11.09.2026
Имрӯз, 11 сентябри соли 2026 дар Вазорати маориф ва илми Ҷумҳурии Тоҷикистон ситоди кории ҳайати Комиссияи ҷумҳуриявии озмунҳои «Илм-фурӯғи маърифат» ва «Шоҳномахонӣ» баргузор гардид.
Дар кори ситод муовини Сарвазири Ҷумҳурии Тоҷикистон, раиси Комиссияи ҷумҳуриявии озмунҳо Дилрабо Мансурӣ, муовини якуми вазири маориф ва илм Ҳомид Ҳошимзода, аъзои комиссияи ҷумҳуриявӣ, ҳайати ҳакамон, масъулони Вазорати маориф ва илм, намояндагони мақомоти иҷроияи ҳокимияти давлатии вилоятҳо, шаҳри Душанбе ва шаҳру ноҳияҳои тобеи ҷумҳурӣ тариқи ҳузурӣ ва онлайнӣ иштирок намуданд.
Ҷаласаро муовини Сарвазири Ҷумҳурии Тоҷикистон, раиси Комиссияи ҷумҳуриявии озмунҳо Дилрабо Мансурӣ оғоз намуда, таъкид кард, ки баргузории озмунҳои ҷумҳуриявии «Илм - фурӯғи маърифат» ва «Шоҳномахонӣ» дар заминаи таваҷҷуҳ ва дастгирии пайвастаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба рушди соҳаи маориф, илм, маърифатнокии ҷомеа, худшиносии миллӣ ва дарёфти истеъдодҳои ҷавон роҳандозӣ гардидаанд.
Зикр гардид, ки ин озмунҳо барои баланд бардоштани сатҳи дониш, рушди қобилияти зеҳнӣ ва эҷодии насли наврасу ҷавон, омӯзиши мероси адабӣ ва фарҳангии миллӣ, ташаккули ҷаҳонбинии илмӣ ва тарбияи ҳисси ватандӯстиву худшиносии миллӣ заминаи мусоид фароҳам меоранд.
Дар идомаи ҷаласа масъалаи омодагӣ ва баргузории даври сеюми озмуни ҷумҳуриявии «Илм-фурӯғи маърифат» мавриди баррасӣ қарор гирифт.
Вобаста ба ин, иттилоъ дода шуд, ки даврҳои якум ва дуюми озмун мутаносибан дар муассисаҳои таълимӣ ва марказҳои шаҳру ноҳияҳо баргузор гардида, дар даври якум 313 ҳазору 664 нафар ва дар даври дуюм 59 ҳазору 825 нафар иштирок намудаанд. Аз ин шумора 5 ҳазору 93 нафар ба даври сеюм роҳ ёфтаанд.
Бо мақсади такмили низоми бақайдгирӣ ва назорати раванди озмун аз ҷониби Вазорати маориф ва илм Портали электронии озмун роҳандозӣ гардида, то даври сеюм 4 ҳазору 307 нафар иштирокчӣ ба қайд гирифта шудаанд.
Даври сеюми озмун аз рӯйи ҳашт номинатсия - биология, география, химия, математика, физика ва астрономия, технологияҳои иттилоотӣ, ихтироъкорӣ ва навоварӣ, зеҳни сунъӣ ва барномасозӣ баргузор мегардад.
Таъкид шуд, ки барои дар сатҳи зарурӣ баргузор намудани даври сеюм ҳайати ҳакамон ва комиссияҳои дахлдор омода гардида, ҷадвали маконҳои баргузорӣ муайян шудааст. Ҳайати ҳакамон вазифадор гардидааст, ки ҳангоми баҳогузорӣ ба донишҳои назариявӣ, малакаҳои амалӣ, қобилияти ҳалли масъалаҳо, гузаронидани таҷрибаҳои илмӣ ва дастовардҳои навоваронаи иштирокчиён таваҷҷуҳи ҷиддӣ зоҳир намуда, талаботи Низомнома ва принсипҳои шаффофиятро риоя намояд.
Ҳамзамон, зикр гардид, ки бо мақсади баланд бардоштани сатҳи омодагии масъулон ва ҳайати комиссияҳо гурӯҳҳои корӣ таъсис дода шуда, дар ҳамкорӣ бо мақомоти иҷроияи ҳокимияти давлатӣ, раёсату шуъбаҳои маориф, муассисаҳои таълимӣ ва намояндагони соҳаҳои дахлдор семинарҳои машваратӣ баргузор гардидаанд.
