12.02.2025
12-уми феврали соли равон дар Муассисаи давлатии таълимии “Литсейи 4 барои хонандагони болаёқати шаҳри Душанбе" ҷаласаи гурӯҳи корӣ доир ба натиҷаи мониторинги сифати таҳсилот дар муассисаҳои таълимии шаҳри Душанбе баргузор гардид, ки дар он муовини вазири маориф ва илм Равшан Каримзода, сардорону кормандони раёсату шуъбаҳои дахлдори вазорат, сардори Сарраёсати маориф ва мудирони маорифи ноҳияҳои шаҳри Душанбе, директорони муассисаҳои таълимӣ ва дигар кормандони соҳаи маорифи пойтахт иштирок намуданд.
Дар ҷаласа муовини вазири маориф ва илм қайд кард, ки таъмини сифати таълим ва самаранокии таҳсилот яке аз самтҳои афзалиятноки сиёсати давлат дар соҳаи маориф ба ҳисоб рафта, таваҷҷуҳи Ҳукумати Ҷумҳурии Тоҷикистон ба ҳалли масъалаҳои муҳимтарин, аз қабили баланд бардоштани сифати таълим ва тайёр намудани мутахассисони баландихтисоси ба бозори меҳнат рақобатпазир равона карда шудааст.
Дар идома сардори шуъбаи сифати таҳсилоти вазорат Айниддин Холиқзода вобаста ба вазъи сифати таҳсилот дар муассисаҳои таҳсилоти миёнаи умумии пойтахт суханронӣ намуд.
Дар рафти ҷаласа ҳамчунин масъалаҳои баланд бардоштани сатҳи таълиму тарбия дар муассисаҳои таълимӣ, беҳтар намудани азхудкунии хонандагон, ҷобаҷогузории муназамми соатҳои дарсӣ, танзими сарбории омӯзгорон, пешниҳоди дурусти маълумоти оморӣ, таъмини муассисаҳои таълимӣ бо китобҳои дарсӣ, риояи ҳатмии сару либоси тавсиявӣ, иштироки бештари хонандагон дар озмуну олимпиадаҳои ҷумҳуриявиву байналмилалӣ, татбиқи муносибати босалоҳият дар раванди таълиму тарбия, ба танзим даровардани вазъи ҳуҷҷатгузорӣ дар муассисаҳои таълимӣ, фаъолияти гурӯҳҳои идоракунии сифати таҳсилот, бартараф намудани камбудиҳо ва норасоиҳои ҷойдошта ва чанде дигар мавриди баррасӣ қарор гирифт.
Гуфта шуд, ки яке аз масъалаҳои ба таъмини сифати таҳсилот таъсиррасон ва муайянкунандаи дастовардҳои таълимии хонандагон, ин назорат ва иҷрои “Барномаи давлатии дарёфт ва рушди истеъдодҳо барои солҳои 2021-2025” ва иҷрои чанде дигар барномаҳо, нақша - чорабиниҳо, консепсияву стратегияҳои давлатӣ дар соҳаи маориф мебошад.
Маркази матбуоти
Вазорати маориф ва илми
Ҷумҳурии Тоҷикистон
Хабарҳои дигар
-
ЧОРАБИНИИ ФАРҲАНГИИ ДОНИШГОҲИ ДАВЛАТИИ ХОРУҒ БА МУНОСИБАТИ 35-СОЛАГИИ ИСТИҚЛОЛИ ДАВЛАТӢ 15 августи соли 2026 тибқи ҷадвали тасдиқнамудаи Вазорати маориф ва илми Ҷумҳурии Тоҷикистон оид ба баргузории чорабиниҳои фарҳангии муассисаҳои таҳсилоти олии касбӣ бахшида ба 35-солагии Истиқлоли давлатии Ҷумҳурии Тоҷикистон дар Майдони Исмоили Сомонии шаҳри Хоруғ чорабинии фарҳангӣ баргузор гардид. Чорабинии мазкур аз ҷониби Донишгоҳи давлатии Хоруғ ба номи М. Назаршоев ташкил гардида, дар он ҳайати профессорону омӯзгорон, кормандон ва донишҷӯёни донишгоҳ иштирок намуданд. Дар доираи чорабинӣ дастаи ҳунарии донишгоҳ барномаи рангини фарҳангиро иборат аз суруду таронаҳои ватандӯстона ва намунаҳои ҳунари миллӣ пешкаши иштирокдорон гардонид. Баргузории чунин чорабиниҳо ба таҳкими ҳисси ватандӯстӣ, худшиносии миллӣ ва арҷгузорӣ ба арзишҳои фарҳангиву маънавии миллӣ мусоидат менамояд.
