суханронии худ аз сатҳи ҳамкориҳои мутақобилан судманд бо Вазорати маориф ва илми Ҷумҳурии Тоҷикистон изҳори қаноатмандӣ намуда, таъкид дошт, мо ба ҳамкориҳои судманду созанда бо Вазорати маориф ва илми Ҷумҳурии Тоҷикистон баҳои баланд медиҳем. Натиҷаҳои то имрӯз бадастомада, аз ҷумла дар лоиҳаи “Муҳити таълим – асоси таҳсилоти босифат” нишон медиҳанд, ки ташаббусҳои пешгирифта дар самти дуруст ва даркорӣ роҳандозӣ шудаанд. Умед дорем, ки дар марҳилаҳои минбаъда низ бо такя ба таҷриба ва натиҷаҳои амалишуда метавонем иқдомоти навро роҳандозӣ намоем ва ба ин васила дар баланд бардоштани сифати таҳсилот ва беҳтарсозии муҳити таълим дар мактабҳои Тоҷикистон мусоидат намоем».
Дар интиҳо аз номи Вазорати маориф ва илм ба Бонки Умумиҷаҳонӣ барои ҳамкориҳои мутақобилан судманд изҳори миннатдорӣ баён гардида, изҳори умедворӣ шуд, ки равобити самарабахш дар роҳи рушди соҳаи маориф идома хоҳанд ёфт.
Маркази матбуоти
Вазорати маориф ва илми
Ҷумҳурии Тоҷикистон
Хабарҳои дигар
-
ЭЪЛОН Бахши ғизои мактабии назди Вазорати маориф ва илми Ҷумҳурии Тоҷикистон соли 2023 бо дастгирии Барномаи озуқавории ҷаҳонӣ (БОҶ) дар Ҷумҳурии Тоҷикистон таъсис ёфтааст. Ин бахш фаъолияти худро дар асоси Ҳадаф ва вазифаҳои Барномаи давлатии рушди ғизои мактабӣ барои солҳои 2022–2027 ва Стратегияи рушди устувори ғизои мактабӣ дар Ҷумҳурии Тоҷикистон то соли 2027 ба роҳ монда, ҳамоҳангсозии фаъолиятҳои марбут ба ғизои мактабиро таъмин менамояд. Аз ҷумла, он ҳамкориҳоро миёни Вазорати маориф ва илм ва Барномаи озуқавории ҷаҳонӣ дар раванди гузариш аз амалисозии барномаи ғизои мактабӣ аз ҷониби БОҶ ба Вазорат ба роҳ мемонад. Пас аз анҷоми давраи гузариш, Бахш ҳамчун маркази асосии ҳамоҳангсозӣ оид ба масъалаҳои ғизои мактабӣ фаъолиятро идома хоҳад дод. Вазорати маориф ва илми Ҷумҳурии Тоҷикистон ният дорад, ки ҳайати марказро тавассути таъсиси намояндагиҳо дар вилоятҳо, шаҳрҳо ва ноҳияҳо бо мақсади ҳамоҳангсозӣ ва назорат, мусоидат дар нақшакашӣ, мониторинг ва ҳисоботдиҳӣ, корҳои таблиғотӣ, баланд бардоштани иқтидор ва таъмини гузариши устувори барномаи ғизои мактабӣ васеъ намояд. Дар ин замина, мутахассисони бахшҳои ғизои мактабӣ дар Вилояти Мухтори Кӯҳистони Бадахшон, дар вилоятҳои Суғд, Хатлон (минтақаҳои Бохтар ва Кулоб) ва Рашт ба кор ҷалб карда мешаванд. ВАЗИФАҲО Таҳти назорати бевоситаи Ҳамоҳангсози маркази ғизои мактабӣ ва бо ҳамкории Барномаи Озуқавории Ҷаҳонӣ дар Тоҷикистон, мутахассис вазифаҳои зеринро иҷро мекунад: - Намояндагии Маркази ғизои мактабӣ дар минтақаҳои вобасташуда, пешниҳод намудани дастурҳо ва ҳамоҳангсозии фаъолиятҳои шахсони масъули шӯъбаҳои маориф. - Дастгирӣ дар татбиқ ва ҳамоҳангсозии фаъолиятҳои Барномаи давлатии рушди ғизои мактабӣ дар сатҳи вилоят. - Дастгирии шӯъбаҳои маориф дар банақшагирӣ ва тарҳрезии ғизодиҳии мактабӣ барои маблағгузорӣ аз буҷети давлат ва ё шарикони рушд, инчунин дарёфти манбаъҳои иловагии маблағгузорӣ. - Барқарорсозии ҳамоҳангӣ ва ҳамкорӣ бо шахсони масъули ғизои мактабӣ дар шаҳру ноҳияҳл, мақомоти маҳаллӣ, шарикони рушд ва дигар ҷонибҳои манфиатдор (сохторҳои тандурустӣ ва ҳифзи иҷтимоии аҳолӣ, кишоварзӣ ва ғ.). - Тақвияти фаъолияти Шӯрои вилоятӣ ва ноҳиявии ғизои мактабӣ бо иштироки мақомотҳои салоҳиятдор ва пайгирии қарорҳои Шӯрои ҳамоҳангсозии байниидоравӣ дар вилоят (минтақа) ва ноҳияҳо. - Дастгирӣ дар таъсис ва тақвияти ҳамоҳангсозии фаъолияти мақомотҳо ва ҷонибҳои манфиатдор барои татбиқи барномаҳо дар сатҳи шаҳру ноҳияҳо