31.01.2026
31 январи соли 2026 дар Донишкадаи иқтисод ва савдои Донишгоҳи давлатии тиҷорати Тоҷикистон дар шаҳри Хуҷанд ҷаласаи назоратии сайёри вазири маориф ва илми Ҷумҳурии Тоҷикистон Раҳим Саидзода баргузор гардид.
Дар ҷаласа сардорони раёсатҳои дастгоҳи марказии Вазорат, ректорон ва директорони муассисаҳои таҳсилоти олии касбӣ, сардори раёсати маорифи вилояти Суғд, мудирони шуъбаҳои маориф, директорони марказҳои таҳсилоти иловагӣ, дарёфт ва рушди истеъдодҳо, инчунин марказҳои технологияи информатсионӣ ва коммуникатсияи шаҳру ноҳияҳои вилояти Суғд иштирок намуданд.
Ҷаласаро вазири маориф ва илм ифтитоҳ намуда, иброз дошт, ки баргузории ҷаласаҳои сайёр ҷиҳати таҳлили амиқи вазъи соҳа дар маҳалҳо, муайян намудани мушкилот ва андешидани тадбирҳои мушаххаси ислоҳотӣ аҳаммияти муҳим дорад. Вазири маориф ва илм зимни суханронии худ таъкид намуд, ки тамоми дастовардҳои соҳаи маориф, аз ҷумла, дар вилояти Суғд, самараи таваҷҷуҳу дастгирии пайвастаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба рушди маориф мебошад. Бо ташаббус ва роҳнамоии Пешвои миллат дар кишвар, аз ҷумла, дар вилояти Суғд, бунёду азнавсозии муассисаҳои таҳсилоти томактабӣ, миёнаи умумӣ ва таҳсилоти олии касбӣ ба марҳилаи сифатан нав ворид гардида, шароити муосири таълимӣ фароҳам оварда шудааст. Таъсиси муассисаҳои нави таълимӣ, таҷҳизонидани синфхонаҳо бо технологияи замонавӣ, тақвияти пойгоҳи моддиву техникии донишгоҳҳо, баланд бардоштани мақоми омӯзгор ва ҷорӣ намудани равишҳои муосири таълим далели равшани сиёсати маорифпарваронаи Пешвои миллат мебошад. Дар натиҷаи ин сиёсати хирадмандона имрӯз дар вилояти Суғд тамоми зинаҳои таҳсилот, аз томактабӣ то таҳсилоти олии касбӣ, ба рушди устувор нигаронида шуда, заминаи боэътимод барои тарбияи насли соҳибмаърифат, рақобатпазир ва ватандӯст фароҳам омадааст.
Дар идома, тибқи рӯзномаи ҷаласа ҳисоботи сардори раёсати маорифи вилояти Суғд Г. Мирзозода оид ба вазъи соҳаи маорифи вилоят дар соли 2025 шунида шуд. Дар ҳисботи худ сардори раёсати маорифи вилояти Суғд натиҷаҳои фаъолияти соҳаи маорифи вилоят дар соли 2025-ро мавриди таҳлил қарор дода, оид ба дастовардҳо, мушкилоти мавҷуда ва роҳҳои ҳалли онҳо маълумоти муфассал пешниҳод намуд. Аз ҷумла, ба масъалаҳои беҳтар намудани сифати таҳсилот, таъмини муассисаҳо бо кадрҳои омӯзгорӣ, рушди инфрасохтори соҳа, ҷорӣ намудани технологияҳои рақамӣ ва татбиқи барномаҳои давлатӣ таваҷҷуҳи хоса зоҳир гардид.
Пас аз анҷоми ҳисобот, вазири маориф ва илм ҷиҳати бартараф намудани камбудиҳои ҷойдошта, тақвияти назорат ва баланд бардоштани масъулияти роҳбарони ҳамаи зинаҳои соҳа дастуру супоришҳои мушаххас дод.
Сипас, ба як қатор омӯзгорон ва кормандони техникӣ туҳфаҳои вазири маориф ва илм тақдим гардид.
Дар фарҷоми ҷаласа вазири маориф ва илм иброз дошт, ки татбиқи самараноки сиёсати давлатӣ дар соҳаи маориф ва илм аз фаъолияти ҳамоҳанг, масъулиятнок ва ташаббускоронаи тамоми кормандони соҳа вобаста мебошад.