18
16.08.2026 -
МАШВАРАТИ АВГУСТИИ КОРМАНДОНИ СОҲАИ МАОРИФИ ВИЛОЯТИ МУХТОРИ КӮҲИСТОНИ БАДАХШОН БАРГУЗОР ГАРДИД Дар толори мақомоти иҷроияи ҳокимияти давлатии шаҳри Хоруғ бо иштироки муовини вазири маориф ва илми Ҷумҳурии Тоҷикистон Бадриддин Музаффарзода, муовини раиси Вилояти Мухтори Кӯҳистони Бадахшон Муслима Афзалшо, сардори раёсати муассисаҳои таҳсилоти миёнаи умумии вазорат, сардори раёсати маорифи Вилояти Мухтори Кӯҳистони Бадахшон ва омӯзгорону кормандони соҳа машварати августии кормандони соҳаи маорифи вилоят баргузор гардид. Зимни баргузории машварат муовини вазири маориф ва илм натиҷаҳои фаъолияти муассисаҳои таълимии вилоятро таҳлил намуда, аз дастовардҳо ва пешравиҳои соҳаи маориф ёдовар шуд. Ҳамзамон, ба як қатор масъалаҳо ва камбудиҳои ҷойдошта таваҷҷуҳ зоҳир гардида, ҷиҳати бартараф намудани онҳо, беҳтар намудани фаъолияти муассисаҳои таълимӣ ва баланд бардоштани сатҳу сифати таълиму тарбия ба масъулини соҳа ва омӯзгорон вазифаҳои мушаххас гузошта шуданд. Таъкид гардид, ки Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба рушди соҳаи маориф, баланд бардоштани сатҳу сифати таълиму тарбия, беҳтар намудани шароити муассисаҳои таълимӣ ва омода намудани насли донишманду соҳибмаърифат таваҷҷуҳи доимӣ ва махсус зоҳир менамоянд. Аз ин рӯ, масъулини мақомоти идоракунии соҳаи маориф, роҳбарони муассисаҳои таълимӣ ва омӯзгоронро зарур аст, ки дар партави сиёсати маорифпарваронаи давлату Ҳукумати кишвар фаъолияти худро боз ҳам ҷоннок намуда, ҷиҳати иҷрои дастуру супоришҳои роҳбарияти олии мамлакат, баланд бардоштани сифати таҳсилот, татбиқи усулҳои муосири таълим ва тарбияи насли дорои донишу ҷаҳонбинии васеъ тадбирҳои муассир андешанд. Ҳамчунин, муовини раиси Вилояти Мухтори Кӯҳистони Бадахшон суханронӣ намуда, оид ба масъалаҳои рушди минбаъдаи соҳаи маорифи вилоят, омодагии ҳамаҷонибаи муассисаҳои таълимӣ ба соли нави таҳсил, фароҳам овардани муҳити мусоиди таълиму тарбия ва бартараф намудани камбудиҳои ҷойдошта ибрози назар кард. Дар ҷараёни машварат масъалаҳои баланд бардоштани сифати таълиму тарбия, омодагӣ ба соли нави таҳсил, таъмини муассисаҳои таълимӣ бо кадрҳои омӯзгорӣ, таҳкими заминаи моддиву техникӣ, истифодаи самараноки технологияҳои муосир дар раванди таълим, рушди қобилияти зеҳнии хонандагон ва таҳкими мақому манзалати омӯзгор мавриди баррасӣ қарор гирифтанд. Таъкид шуд, ки рушди соҳаи маориф ва илм, баланд бардоштани сифати таҳсилот, тарбияи насли донишманду соҳибмаърифат, ватандӯсту худшинос ва рақобатпазир аз самтҳои муҳимми сиёсати иҷтимоии давлату Ҳукумати Ҷумҳурии Тоҷикистон маҳсуб меёбад. Машварати имсола дар остонаи таҷлили 35-солагии Истиқлоли давлатии Ҷумҳурии Тоҷикистон баргузор гардида, аҳаммияти махсус дошт. Зикр гардид, ки тайи солҳои соҳибистиқлолӣ дар мамлакат таҳти роҳбарии Пешвои миллат муҳтарам Эмомалӣ Раҳмон барои рушди соҳаи маориф заминаҳои мусоид фароҳам оварда шуда, садҳо муассисаи нави таълимӣ бунёду таҷдид гардида, имкониятҳои таҳсил ва дастрасӣ ба дониш барои насли наврасу ҷавон пайваста беҳтар шудаанд. Дар идомаи машварат омӯзгорон ва кормандони фаъоли соҳа, ки дар рушди маориф, баланд бардоштани сифати таълиму тарбия ва омода намудани хонандагон ба озмуну олимпиадаҳои ҷумҳуриявию байналмилалӣ саҳми арзанда гузоштаанд, бо нишони сарисинагии «Аълочии маориф ва илми Тоҷикистон», «Ифтихорнома» қадрдонӣ гардиданд. Маркази матбуоти Вазорати маориф ва илми Ҷумҳурии Тоҷикистон
31
16.08.2026 -
БАРГУЗОРИИ БАРНОМАИ ФАРҲАНГӢ БА МУНОСИБАТИ 35-СОЛАГИИ ИСТИҚЛОЛ Дар Боғи фарҳангии «Куруши Кабир» бо ташаббуси Донишкадаи тарбияи ҷисмонии Тоҷикистон ба номи Саидмуъмин Раҳимов ба муносибати 35-солагии Истиқлоли давлатии Ҷумҳурии Тоҷикистон барномаи фарҳангиву фароғатӣ баргузор гардид. Дар чорабинӣ роҳбарият ва кормандони донишкада иштирок намуданд. Дар доираи барнома суруду таронаҳои ватандӯстона, рақсу мусиқӣ ва дигар намунаҳои ҳунари миллӣ пешкаши ҳозирин гардонида шуда, Истиқлоли давлатӣ, сулҳу ваҳдати миллӣ ва дастовардҳои даврони соҳибистиқлолӣ васф гардиданд. Баргузории чунин чорабиниҳо ба таҳкими ҳисси ватандӯстӣ, худшиносии миллӣ ва арҷгузорӣ ба арзишҳои фарҳангиву маънавии миллӣ мусоидат менамояд.
18
16.08.2026