Сипас, масъалаи омодагӣ ба баргузории даври сеюми озмуни ҷумҳуриявии «Шоҳномахонӣ» мавриди баррасӣ қарор гирифт.
Вобаста ба ин иттилоъ дода шуд, ки дар даври дуюми озмун аз ҳамаи шаҳру ноҳияҳои ҷумҳурӣ 68 ҳазору 360 нафар довталаб иштирок намуда, 1 ҳазору 744 нафар ба даври сеюм роҳхат гирифтаанд. Аз ҷумла, 169 нафар аз Вилояти Мухтори Кӯҳистони Бадахшон, 629 нафар аз вилояти Хатлон, 469 нафар аз вилояти Суғд, 137 нафар аз шаҳри Душанбе ва 340 нафар аз шаҳру ноҳияҳои тобеи ҷумҳурӣ мебошанд.
Қайд гардид, ки даври сеюми озмун дар шаш минтақа - шаҳри Душанбе, Вилояти Мухтори Кӯҳистони Бадахшон, вилоятҳои Суғду Хатлон, минтақаҳои Ҳисор ва Рашт баргузор гардида, маконҳои баргузорӣ муайян карда шудаанд.
Ҳамчунин, дар асоси талаботи Низомнома номзадии устодони соҳибтаҷриба ва мутахассисони дорои дараҷа ва унвони илмӣ аз муассисаҳои таҳсилоти олии касбӣ, Академияи миллии илмҳои Тоҷикистон ва Иттифоқи нависандагони Тоҷикистон барои шомил намудан ба ҳайати ҳакамон ва комиссияи апеллятсионӣ пешниҳод гардидааст.
Зимни баррасии масъала таъкид гардид, ки ба омодагии иштирокчиён, азхудкунии амиқи «Шоҳнома»-и Абулқосим Фирдавсӣ, дарки мазмуну муҳтавои асар, дониши таърихию адабӣ ва фарҳанги баланди суханварӣ таваҷҷуҳи махсус зоҳир карда шавад.
Дар фарҷоми ҷаласа таъкид гардид, ки бо дарназардошти аҳаммияти озмунҳои ҷумҳуриявии «Илм-фурӯғи маърифат» ва «Шоҳномахонӣ» масъулон, мақомоти иҷроияи ҳокимияти давлатӣ, роҳбарони муассисаҳои таълимӣ, ҳайати комиссияҳо ва ҳакамон вазифадоранд, ки барои дар сатҳи баланди ташкилӣ, шаффоф ва одилона баргузор намудани даври сеюми озмунҳо тадбирҳои заруриро амалӣ намоянд.
Ҳамчунин, ба масъулон ҷиҳати риояи қатъии талаботи низомномаҳо, таъмини шароити мусоид барои иштирокчиён, назорати ҷараёни озмун ва пешгирии ҳар гуна ҳолатҳои ба шаффофияти он халалрасон дастуру супоришҳои мушаххас дода шуданд.
Маркази матбуоти
Вазорати маориф ва илми
Ҷумҳурии Тоҷикистон
Хабарҳои дигар
-
Ифтитоҳи фосилавии 15 иншоот дар ноҳияҳои Рашт, Нуробод, Сангвор, Лахш, Тоҷикобод ва муарифии 1 лоиҳаи роҳи Лабиҷар – Сангвор 11 сентябр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон 15 иншоотро ба таври фосилавӣ дар ноҳияҳои Рашт, Нуробод, Сангвор, Лахш ва Тоҷикобод ба истифода дода, бо лоиҳаи роҳи мошингарди Лабиҷар – Сангвор шинос шуданд. Дар деҳаи Қазноқи ноҳияи Рашт бинои ҷамоати деҳоти Нусратулло Махсум, осорхонаи Қаҳрамони Тоҷикистон Нусратулло Махсум ва дар шаҳраки Ғарм биноҳои шуъбаи маориф ва шуъбаи муҳофиза дар минтақаи Рашт ва қасри ҷавонон мавриди истифода қарор гирифт. Дар деҳоти Меҳрободи ноҳияи Нуробод бинои муассисаи таҳсилоти