Маркази матбуоти
Вазорати маориф ва илми
Ҷумҳурии Тоҷикистон
Хабарҳои дигар
-
ҚАБУЛИ САЙЁРИ ШАҲРВАНДОН ДАР ШАҲРИ ХУҶАНД Имрӯз, 31 январи соли 2026 дар Донишкадаи иқтисод ва савдои Донишгоҳи давлатии тиҷорати Тоҷикистон дар шаҳри Хуҷанд қабули сайёри шаҳрвандон аз ҷониби вазири маориф ва илми Ҷумҳурии Тоҷикистон Раҳим Саидзода баргузор гардид. Дар қабули сайёр хонандагону донишҷӯён, омӯзгорон ва шаҳрвандони касбу кори гуногун иштирок намуда, доир ба интиқоли донишҷӯён байни муассисаҳои таҳсилоти олии касбӣ, сохтмони биноҳои иловагии таълимӣ дар назди муассисаҳо, таъмини мактабҳо бо мизу курсӣ, , идомаи таҳсил ва дигар масъалаҳои марбут ба соҳаи маориф муроҷиату пешниҳодҳои худро иброз доштанд. Зимни баррасии муроҷиатҳо вазири маориф ва илм ба масъулин ҷиҳати ҳаллу фасли саривақтии масъалаҳои мавҷуда дар муҳлати муайян дастуру супоришҳои мушаххас дод. Маркази матбуоти Вазорати маориф ва илми Ҷумҳурии Тоҷикистон
11
31.01.2026 -
АЁДАТИ СОБИҚАДОРОНИ СОҲА Вазири маориф ва илми Ҷумҳурии Тоҷикистон Раҳим Саидзода зимни сафари корӣ ба вилояти Суғд дар шаҳри Хуҷанд ва ноҳияи Бобоҷон Ғафуров бо ҳадафи қадрдонӣ аз хизмати бисёрсолаи омӯзгорон, аз ҳолу аҳволи се нафар омӯзгори собиқадори соҳаи маориф дидан намуд. Дар ҷараёни аёдат вазири маориф ва илм бо омӯзгори собиқадор Марҳабо Сулаймонова-омӯзгори фанни физика вохӯрӣ анҷом дод. Мавсуф аз соли 1971 то имрӯз дар муассисаи таҳсилоти миёнаи умумии №7-и шаҳри Хуҷанд фаъолият намуда, зиёда аз 50 сол ба таълиму тарбияи насли наврас машғул мебошад. Ҳамчунин, вазири маориф ва илм бо омӯзгори собиқадор Ғайбулло Хоҷибоев-омӯзгори фанҳои физика ва математика дидор намуд. Номбурда фаъолияти омӯзгории худро аз соли 1965 оғоз намуда, беш аз 60 сол дар муассисаҳои таҳсилоти миёнаи умумии шаҳру ноҳияҳои вилояти Суғд фаъолият кардааст. Инчунин, вазир бо омӯзгори собиқадор Раҳбар Баҳодурова-омӯзгори фанни математика вохӯрӣ намуд. Мавсуф аз соли 1972 то имрӯз дар соҳаи маориф фаъолият дошта, дар муассисаҳои таълимии ноҳияи Бобоҷон Ғафуров ва шаҳри Хуҷанд, инчунин, дар сохторҳои идоракунии маориф вазифаҳои гуногунро ба уҳда доштааст. Зимни суҳбат бо собиқадорон вазири маориф ва илм иброз намуд, ки тӯли солҳои соҳибистиқлолӣ маҳз ба шарофати сиёсати хирадмандона ва таваҷҷуҳи пайвастаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон соҳаи маориф ҳамчун самти афзалиятноки сиёсати давлатӣ рушд ёфта, мақому манзалати омӯзгор дар ҷомеа таҳким ёфт. Татбиқи барномаҳои давлатӣ, беҳтар намудани шароити фаъолияти омӯзгорон, дастгирии иҷтимоӣ ва қадршиносии хизмати омӯзгорони собиқадор имкон фароҳам овард, ки таҷрибаи ғании онҳо ҳифз ва ба насли ҷавони омӯзгорон интиқол дода шавад. Дар ин росто, таҷрибаи ғании шумо- омӯзгорони собиқадор, ки даҳсолаҳо умри худро ба таълиму тарбияи насли наврас бахшидаед, имрӯз ҳамчун сарвати бебаҳои соҳаи маориф арзёбӣ мегардад. Омӯзгорони собиқадор, дар навбати худ, зимни суҳбат изҳор доштанд, ки таваҷҷуҳ ва ғамхории доимии Пешвои миллат нисбат ба соҳаи маориф ва аҳли илму дониш барои онҳо мояи ифтихор ва рӯҳбаландӣ мебошад. Онҳо бо арзи сипос ба Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон таъкид намуданд, ки сиёсати маорифпарваронаи Роҳбари давлат ба баланд гардидани сатҳи таҳсилот, эҳёи мақоми омӯзгор ва фароҳам овардани шароити арзандаи фаъолияти онҳо мусоидат намуда, омӯзгоронро ба хизмати содиқона ва масъулиятнок ба Ватан ва насли оянда ҳидоят мекунад.
10
31.01.2026 -
НИШАСТИ МАТБУОТИИ ВАЗОРАТИ МАОРИФ ВА ИЛМИ ҶУМҲУРИИ ТОҶИКИСТОН Имрӯз, 30 январи соли 2026 нишасти матбуотии Вазорати маориф ва илми Ҷумҳурии Тоҷикистон баргузор гардид. Дар нишасти матбуотӣ вазири маориф ва илм Раҳим Саидзода, мушовири калони бахши Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа Адҳам Маъмурзода, муовини якуми вазир, муовинони вазир, сардорони раёсату шуъбаҳо, роҳбарони муассисаҳои тобеъ, сардорони Сарраёсати маорифи шаҳри Душанбе, раёсатҳои вилоятҳои Хатлон, ВМКБ ва 40 нафар намояндаи васоити ахбори оммаи дохиливу хориҷӣ иштирок намуданд. Дар нишаст аз ҷониби 17 нафар намояндаи ВАО 29 савол пешниҳод гардид, ки ба ҳар кадоми он вазири маориф ва илм, муовинони вазир, роҳбарони муассисаҳои тобеъ ва сардорони раёсатҳои маорифи вилоятҳо посухҳои мушаххас доданд. Маркази матбуоти Вазорати маориф ва илми Ҷумҳурии Тоҷикистон
131
30.01.2026
