05.08.2025
5 августи соли 2025, Барномаи озуқавории ҷаҳонӣ (БОҶ) дар ҳамкорӣ бо вазоратҳои маориф ва илм, тандурустӣ ва ҳифзи иҷтимоии аҳолӣ Институти ғизои соҳавии Русия марҳилаи интихобии озмуни “Беҳтарин ошпази мактабӣ – 2025”- ро дар шаҳри Душанбе баргузор намуд.
Дар озмун чор ошпази ботаҷриба аз муассисаҳои таълимии пойтахт иштирок карданд. Ҳар кадом маҳорати баланди ошпазӣ ва садоқати худро ба касб ва ғизои солими мактабӣ нишон доданд.
Ошпазҳо бо истифода аз маҳсулоти ҳаррӯзаи мактаб ва Китоби «Маҷмӯаи дастурҳои ғизои мактабӣ»таомҳои мактабӣ, болаззат ва серғизо омода намуданд, аз ҷумла сэт, ки дар он хӯрокҳои зерин: якум шӯрбо бо ярмаи марҷумак; палав бо гӯшти гов в лӯбии сурх; хӯриш аз картошка ва ҷуворимакка; панкейк ва полуда аз ҷемро манзур намуданд. Ин таомҳо нишон доданд, ки маҳсулоти оддӣ ва дастрас дар сатҳи маҳаллӣ метавонанд асоси ғизои мутавозинро ташкил диҳанд, ки ба саломатӣ ва рушди кӯдакон мусоидат намояд.
Баъд аз чашидани таомҳо ва гузоштани баҳо, ҳайати ҳакамон ду финалистро интихоб намуд. Онҳо моҳи сентябри соли ҷорӣ дар якҷоягӣ бо финалистони дигар минтақаҳои кишвар барои ҷоизаи «Беҳтарин ошпази мактаб – 2025», ки дар шаҳри Душанбе баргузор мегардад, мубориза хоҳанд кард.
Ҳамаи иштирокчиён барои садоқат ба касб ва саҳмгузорӣ дар рушди ғизои мактабӣ дар саросари кишвар бо тӯҳфаҳо қадрдонӣ шуданд.
Хабарҳои дигар
-
Ҷумҳурии Тоҷикистон иштирок дар таҳқиқоти байналмилалии PISA 2025-ро бо муваффақият ба анҷом расонид 15-уми январи соли 2026 дар шакли онлайн (MS Teams) ҷаласаи хотимавии PISA CBIS QTJ доир гардида, ба анҷоми расмии иштироки Ҷумҳурии Тоҷикистон дар таҳқиқоти байналмилалии муқоисавии сифати таҳсилот PISA 2025 бахшида шуда буд. Дар ҷаласа намояндагони Созмони ҳамкории иқтисодӣ ва рушд, Шӯрои австралиягӣ оид ба таҳқиқоти таълимӣ (ACER), намояндагони Шӯрои идоракунии PISA (PGB), Маркази миллии тестии назди Президенти Ҷумҳурии Тоҷикистон, дастаи миллии PISA, Лоиҳаи Иттиҳоди Аврупо, ширкати Eductrade, инчунин дигар шарикони миллӣ ва байналмилалӣ иштирок намуданд. Дар рафти вохӯрӣ расман тасдиқ карда шуд, ки Ҷумҳурии Тоҷикистон тамоми талаботи таҳқиқоти PISA 2025-ро бомуваффақият иҷро намуда, татбиқи ҳамаи чорабиниҳои ба нақша гирифташударо дар муҳлатҳои муқарраршуда ба итмом расонид. Шарикони байналмилалӣ сатҳи ҳамоҳангсозӣ, омодагии техникӣ ва ҷалби касбии дастаи миллии PISA ва Маркази миллии тестиро баланд арзёбӣ карданд. OECD ва ACER ба лоиҳаи “Дастгирии Иттиҳоди Аврупо ба соҳаҳои маориф ва меҳнати Ҷумҳурии Тоҷикистон” барои дастгирии ҳамаҷонибаи молиявӣ ва техникӣ дар давоми тамоми давраи PISA 2025 миннатдорӣ баён намуданд. ACER инчунин ҳамкории самарабахш бо шарикони миллӣ ва рушди назарраси иқтидори институтсионалӣ ва касбии дастаи Тоҷикистон, аз ҷумла рушди салоҳиятҳои роҳбарӣ ва таҳлилиро қайд кард. Дар доираи муҳокимаҳо иштирокчиён оид ба масъалаҳои татбиқи таҳқиқот, таҳкими иқтидори миллӣ ва рушди таҷрибаи арзёбӣ мубодилаи афкор намуданд. Таваҷҷуҳи махсус ба аҳамияти таҷрибаи андӯхташуда, густариши ҳамкориҳои байналмилалӣ ва имкониятҳои иштироки минбаъдаи Тоҷикистон дар ташаббусҳои байналмилалии арзёбӣ зоҳир карда шуд. Намояндагони OECD аҳамияти стратегии маълумоти PISA-ро барои банақшагирии ислоҳоти оянда дар соҳаи маориф ва қабули қарорҳои асосноки идоракунӣ таъкид карданд. Инчунин дурнамои иштироки Ҷумҳурии Тоҷикистон дар таҳлил ва паҳнкунии натиҷаҳои PISA 2025 дар соли 2026, инчунин иштироки эҳтимолии кишвар дар давраи PISA 2029 мавриди баррасӣ қарор гирифт.
