Дар мушовара Муҳаммадюсуф Имомзода - вазири маориф ва илм, муовини якум, муовинони вазир, сардорони раёсату шуъба, роҳбарони муассисаҳои тобеъ, сардорони Сарраёсат, раёсат, мудирони шуъбаҳои маорифи вилоят, шаҳру ноҳияҳо ва роҳбарони як қатор муассисаҳои таълимӣ бевосита ва сардори раёсати маорифи ВМКБ аз тариқи онлайн ширкат варзиданд.

Дар оғоз вазири маориф ва илм М. Имомзода  қайд кард, ки Вазорати маориф ва илми Ҷумҳурии Тоҷикистон ҳамчун мақоми ваколатдор дар соҳаи маориф ва илм дар семоҳаи якуми соли 2021 фаъолияти худро дар доираи Паёми Президенти Ҷумҳурии Тоҷикистон ба Маҷлиси Олӣ, нақшаи кори Ҳукумати Ҷумҳурии Тоҷикистон, нақшаи кори Вазорати маориф ва илм, консепсияҳо, стратегияҳо, барномаҳо ва дигар санадҳои меъёрии ҳуқуқии соҳа ба роҳ монда, ҷиҳати иҷрои дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон, қарор ва нақшаи чорабиниҳои Ҳукумати Ҷумҳурии Тоҷикистон, қарорҳои мушовараи Вазорати маориф ва илм корҳои назаррасро ба анҷом расонид. 

Сипас, Муҳаммаддовуд Саломиён - муовини якуми вазири маориф ва илм вобаста ба фаъолияти вазорат дар семоҳаи якуми соли 2021 ҳисобот дод.  Мавсуф фаъолияти  муассисаҳои тобеъ дар самти илм ва инноватсия, равобити байналмилалӣ, таъминоти муассисаҳо ба кадрҳои омӯзгорӣ,  аз аттестатсия гузаронидани омӯзгорон, таъминоти муассисаҳои таълимӣ бо китобҳои дарсӣ ва пардохти маблағи иҷораи китобҳои дарсӣ аз ҷониби раёсату шуъбаҳои маориф, иҷрои Барномаи давлатии “Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаҳои илму маориф”, фаъолияти хадамотҳои методӣ дар иҷрои Барномаи давлатии таъмини муассисаҳои таълимию илмии ҷумҳурӣ бо кабинетҳои фаннӣ, фарогирии кӯдакон дар зинаи таҳсилоти томактабӣ, назорати сифати таҳсилот ва азхудкунии барномаи таълимӣ, ғайримақсаднок истифода намудани бинои муассисаҳои таълимӣ, корҳои омодагӣ барои баргузор намудани даври навбатии озмунҳои “Фурӯғи субҳи доноӣ китоб аст”, “Илм – фурӯғи маърифт”, вусъат бахшидани корҳои сохтмонӣ ва ғайраро  мавриди таҳлилу баррасӣ қарор дода, баҳри бартараф намудани  мушкилоту камбудиҳои ҷойдошта ва тақвият бахшидани фаъолият масъулин вазифадор гардиданд.  

Дар музокира раиси Шӯрои ректорони муассисаҳои таҳсилоти олии касбӣ Маҳмадшо Гулзода, сардори Сарраёсати маорифи шаҳри Душанбе Баҳром Исмоилзода, директори Маркази ҷумҳуриявии дарёфт ва рушди истеъдодҳо Тоҷиннисо Маҳмадова суханронӣ намуда,  фаъолияти вазоратро дар  семоҳаи аввали соли 2021 қаноатбахш арзёбӣ карданд. 

Дар охир  М. Имомзода ҷиҳати иҷрои дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон, қарорҳои Ҳукумати кишвар, татбиқи стратегияию барномаҳои соҳавӣ ва як қатор масъалаҳои дигар ба масъулин дастуру супоришҳои мушаххас дод.