миёнаи умумии рақами 12 барои 700 хонанда дар ду баст ва маркази савдо ифтитоҳ ёфт. Дар деҳоти Заршӯёни ноҳияи Сангвор бошад меҳмонхонаи Гармчашмаи Вахё ифтитоҳ гардид. Пешвои миллат муҳтарам Эмомалӣ Раҳмон зимни ифтитоҳи фосилавӣ бо шароит барои кору фаъолият дар бинои шуъбаи Кумитаи давлатии амнияти миллӣ дар ноҳияи Лахш, маркази адлия, маркази таъминоти бехатарии озуқаворӣ ва бинои шабакаҳои барқ шинос шуданд. Дар ноҳияи Тоҷикобод муассисаи таҳсилоти миёнаи умумии рақами 45 барои 350 хонанда дар ду баст дар маҳаллаи навбунёди Сабзазор, муассисаи таҳсилоти миёнаи умумии рақами 28 дар деҳаи Полезаки деҳоти Ширинчашма барои 350 хонанда дар ду баст ва муассисаи таҳсилоти миёнаи умумии рақами 44 дар деҳаи навбунёди Сафедмун барои 600 хонанда дар ду баст мавриди истифода қарор гирифт. Дар маҷмуъ бо ифтитоҳи 3 иншооти соҳаи маориф дар ноҳияи Тоҷикобод 1300 хонанда дар шароити замонавӣ ба таҳсил фаро гирифта мешаванд. Роҳбари давлат муҳтарам Эмомалӣ Раҳмон амалишавии ҳадафҳои Ҳукумати кишвар, татбиқи нақшаи чорабиниҳои ҷашни 35-солагии Истиқлоли давлатӣ, саҳмгузории соҳибкорону сокинони маҳаллиро дар корҳои ободонӣ ва мавриди истифода қарор гирифтани иншооти таъйиноти гуногунро барои ба талаботи замони муосир мутобиқ шудани шароити хизматрасонӣ, фарогирии мардум ба ҷойи кор ва васеъшавии имкониятҳои истеҳсолӣ дар гурӯҳи ноҳияҳои водии Рашт муҳим арзёбӣ карданд. Раисони ноҳияҳои Рашт, Нуробод, Сангвор, Лахш ва Тоҷикобод барои истифодаи пурраи имкониятҳои мавҷуда, таҳким бахшидани созандагиҳо ва ҷамъоварии саривақтии ҳосили маҳсулоти кишоварзӣ вазифадор шуданд. Умуман, дар доираи татбиқи нақшаи чорабиниҳои ҷашни 35-солагии Истиқлоли давлатии Ҷумҳурии Тоҷикистон дар ноҳияи Рашт 404 иншоот, Нуробод 270, Лахш 99, Тоҷикобод 94 ва дар ноҳияи Сангвор 95 иншоот сохта ба истифода дода шудааст. Зимни муаррифӣ ба Сарвари давлат муҳтарам Эмомалӣ Раҳмон маълумот дода шуд, ки лоиҳаи роҳи мошингарди Лабиҷар-Сангвор бо дарозии умумии 64,5 километр амалӣ мешавад. Ҳамин сол аз Лабиҷар то деҳаи Кафтаргузар сохтмони роҳ бо дарозии 10 километр, бунёди ду пул бо дарозии умумии 148 метр, 18 қубури обгузар бо андозаҳои гуногун, 21 такядевор ва чароғонсозӣ оғоз мегардад. Лоиҳаи роҳи мошингарди Лабиҷар-Сангвор аз ҷониби Маркази татбиқи лоиҳаи Сохтмони роҳи мошингарди Шоҳон-Зиғар амалӣ гардонида мешавад. Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон зимни шиносоӣ бо лоиҳаи роҳи Лабиҷар – Сангвор масъулини дахлдори соҳаро ҷиҳати иҷрои босифату саривақтии сохтмон бо назардошти талаботи кӯҳистон, ҷалби бештари сармоя ва тезонидани раванди корҳо вазифадор намуданд.