109
19.01.2026 -
БАРГУЗОРИИ ОМӮЗИШИ АСОСӢ БО ИШТИРОКИ ШИРКАТҲОИ СОХТМОНӢ 8 январи соли 2026 дар толори тренингии Гурӯҳи идоракунии лоиҳаи «Такмили таҳсилоти миёна дар соҳаҳои илмҳои табиӣ, технологӣ, муҳандисӣ ва математика» аз ҷониби кормандони лоиҳа марҳилаи дуюми омӯзиши асосӣ оид ба коҳиш додани хатарҳои марбут ба истисмори шаҳвонӣ, зӯроварӣ ва озори ҷинсӣ ва вокуниш ба шикоятҳо, ҳифзи иҷтимоӣ, масъалаҳои муҳофизатӣ ва фаъолиятҳои гендерӣ барои ширкатҳои сохтмонии дар раванди тендер ғолибгашта доир гардид. Тренинг дар доираи бастаи хариди CW02 – Сохтмони биноҳои иловагӣ бо озмоишгоҳҳои замонавӣ дар назди муассисаҳои таълимии миёнаи умумӣ: МТМУ №16 н. Восеъ, МТМУ №67 Данғара, МТМУ №19 Ҳамадонӣ ва бастаи хариди CW06 – Сохтмони биноҳои иловагӣ бо озмоишгоҳҳои замонавӣ дар назди муассисаҳои таълимии миёнаи умумӣ: МТМУ №32 ш. Панҷакент, МТМУ №2 ш. Хоруғ, МТМУ №4 н. Мастчоҳ гузаронида шуд. Дар омӯзиши мазкур 15 намоянда аз 4 ширкати сохтмонӣ, аз ҷумла ҶДММ “Фидо сохтмон”, ҶДММ “Тилло хан”, ҶДММ “Сангрези Кӯлоб”, ҶДММ “Ҳокими Чорбоғ”, 5 намоянда аз ширкати тарроҳӣ ва назорати корҳои сохтмонӣ ҶДММ “Мусаввир” ва 3 намоянда аз раёсати сохтмони асосии назди Вазорати маориф ва илми Ҷумҳурии Тоҷикистон, раёсати муносибатҳои байналмилалӣ, раёсати иқтисод, банақшагирӣ дар соҳаи маориф ва илм ва лоиҳаи STEM низ иштирок намуданд. Тибқи барнома дар тренинг аз ҷониби кормандони масъули лоиҳа ба иштирокчиёни омӯзиш муаррифиҳо оид ба амалисозии Нақшаи татбиқи ИШЗОҶ-и пудратчӣ, шарҳи умумии Нақшаи амали ИШЗОҶ, хатарҳои ИШЗОҶ ва вокуниш ба ИШЗОҶ, таъмини риояи кафолатҳои экологӣ ва иҷтимоии БОР ва фаъолиятҳои гендерӣ ҳангоми татбиқи лоиҳаи STEM ва уҳдадориҳои пудратчиён дар марҳилаи сохтмон пешниҳод карда шуд. Ҳамзамон, дар чорабинии болозикр намояндаи Бонки Осиёии Рушд низ иштирок ва суханронӣ намуд.
133
09.01.2026 -
СЕМИНАРИ ХАРИДИ БОНКИ ОСИЁИИ РУШД БАРОИ КОРМАНДОНИ ЛОИҲАИ ТАҲСИЛОТИ STEM ДАР ДУШАНБЕ ОҒОЗ ЁФТ Дар доираи Лоиҳаи «Такмили таҳсилоти миёна дар соҳаи илмҳои табиӣ, технология, муҳандисӣ ва математика» аз 9 то 12 декабри соли 2025 семинари омӯзишӣ барои кормандони лоиҳа баргузор шуда истодааст. Роҳбарии ин омӯзишро Павел Чемиртен, мушовири байналмилалӣ оид ба хариди Бонки Осиёии Рушд, ба зимма дорад. Тибқи иттилои масъулони лоиҳа, дар ҷараёни семинар иштирокчиён бо низом, талабот ва тартиботи хариди маҳсулот ва хизматрасониҳо дар лоиҳаҳои маблағгузоришудаи БОР шинос мегарданд. Мавзуъҳои асосӣ тартиби банақшагирии харид, усулҳои интихоби таъминкунандагон ва риояи стандартҳои байналмилалии шаффофиятро дар бар мегиранд. Мақсади баргузории семинар тақвияти сатҳи касбӣ, баланд бардоштани сифати иҷрои равандҳои харид ва таъмини мутобиқати онҳо ба меъёрҳои Бонки Осиёии Рушд мебошад. Ба гуфтаи ташкилкунандагон, татбиқи чунин омӯзишҳо барои иҷрои самараноки лоиҳаҳои соҳаи маориф нақши муҳим дорад.
202
11.12.2025
