Озмуни ҷумҳуриявии “Беҳтарин роҳбари маҳфили сол” ҷамъбаст гардид

29-06-2021
29-уми июни соли равон дар Маркази ҷумҳуриявии муассисаҳои таҳсилоти иловагии Вазорати маориф ва илми Ҷумҳурии Тоҷикистон бори нахуст озмуни ҷумҳуриявии “Беҳтарин роҳбари маҳфили сол” баргузор гардид. 
Дар чорабинии мазкур муовини якуми вазири маориф ва илм Муҳаммаддовуд Саломиён, муовини вазири маориф ва илм Гулчеҳра Ғанизода, директори Маркази ҷумҳуриявии муассисаҳои таҳсилоти иловагӣ Умедҷон Сафарзода ва иштирокчиёну меҳмонон ширкат доштанд. 
Умедҷон Сафарзода - директори Маркази ҷумҳуриявии муассисаҳои таҳсилоти иловагӣ чорабиниро ифтитоҳ намуда, таъкид кард, ки мақсад аз баргузории озмун, дарёфт ва муаррифии омӯзгорони боистеъдод, навовару эҷодкор, қадрдонии меҳнати омӯзгор, баланд бардоштани мақоми ӯ дар ҷомеа ва паҳн намудани таҷрибаи пешқадам мебошад. 
Муҳаммаддовуд Саломиён-муовини якуми вазири маориф ва илми ҷумҳурӣ ҷаҳати шаффофияти озмун суханронӣ намуда, иброз дошт, ки чунин озмунҳо минбаъд ҳам дар баланд бардоштани мақому манзалати омӯзгор дар ҷомеа ва рушди қобилияту истеъдоди наврасон мақоми шоистаро иҷро хоҳад кард.
Мавриди зикр аст, ки бо мақсади муйаян намудани ғолиби озмун аз ҳисоби кормандони соҳибтаҷрибаи дастгоҳи марказии Вазорати маориф ва илм ва зерсохторҳои он ҳакамон таъсис дода шуд ва тибқи тартиби ташкил ва баргузории озмуни мазкур довталабон аз рӯйи 4 шарт байни якдигар рақобат намуданд. 
Дар натиҷа, ҳайати ҳакамони озмун мувофиқ ба шартҳо ба маҳорату истеъдоди роҳбарони маҳфил баҳогузорӣ намуда, ба Болтуева Вилоят Музафаровна-роҳбари маҳфили “Дастони моҳир”-и маркази таҳсилоти иловагии ноҳияи Спитамени вилояти Суғд ҷой якум, Зикруллоев Сабзалӣ Муродович-роҳбари маҳфили “Асбобҳои нафасӣ”-и маркази кӯдакон ва наврасони шаҳри Душанбе ҷой дуюм ва Шарифов Идибек Каримович-роҳбари маҳфили “Географони ҷавон”-и маркази таҳсилоти иловагии вилояти Хатлон ҷой сеюмро сазовор донистанд. 
Дар ҷамъбасти озмун иштирокчиён бо дипломҳои дараҷаи 1, 2, 3, «Ифтихорнома»-и Вазорати маориф ва илми Ҷумҳурии Тоҷикистон ва тӯҳфаҳои хотиравӣ қадрдонӣ карда шуданд.
Бояд гуфт, ки ғолиби озмун аз ҷониби вазири маориф ва илми Ҷумҳурии Тоҷикистон бо нишони “Аълочии маорифи Тоҷикистон” қадрдонӣ шуда, аз ҷониби Иттифоқи касабаи кормандони соҳаи маориф ва илми ҷумҳурӣ роҳхат барои истироҳат дар осоишгоҳҳо тақдим карда шуд.
Ҳамчунин, дар фарҷоми озмун аъзоёни маҳфилҳои марказ, ки дар олимпиадаҳои фаннӣ сазовори ҷойҳои якум, дуюм ва сеюм гардида буданд, бо ифтихорнома ва тӯҳфаҳои хотиравӣ қадрдонӣ шуданд.


                                                                       

                                                                                                                                                                             Маркази матбуоти
                                                                                                                                                                Вазорати маориф ва илми 
                                                                                                                                                                        Ҷумҳурии Тоҷикистон