8
11.09.2026 -
Оғози сафари корӣ ба ноҳияи Рашт ва ба истифода додани фурудгоҳи ноҳия 11 сентябр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон бо мақсади ифтитоҳи як қатор иншооти дорои таъйиноти гуногун дар ноҳияҳои водии Рашт, суҳбату вохӯрӣ бо аҳолӣ ва иштирок дар тантанаҳои идона ба истиқболи ҷашни 35-солагии Истиқлоли давлатӣ бо сафари корӣ ба ноҳияи Рашт ташриф оварданд. Дар фурудгоҳи ноҳияи Рашт Сарвари давлатро роҳбарият ва сокинони шарафманди ноҳия бо эҳтирому самимият ва муҳаббати хос истиқбол гирифтанд. Дар ҳамин ҷо Президенти Ҷумҳурии Тоҷикистон муҳтарам Эмомалӣ Раҳмон нахуст фурудгоҳи ноҳияи Раштро мавриди баҳрабардорӣ қарор доданд. Бинои фурудгоҳ дар раванди корҳои ободонӣ бо дасттирии соҳибкорони ватанӣ навсозӣ шуда, дар он барои мусофирон шароити замонавии хизматрасонӣ муҳайё шудааст. Ба ин васила дар оянда бо кушодани хатсайрҳои нав рафтуомади мусофирон бо ҳавопаймоҳо дигар минтақахо барқарор гардида, хизматрасониҳо ба талаботи имрӯза мутобиқ карда мешаванд. Сарвари давлат ба кори бинокорон баҳои баланд дода, барои боз ҳам беҳтар шудани фаъолияти фурудгоҳ ба масьулон дастуру тавсияҳо доданд.
15
11.09.2026 -
Ифтитоҳи Мактаби президентии ноҳияи Рашт Мактаби президентӣ барои хонандагони болаёқат муассисаи насли нави соҳаи маориф дар ноҳияи Рашт аст, ки 11 сентябр бо иштироки Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба истифода дода шуд. Иншоот дар асоси дастуру роҳнамоиҳои Пешвои миллат муҳтарам Эмомалӣ Раҳмон дар самти беҳсозии фазои таълиму тарбия мутобиқ ба меъёру талаботи муосир сохта шудааст. Ба Сарвари давлат муҳтарам Эмомалӣ Раҳмон иттилоъ доданд, ки бинои наву замонавии таълимӣ аз 33 синфхонаи муҷаҳҳаз иборат буда, барои 800 хонандаи болаёқат пешбинӣ гардидааст. Синфхонаҳои компютерии пайваст бо шабакаи интернет ба дарёфти адабиёти гуногун ва омӯзиши илмҳои муосир мусоидат мекунад. Барои аз худ кардани илмҳои дақиқ синфхонаҳои химия, биология, физика ва озмоишгоҳҳо бо муҳимтарин дастгоҳу лавозимоти таълимӣ таҷҳизонида шудаанд, ки ин дар омӯзиши донишҳои назариявӣ ва амалии хонандагон нақши муассир мегузорад. Синфхонаҳои таълими меҳнат, омодагии ибтидоии ҳарбӣ, ҳуҷраҳои кории омӯзгорон, маҷлисгоҳ бо 400 ҷойи нишаст, ошхонаи барҳаво, толори варзиш, майдончаи варзишӣ ва дигар инфрасохтори зарурӣ ба омӯзиши касбу ҳунар, баргузории ҷамъомаду вохӯриҳо, ҷалби хонандагон ба бозиҳои футбол, волейбол ва баскетбол заминаҳои воқеӣ мегузорад. Бо мавриди баҳрабардорӣ қарор гирифтани Мактаби президентӣ барои хонандагони болаёқат дар ноҳияи Рашт зиёда аз 60 омӯзгор соҳиби ҷойи кор ва маоши хуб гардиданд. Ҳамчунин, барои бо ҷойи зист таъмин намудани хонандагони аз ноҳияҳои дигари минтақа дар назди муассиса 2 бинои алоҳидаи хобгоҳ барои духтарон ва писарон низ сохта шудааст. Хобгоҳҳо дорои шароити муосир буда, барои 350 хонанда пешбинӣ шудааст. Пешвои миллат муҳтарам Эмомалӣ Раҳмон зимни суҳбат бо масъулин ва омӯзгорони муассиса дастур доданд, ки бо истифода аз шароит ва имкониятҳои фароҳамшуда дар тақвияти донишу малакаи хонандагон, омода намудани онҳо дар рӯҳияи ватандӯстӣ ва арҷгузорӣ ба муқаддасоти миллӣ таваҷҷуҳи аввалиндараҷа зоҳир намоянд. Ифтитоҳи иншооти нави соҳаи маориф дар рӯзҳои таҷлили ҷашни бузурги миллӣ – 35-умин солгарди Истиқлоли давлатӣ барои хонандагону омӯзгорони ноҳияи Рашт туҳфаи арзанда ва нишони ғамхории Ҳукумати Ҷумҳурии Тоҷикистон ба тақвияти донишу тафаккури насли ояндаи миллат арзёбӣ гардид.
15
11.09.2026