ва назорати фаъолияти онҳо бо ҷалби шахсони масъули шӯъбаҳои маориф. - Таъсис додани низоми ғизои мактабӣ, аз ҷумла такмили шароити ошхонаҳо, таҷҳизот, мебели мактабӣ, нигоҳдории маҳсулот, ошхонаи хонандагон, шароити шустани дастҳо, фаъолиятҳои кишоварзӣ ва фаъолияти даромадноки мактабҳо. - Дастгирии мактабҳо дар банақшагирӣ, ташкил ва идоракунии барномаи ғизоӣ, ки аз буҷети давлатӣ, грантҳои шарикони рушд, саҳми волидон ва дигар манбаъҳо маблағгузорӣ мешавад. - Мониторинги мунтазами сифату гуногунии ғизои мактабӣ, аз ҷумла тақвияти фаъолиятҳои рушди кишоварзӣ бо истифодаи заминҳои мактабӣ ва ҳамкорӣ бо хоҷагиҳои деҳқонӣ ва нонпазхонаҳо. - Таҳия кардани ҳисоботҳо ва фавран гузориш додани ҳолатҳои фавқулода ё фасоду фиреб ба Вазорати маориф ва илми Ҷумҳурии Тоҷикистон ва дар ҳолати зарурӣ ба шарикони рушд. - Дар ҳолати ошкор намудани мушкилот ё амалҳои ғайриқонунӣ ҳангоми татбиқи барнома, фавран ба сардори шӯъбаи маорифи минтақавӣ ва Вазорати маориф ва илми Ҷумҳурии Тоҷикистон дар шакли хаттӣ гузориш додан ва пешниҳод намудани роҳи ҳалли он. - Ҷамъоварии маълумот оид ба пешрафти ғизои мактабӣ аз шахсони масъули ноҳияҳо, таҳияи ҳисоботҳои моҳона ва солона бо таҳлили зарурӣ ба Маркази ғизои мактабӣ ва Вазорати маориф ва илми Ҷумҳурии Тоҷикистон. - Ҷамъоварӣ ва супоридани санадҳои молиявии шахсони масъул барои пардохти хароҷоти нақлиёт ва ё дигар хароҷоти марбут ба Маркази ғизои мактабӣ ва Вазорати маориф ва илми Ҷумҳурии Тоҷикистон. - Тақвияти иқтидори роҳбарияти мактабҳо ва шахсони масъули шӯъбаҳои маорифи шаҳрҳо ва ноҳияҳои минтақа тавассути ташкили омӯзишҳо ва пешниҳоди машваратҳо оид ба ташкил ва идоракунии ғизои мактабӣ. - Тарғиби ғизои солим дар мактабҳо, маҳаллаҳо ва ҷомеаҳо, аз ҷумла ташкил ва гузаронидани чорабиниҳои оммавӣ оид ба ғизои солим. - Иштирок дар таҳқиқотҳо, баррасиҳо ва арзёбиҳои марбут ба татбиқи ғизои мактабӣ ва Барномаи давлатии рушди ғизодиҳии мактабӣ. - Иҷрои ҳама гуна вазифаҳои дигар вобаста ба амалисозӣ ва рушди ғизои мактабӣ дар вилоят. ТАЛАБОТҲО Тахассусӣ Маълумоти дараҷаи бакалаврият ё дипломи пурраи маълумоти олӣ оид ба фанҳои гуманитарӣ, иқтисодиёт, молия, идоракунии давлатӣ, фанҳои марбут ба рушд ё дигар соҳаи марбут. Дониши ташрифоти давлати оид ба котиботи расмӣ, маҷлисҳо, ташрифҳо миссияҳо, чорабиниҳо ва гайра ҳатмӣ мебошад. Малакаи қавии муоширати бо шарикони давлатӣ ва шарикони рушд. Таҷрибаи корӣ Ду соли собиқаи корӣ дар корҳои тарҳрезӣ ва татбиқи лоиҳа, мониторинг ва арзёбӣ (аз ҷумла идоракунии маълумот) бо сохторҳои давлатӣ ё лоиҳаҳо,ташкилотҳои байналмилалӣ ва маҳаллӣ. Таҷрибаи корӣ дар барнома ва лоиҳаҳои ғизои мактабӣ бартарӣ дорад. Забондонӣ Дониши хуби забони тоҷикӣ ҳатмист. Донистани забонҳои англисӣ ва русӣ афзалият дорад. Малакаи кор бо компютер Маҳорати баланди кор бо барномаҳои MS Office (Word, Excel, PowerPoint, Outlook) талаб карда мешавад ва таҷрибаи қавӣ дар идоракунӣ ва таҳлили маълумот зарур аст. Таҷрибаи кор бо барномаҳои таҳлил ва визуализатсияи маълумот (SPSS, STATA, Tableau ва ғайра) бартарӣ дорад. Номзадҳои соҳибихтисос резюме ва номаи тавсиявии худро бояд ба почтаи электронии zsayora@mail.ru ва dilovarsaydaliev@gmail.com ирсол намоянд. Дар мавзӯи нома ҳатман номи вазифа, ноҳия ва вилоят нишон дода шавад. Рақами телефон барои гирифтани маълумоти иловагӣ: +992 90014009 (аз соати 8:00 то 17:00). Мӯҳлати ниҳоии пешниҳоди ҳуҷҷатҳо — 24 октябри соли 2025 то соати 17:00 (ба вақти Душанбе).
432
08.10.2025 -
Лоиҳаи Иттиҳоди Аврупо малакаҳои мутахассисони соҳаи маорифро тақвият мебахшад Дар доираи татбиқи лоиҳаи Иттиҳоди Аврупо “Дастгирии соҳаҳои маориф ва меҳнати Ҷумҳурии Тоҷикистон” тренинги омӯзишӣ барои баланд бардоштани малакаи касбии кормандони Маркази таҳлил ва ҳамоҳангсозии назди Вазорати маориф ва илм баргузор гардид. Мақсади асосии тренинг тақвият додани қобилиятҳои мутахассисон дар самти идоракунии самараноки барномаҳои таълимӣ, ҳамоҳангсозии фаъолияти шӯъбаҳои минтақавӣ ва ҷорӣ намудани усулҳои инноватсионӣ дар соҳаи маориф мебошад.
240
07.10.2025 -
ҶАЛАСАИ ҲАМОҲАНГСОЗӢ БО ШАРИКОНИ РУШД Дар Гурӯҳи идоракунии лоиҳаи “Такмили таҳсилоти миёна дар соҳаҳои илмҳои табиӣ, технологӣ, муҳандисӣ ва математика” ҷаласаи ҳамоҳангсозӣ миёни намояндагони Бонки Осиёии Рушд, ЮНИСЕФ ва ЮНЕСКО доир гардид. Ҷаласаро сармутахассиси раёсати бахши рушди инсонӣ ва иҷтимоии Бонки Осиёии Рушд, роҳбари лоиҳа хонум Шин Лонг оғоз намуда, дар оғоз оид ба мақсад ва муҳтавои лоиҳаи “Такмили таҳсилоти миёна дар соҳаҳои илмҳои табиӣ, технологӣ, муҳандисӣ ва математика” ба ҳозирин маълумот дод. Ҳамзамон, вобаста ба фаъолияти банақшагирифташуда ва анҷомёфта дар доираи лоиҳаҳои ЮНИСЕФ ва ЮНЕСКО низ маълумот дода шуд. Сипас, баррасии нуқтаҳои ҳамкорӣ миёни созмонҳо, хусусан дар самти ҳамгироии таълими тағйирёбии иқлим дар барномаҳои таълимӣ, инкишофи низоми ягонаи таҳсилоти рақамӣ барои омӯзгорон, рақамикунонии соҳаи маориф, татбиқи методологияи таълими салоҳиятнок, таҳияи барнома ва маводҳои таълимӣ, татбиқи барномаҳо дар самти таълими фарогир, ташкили курсҳои омӯзишӣ барои омӯзгорон ва дигар масъалаҳо сурат гирифт. Барои пешрафти самараноки ин самтҳо, қарор қабул гардид, ки гурӯҳҳои махсуси корӣ оид ба таълими тағйирёбии иқлим ва технологияҳои рақамӣ таҳти роҳбарии Вазорат маориф ва илми Ҷумҳурии Тоҷикистон ташкил карда шаванд. Ҳамчунин, нақшаҳои амалӣ барои баррасии имконияти ҳамгироии лоиҳаи энергетикӣ дар соҳаи маориф ва пайвастшавии намояндагони вазорат ба кор дар платформаҳои таҳсилоти рақамӣ муқаррар гардиданд. Дар интиҳои ҷаласа қарор қабул гардид, ки байни созмонҳо ҷиҳати татбиқи самарабахши лоиҳаҳо ҳамкории зич ба роҳ монда шуда, ба таври пайваста барои пайгирии ҳамгироии фаъолиятҳо ҷаласаҳои ҳамоҳангсозӣ ташкил карда мешаванд.
342
07.10.2025
